រាជធានីភ្នំពេញ ៖ ក្រុមលោកកឹម សុខា បានបង្ហាញជំហរការរក្សាភាពស្ងៀមស្ងាត់ក្នុងគោលបំណងចង់ឲ្យមានការផ្សះផ្សាជាតិដែលខុសពីក្រុមលោកសម រង្ស៊ី ធ្វើការញុះញង់ចាក់រុក លាបពណ៌ ដើម្បីឲ្យក្រុមកាន់អំណាចឆ្លើយតបរហូតមានការចាប់ខ្លួន ។…
រាជធានីភ្នំពេញ ៖ ក្រុមលោកកឹម សុខា បានបង្ហាញជំហរការរក្សាភាពស្ងៀមស្ងាត់ក្នុងគោលបំណងចង់ឲ្យមានការផ្សះផ្សាជាតិដែលខុសពីក្រុមលោកសម រង្ស៊ី ធ្វើការញុះញង់ចាក់រុក លាបពណ៌ ដើម្បីឲ្យក្រុមកាន់អំណាចឆ្លើយតបរហូតមានការចាប់ខ្លួន ។
លោក អ៊ុំ តារាវុទ្ធី (Um Daravuthy) អតីតមន្ត្រីជាន់ខ្ពស់គណបក្សសង្គ្រោះជាតិដែលមាននិន្នាការនយោបាយគាំទ្រលោក កឹម សុខា បានលើកឡើងបណ្តាញសង្គមយ៉ាងដូច្នេះថា «ការរក្សាភាពស្ងប់ស្ងាត់ ដើម្បីដោះស្រាយរវាងខ្មែរ និងខ្មែរ» ។ លោកបានលើកឡើងទៀតថា គួរពិចារណាមានអ្នកនយោបាយខ្មែរមួយក្រុមនិយម (ក្រុមសម រង្ស៊ី) បង្កើតព្រឹត្តិការណ៍ឥតឈប់ឈរប្រើវោហារចាក់ចោទចងកំហឹងលាបពណ៌ឆ្លើយឆ្លងនាំជម្លោះធ្វើឲ្យក្រុមមានអំណាចខឹង ប្រឹងទប់ទល់ឆ្លើយតបចោទចាប់ចងវៃបករហូតចង់ឈប់ឆ្លើយ ។
លោកបានបញ្ជាក់ថា «ឯក្រុមយើងមិនសូវនិយាយស្តីមិនឈ្លោះមិនឆ្លើយមិនឆ្លងមិនបង្ករឿង មិនមួលបង្កាច់មិនលាបពណ៌មិនចាក់ដោតមិនយកខ្មែរណាជាសត្រូវចង់ឲ្យមានការបង្រួបបង្រួមជាតិខាំមាត់សង្កត់ចិត្តនៅរួមរស់ជាមួយខ្មែរតាមគោលការណ៍អហិង្សាខ្មែរតែមួយបែរជាមានអ្នកខ្លះចាក់ដោតចង់ឲ្យយើងលោតចោទយើងថា គ្មានគោលជំហរចាំស៊ីឡាក សម្ងំស្ងៀម…» ។ លោកគូសបញ្ជាក់ទៀតថា «យើងចង់សួរថា តើគេចង់ឲ្យយើងទូងស្គរបង្កជម្លោះ ដើម្បី ដណ្តើមឈ្មោះយកឈ្នះចាញ់ខ្មែរគ្នាឯងធ្វើឲ្យប៉ះពាល់ដល់សង្គមជាតិការផ្សះផ្សារជាតិឬ ? អ្នកបង្កើតព្រឹត្តិការណ៍ចាក់ដោតចោទថា ញុះញង់ ។
អ្នកចង់រក្សាស្ថិរភាពចង់ដោះស្រាយបញ្ហាខ្មែរចង់ផ្សះផ្សារជាតិមិនឆ្លើយឆ្លងថា គ្មានគោលជំហរ ។ ការរក្សាភាពស្ងប់ស្ងាត់មិនប្រទូសសរ៉ាយ ដើម្បីរកដំណោះស្រាយរវាងខ្មែរ និងខ្មែរ ហ្នឹងហើយជាគោលជំហររបស់យើង»។ អតីតមន្ត្រីបក្សប្រឆាំងរូបនេះក៏បានលើកឡើងថាលោកកឹម សុខា ប្រធានគណបក្សសង្គ្រោះជាតិលោកមានគោលជំហរនយោបាយច្បាស់លាស់រៀងរហូតមកដោយមិនមែនដូចអ្នកដែលមួលបង្កាច់ចោទលោកនោះទេ ។
លោកបន្តថា ប្រធានកឹម សុខា និងសហការីក៏ដូចជា អ្នកគាំទ្ររបស់គាត់តែងតែបញ្ជាក់ជារឿយៗមកហើយគឺ លោកប្រធានមានចក្ខុវិស័យច្បាស់លាស់ គឺរក្សាការពារអធិបតេយ្យ បូរណភាពទឹកដី ឯករាជ្យភាពជាតិភាពមិនរណបបរទេសមិនបម្រើផលប្រយោជន៍បរទេសណាធ្វើឲ្យបាត់បង់ផលប្រយោជន៍ខ្មែរជាដាច់ខាត ។ លោកបន្ថែមថា តម្កល់ផលប្រយោជន៍ជាតិខ្មែរជាធំមិនធ្វើឲ្យខ្មែរឈឺចាប់ដោយមិនរើសអើងមិនយកខ្មែរណាធ្វើជាសត្រូវ និងមិនគុំកួនសងសឹកដោះស្រាយបញ្ហាដោយអហិង្សា និងសន្តិវិធីរវាងខ្មែរ និងខ្មែរ ។ លោកបញ្ជាក់បន្ថែមថា «យកមាតុភូមិកម្ពុជាជាមូលដ្ឋានរស់នៅ និងជាទីតាំងនយោបាយដោយចូលរួមរក្សាការពារ ដើម្បីសេចក្តីសុខ និងសន្តិភាពសម្រាប់ខ្មែរទាំងអស់គ្នា ។ ផ្សះផ្សា និងបង្រួបបង្រួមឯកភាពជាតិ»។ ជាមួយគ្នានោះដែរលោកតារាវុទ្ធី ក៏បានចំអកទៅកាន់ក្រុមលោកសម រង្ស៊ី យ៉ាងដូច្នេះថា បុគ្គលខ្លះដឹងហើយតែធ្វើមិនដឹងគួរកុំមួលបង្កាច់ ប៉ុន្តែគប្បីរួមគ្នាគិត និងរួមគ្នាដោះស្រាយបញ្ហារបស់ជាតិ និងប្រជាពលរដ្ឋ ៕
ចែករំលែកព័តមាននេះ