ខេត្តកំពង់ឆ្នាំង ៖ មន្ដ្រីមន្ទីរបរិស្ថានខេត្តកំពង់ឆ្នាំងម្នាក់បានស្លាប់ដោយគ្រោះថ្នាក់ចរាចរណ៍ផ្លូវទឹក ដោយសារកាណូត២បុកគ្នា ដែលគ្រោះថ្នាក់នេះបានកើតឡើងនៅវេលាម៉ោងជាង៧យប់ ថ្ងៃទី២៧ ខែកុម្ភៈ ឆ្នាំ២០១៩ នៅចំណុចកំពង់តាសុខ ស្ថិតក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ក្នុងពេលបំពេញបេសកម្មក្នុងការងារជំនាញ ។
លោកសាំង គឹមស៊ន មេឃុំឆ្នុកទ្រូ នៅរសៀលថ្ងៃទី២៨ ខែកុម្ភៈនេះបានអោយដឹងថា ជនរងគ្រោះក្នុងគ្រោះថ្នាក់ចរាចរណ៍នេះមានឈ្មោះអ៊ុយ ប៊ុនធន អាយុ៥២ឆ្នាំ ជាមន្ត្រីមន្ទីរបរិស្ថានខេត្តកំពង់ឆ្នាំង ប្រចាំការនៅឃុំឆ្នុកទ្រូ មានទីលំនៅក្នុភូមិកំពង់ព្រះ ឃុំឆ្នុកទ្រូ ស្រុកបរិបូណ៌។
ក្នុងពេលកើតហេតុមានកាណូតមួយគ្រឿង បានបើកបុកកាណូតរបស់លោកពេញទំហឹង ព្រោះតែងងឹងមើលគ្នាមិនឃើញ ទើបបណ្តាលអោយលោករបួសធ្លាក់ទឹកស្លាប់ នៅលើសពជនរងគ្រោះសមត្ថកិច្ចពិនិត្យឃើញមានរបួសចំស្នៀតផ្កាខាងធ្វេង។
ក្រោយពេលកើតហេតុកាណូតបង្ក និងអ្នកបើកបរបានរត់គេចខ្លួនបាត់ រហូតមកដល់ពេលនេះសមត្ថកិច្ចមិនទាន់រកឃើញអត្តសញ្ញាណកាណូតបង្ក និងជនបង្កគ្រោះថ្នាក់ខាងលើនេះនៅឡើយ ដោយបន្តធ្វើការស្រាវជ្រាវទៀត ។ ចំណែកសពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យនៅសង្កាត់ព្រែកព្នៅ ខេត្តកណ្តាល ព្រោះលោកមានទីលំនៅទីនោះ៕
ចែករំលែកព័តមាននេះ