ប្រទេសវៀតណាម ៖ ភ្នាក់ងារសារព័ត៌មាន Viet Nam News បានឲ្យដឹងថា អ្នកសារព័ត៌មានបរទេស និងក្នុងស្រុកដែលធ្វើការនៅមជ្ឈមណ្ឌលប្រព័ន្ធផ្សព្វផ្សាយអន្តរជាតិក្នុងទីក្រុងហាណូយក្នុងកំឡុងកិច្ចប្រជុំរវាងប្រទេសកូរ៉េខាងជើង និងសហរដ្ឋអាមេរិកនឹងទទួលបានសំបុត្រយន្តហោះសម្រាប់ធ្វើដំណើរក្នុងស្រុក និងការស្នាក់នៅសណ្ឋាគារផ្កាយប្រាំដោយមិនគិតថ្លៃ ។
អំណោយដ៏ពិសេសនេះត្រូវបានប្រកាសដោយក្រុមហ៊ុនអាកាសចរណ៍ Vietnam Airlines និង Vinpearl ក្រោមកិច្ចសហប្រតិបត្តិការជាមួយនឹងរដ្ឋបាលវិស័យទេសចរណ៍វៀតណាម (VNAT) របស់ក្រសួងវប្បធម៌ កីឡា និងទេសចរណ៍របស់វៀតណាម ។
អ្នកសារព័ត៌មានអាចជ្រើសរើសរវាងកញ្ចប់សំបុត្រយន្តហោះក្នុងស្រុករបស់ក្រុមហ៊ុនអាកាសចរណ៍ណាមួយ ឬការស្នាក់នៅ Resort លំដាប់ផ្កាយប្រាំណាមួយរបស់ Vinpearl ដូចជា Vinpearl Resport and Golf Nam Hoi An, Vinoeark Resort and Golf Phu Quoc ឬ Vinpearl Resport and Spa Nha Trang ជាដើម ។
អ្នកសារព័ត៌មានដែលមានកាតសារព័ត៌មានរបស់ក្រសួងការបរទេសអាចចុះឈ្មោះទទួលបានកញ្ចប់អំណោយមួយនៅតូប VNAT នៅមជ្ឈមណ្ឌលប្រព័ន្ធផ្សព្ធផ្សាយអន្តរជាតិ ។ កិច្ចសហប្រតិបត្តិការរវាង Vietnam Airlines, Vinpearl និង VNAT នេះមានគោលដៅលើកស្ទួយការអភិវឌ្ឍន៍វិស័យទេសចរណ៍ និងដំណើរការសហមាហរន្តកម្មរបស់វៀតណាម ។ ដោយអញ្ជើញអ្នកតំណាងប្រព័ន្ធផ្សព្វផ្សាយអន្តរជាតិមកទស្សនាកម្សាន្តក្នុងប្រទេសវៀតណាម VNAT គិតថាសកម្មភាពនេះនឹងចូលរួមក្នុងការលើកស្ទួយប្រទេសឲ្យមនុស្សស្គាល់កាន់តែច្រើន ។
យោងទៅតាមក្រសួងព័ត៌មាននិងទំនាក់ទំនងបានឲ្យដឹងថា មានអ្នកសារព័ត៌មានអន្តរជាតិប្រមាណ៣០០០នាក់ ដែលតំណាងភ្នាក់ងារសារព័ត៌មានច្រើនជាង ២០០កន្លែងទៅទៀតមកពីប្រទេសចំនួន ៤០ បានធ្វើដំណើរមកផ្សព្វផ្សាយពីកិច្ចប្រជុំរវាងកូរ៉េខាងជើងនិងសហរដ្ឋអាមេរិកក្នុងរដ្ឋធានីហាណូយ ៕
ប្រភព ៖ bizhub
ចែករំលែកព័តមាននេះ