ប្រទេសថៃ៖ យោងតាមភ្នាក់ងារសារព័ត៌មាន Bangkok Post បានឲ្យដឹងថា រដ្ឋមន្ត្រីពាណិជ្ជកម្មថៃបានប្រាប់ថា ការបោះឆ្នោតក្នុងដៃគូសន្ទនាកិច្ចព្រមព្រៀងដៃគូពាណិជ្ជកម្មសេដ្ឋកិច្ចស៊ីជម្រៅក្នុងតំបន់ (RCEP) ដែលរួមមានប្រទេសថៃ ឥណ្ឌូនេស៊ី…
ប្រទេសថៃ៖ យោងតាមភ្នាក់ងារសារព័ត៌មាន Bangkok Post បានឲ្យដឹងថា រដ្ឋមន្ត្រីពាណិជ្ជកម្មថៃបានប្រាប់ថា ការបោះឆ្នោតក្នុងដៃគូសន្ទនាកិច្ចព្រមព្រៀងដៃគូពាណិជ្ជកម្មសេដ្ឋកិច្ចស៊ីជម្រៅក្នុងតំបន់ (RCEP) ដែលរួមមានប្រទេសថៃ ឥណ្ឌូនេស៊ី ហ្វីលីពីន និងអូស្ត្រាលី មិនអាចប៉ះពាល់ដល់ការចរចាពាណិជ្ជកម្មក្នុងតំបន់ទេ ។
អ្នកស្រី Chutima Bunyapraphasara ដែលជារដ្ឋមន្ត្រីពាណិជ្ជកម្មស្តីទីរបស់ប្រទេសថៃបាននិយាយថា សមាជិកទាំងអស់ប្តេជ្ញាសម្រេចការចរចាលើ RCEP ក្នុងឆ្នាំនេះដូចដែលបានគ្រោងទុក ។
អ្នកស្រីបាននិយាយថា «បន្ទាប់ពីមានការពន្យាពេលអស់៧ឆ្នាំមក ប្រទេសជាសមាជិកទាំងអស់បានយល់ព្រមថា ការចរចាគួរតែត្រូវបានបញ្ចប់ក្នុងឆ្នាំនេះ ។ ការពន្យាពេលបន្ថែមនឹងមិនល្អសម្រាប់សមាជិកទេ ជាពិសេសខណៈដែលមានការអន់ថយសេដ្ឋកិច្ចជុំវិញពិភពលោក និងបរិស្ថានពាណិជ្ជកម្មដែលគ្មានលំនឹងនេះ» ។
អ្នកស្រីបានជួបជាមួយនឹងរដ្ឋមន្ត្រីពាណិជ្ជកម្មឥណ្ឌាកាលពីសប្តាហ៍មុនដែលបានបញ្ជាក់ថាប្រទេសឥណ្ឌានឹងគាំទ្រប្រទេសថៃដែលជាប្រធានកិច្ចប្រជុំអាស៊ានក្នុងឆ្នាំនេះដើម្បីសម្រេចការចរចាពាណិជ្ជកម្មក្នុងតំបន់នៅចុងឆ្នាំ។
អ្នកស្រីបានបន្តទៀតថា «ប្រទេសឥណ្ឌានិងមានការបោះឆ្នោតមួយក្នុងខែមេសា ហើយនឹងមានរដ្ឋាភិបាលថ្មីក្នុងខែមិថុនាផងដែរ ។ ប៉ុន្តែរដ្ឋមន្ត្រីឥណ្ឌាបានបញ្ជាក់សាជាថ្មីថាពួកគេនឹងចូលរួមក្នុងការចរចាលើកិច្ចព្រមព្រៀង RCEP ព្រោះប្រទេសឥណ្ឌាមានចំណាប់អារម្មណ៍លើអត្ថប្រយោជន៍នៃកិច្ចព្រមព្រៀងពាណិជ្ជកម្មនេះ»។
គួរបញ្ជាក់ដែរថា RCEP បានចាប់ផ្តើមក្នុងខែវិច្ឆិកាឆ្នាំ ២០១២ ដែលមានគោលដៅពង្រឹងកិច្ចសហប្រតិបត្តិការសេដ្ឋកិច្ចរវាងសមាជិកអាស៊ានទាំង ១០ និងដៃគូសន្ទនាអាស៊ានទាំង ៦ ទៀតដូចជាប្រទេសចិន ជប៉ុន កូរ៉េខាងត្បូង អូស្ត្រាលី ឥណ្ឌា និងនូវែលសេឡង់ជាដើម ។
រដ្ឋមន្ត្រីពាណិជ្ជកម្ម RCEP នឹងជួបគ្នានៅប្រទេសកម្ពុជានាថ្ងៃសៅរ៍ដើម្បីរៀបចំគម្រោងនិងគោលដៅក្នុងការបញ្ចប់កិច្ចចរចាក្នុងឆ្នាំនេះ ។
អ្នកស្រី Chutima បានបន្ថែមទៀតថា សមាជិកកិច្ចព្រមព្រៀងបានព្រមព្រៀងគ្នាលើបញ្ហាចំនួន ៧ ហើយ ប៉ុន្តែបញ្ហាទាំង ១៣ ទៀតដែលនៅមិនទាន់ដោះស្រាយរួមមានការចូលទីផ្សារផលិតផលនិងសេវាកម្ម ព្រមទាំងការវិនិយោគផងដែរ ៕
ប្រភព ៖ Bangkok Post
ចែករំលែកព័តមាននេះ