រដ្ឋធានីវ៉ាស៊ីនតោន ៖ យោងតាមសេចក្តីរាយការណ៍របស់ភ្នាក់ងារសារព័ត៌មាន Reuters កាលពីថ្ងៃទី២៧ កុម្ភៈ កន្លងមកបានឲ្យដឹងថា ប្រធានអ្នកចរចាពាណិជ្ជកម្មរបស់លោកប្រធានាធិបតី ដូណាល់ ត្រាំ (Donald Trump) បានប្រាប់ដល់តំណាងរាស្ត្រកាលពីថ្ងៃពុធ កន្លងមកថា សហរដ្ឋអាមេរិកត្រូវតែរក្សាការគម្រាមកំហែងពន្ធលើផលិតផលចិនជាច្រើនឆ្នាំខាងមុខទៀត បើទោះជាប្រទេសចិន និងសហរដ្ឋអាមេរិកអាចសម្រេចបានកិច្ចព្រមព្រៀងមួយដែលបញ្ចប់សង្គ្រាមពាណិជ្ជកម្មពិតមែនក្តី ។
អ្នកតំណាងផ្នែកពាណិជ្ជកម្មអាមេរិកគឺលោក Robert Lighthizer បានព្រមានថា នៅមានកិច្ចការច្រើនទៀតដែលត្រូវធ្វើដើម្បីអាចសម្រេចកិច្ចព្រមព្រៀងពាណិជ្ជកម្មរវាងសហរដ្ឋអាមេរិកនិងប្រទេសចិនដូចជាការព្រមព្រៀងគ្នាលើវិធីអនុម័តជាដើម ។
គួរបញ្ជាក់ដែរថា ប្រទេសទាំងពីរបានដាក់ពន្ធលើផលិតផលគ្នាទៅវិញទៅមក ដែលបានបង្កការប៉ះពាល់ដល់ទីផ្សារហិរញ្ញវត្ថុ ខ្សែសង្វាក់ផ្គត់ផ្គង់សម្រាប់ផលិតកម្ម និងការនាំចេញកសិផលអាមេរិកជាដើម ។
លោក Lighthizer បាននិយាយថា អ្នកតំណាងផ្នែកពាណិជ្ជកម្មអាមេរិកបានចេញសកម្មភាពដើម្បីអនុវត្តការសម្រេចចិត្តរបស់លោកប្រធានាធិបតីត្រាំក្នុងការពន្យាពេលការបង្កើនពន្ធលើផលិតផលចិន ២០០ប៊ីលានដុល្លារហើយ ។ ប៉ុន្តែមិនយូរប៉ុន្មាន អ្នកតំណាងពាណិជ្ជកម្មអាមេរិកនេះបានបញ្ជាក់ក្នុងសេចក្តីថ្លែងការណ៍មួយថាពួកគេមិនបោះបង់ចោលការគម្រាមកំហែងបង្កើនពន្ធពី១០%ទៅ២៥%ទេ ។
លោក Lighthizer បានបន្ថែមថាភាគីទាំងពីរនៅត្រូវការពេលច្រើនទៀតដើម្បីអាចដោះស្រាយបញ្ហាពាណិជ្ជកម្មបាន ហើយពន្ធនៅបន្តជាឧបករណ៍ដ៏សំខាន់ក្នុងការជំរុញឲ្យប្រទេសចិនធ្វើកំណែទម្រង់គោលនយោបាយដូចដែលបានទាមទារដោយលោកប្រធានាធិបតីត្រាំ និងតំណាងរាស្ត្រដទៃ ៕
ប្រភព ៖ reuters
ចែករំលែកព័តមាននេះ