ខេត្តកំពង់ធំ ៖ ដីចំណីស្ទឹងសែន និងដីចំណីផ្លូវកំពុងត្រូវបានរំលោភបំពានសង្ស័យមានការឃុបឃិតគ្នាពីអាជ្ញាធរឃុំ មហាជននាំគ្នានិយាយរិះគន់ថា បច្ចុប្បន្នដីចំណីស្ទឹងសែន និងដីចំណីផ្លូវស្ថិតនៅភូមិអូរកន្ធរ សង្កាត់អូរកន្ធរ ក្រុងស្ទឹងសែននិងនៅតាមបណ្តោយស្ទឹង កំពុងតែមានការឃុបឃឹតគ្នាពីអាជ្ញាធរសង្កាត់ចាក់ដីរំលោភយកយ៉ាងអនាធិបតេយ្យដោយពុំមានទប់ស្កាត់បន្តិចនោះឡើយ…
ខេត្តកំពង់ធំ ៖ ដីចំណីស្ទឹងសែន និងដីចំណីផ្លូវកំពុងត្រូវបានរំលោភបំពានសង្ស័យមានការឃុបឃិតគ្នាពីអាជ្ញាធរឃុំ មហាជននាំគ្នានិយាយរិះគន់ថា បច្ចុប្បន្នដីចំណីស្ទឹងសែន និងដីចំណីផ្លូវស្ថិតនៅភូមិអូរកន្ធរ សង្កាត់អូរកន្ធរ ក្រុងស្ទឹងសែននិងនៅតាមបណ្តោយស្ទឹង កំពុងតែមានការឃុបឃឹតគ្នាពីអាជ្ញាធរសង្កាត់ចាក់ដីរំលោភយកយ៉ាងអនាធិបតេយ្យដោយពុំមានទប់ស្កាត់បន្តិចនោះឡើយ ដែលជាហេតុធ្វើឲ្យប៉ះពាល់ដល់សណ្តាប់ធ្នាប់ និងបរិស្ថាន ។
ពាក់ព័ន្ធនឹងការិះគន់ខាងលើនេះ លោក ជីវ គឹមអុន ចៅសង្កាត់អូរកន្ធរប្រាប់ថា ពួកគាត់ចាក់ដីធ្វើផ្ទះនៅ បើមិនឲ្យគាត់ចាក់ដីនៅទេ តើឲ្យគាត់ទៅរស់នៅឯណា? បើគេធ្វើផ្ទះនៅតាមមាត់ស្ទឹងគ្រប់តែគ្នាទៅហើយនោះ អ្នកខ្លះធ្វើសុទ្ធតែសំណង់រឹងទៀតផង ហើយដីចំណីស្ទឹងនេះត្រូវបានគេលក់ដូរតរៗគ្នាក៏មាន ។
ចំណែកលោក ម៉ាក់ ប៊ុនហុង អភិបាលក្រុងស្ទឹងសែនបានមានប្រសាសន៍ប្រាប់ កោះសន្តិភាព ឲ្យដឹងនៅព្រឹកថ្ងៃទី២៨ ខែកុម្ភៈ ឆ្នាំ២០១៩ នេះថា លោកមិនបានដឹងទេអំពីករណីចាក់ដីរំលោភយកដីចំណីស្ទឹង និងចំណីផ្លូវខាងលើ ប្រសិនបើមានករណីនេះម៉ែននោះ លោកនឹងចាត់វិធានការតាមផ្លូវច្បាប់ តែសូមរង់ចាំ លោកចាត់មន្ត្រីរបស់លោកឲ្យចុះទៅពិនិត្យមើលសិន លោកមិនគាំទ្រនូវទង្វើនេះទេ ។
កន្លងមកលោកបានដឹកនាំកម្លាំងចុះអនុវត្តកាត់តម្រឹម រុះរើ និងវាយកំទេចរបងថ្មដែលសាងសង់រំលោភមកលើដីចំណីផ្លូវ បានជាច្រើននៅតាមដងផ្លូវសាធារណៈ ហើយលោកនឹងផ្តល់ព័ត៍មានជូននៅពេលក្រោយ លោក អឹម សុឌីណា ប្រធានមន្ទីររៀបចំដែនដី នគរូបនីយ៍កម្ម និងសំណង់ខេត្តកំពង់ធំ ប្រាប់ថា!រូបលោកក៏មិនបានដឹងដែរចំពោះករណីខាងលើនេះ ចាំលោកចាត់មន្ត្រីឲ្យចុះទៅមើលសិន ។
ពលរដ្ឋនៅតែទទូចដដែលៗថាបើអាជ្ញាធរ ក្រុង ខេត្ត និងមន្ទីរជំនាញមិនមានវិធានការទប់ស្កាត់ ចេះតែបើកភ្លើងខៀវឲ្យមានការរំលោភយកដីចំណីស្ទឹងនោះ ករណីដីចំណីស្ទឹងសែន ដីចំណីផ្លូវចេះតែកើតមានឡើងឥតឈប់ឈរយ៉ាងអនាធិបតេយ្យដូច្នេះនោះ ដែលជាហេតុធ្វើឲ្យប៉ះពាល់ដល់សោភ័ណក្រុងភាពស្ទឹងសែន នឹងប៉ះពាល់ដល់បរិស្ថានជាខ្លាំង តាមរយៈការបោះចោលកាកសំណល់ និងបង្ហូរលូបង្គន់ចូលទៅក្នុងទឹកស្ទឹងសែននេះ៕
ចែករំលែកព័តមាននេះ