រាជធានីភ្នំពេញ ៖ បុរសម្នាក់បើកបរម៉ូតូមួយគ្រឿងក្នុងល្បឿនយ៉ាងហើយជិះបញ្ច្រាសទិសដៅចរាចរណ៍មិនបានប្រយ័ត្នក៏ទៅបុកបង្គោលភ្លើង បណ្តាលអោយដួលបាក់កបែកក្បាលភ្លាមៗនៅនឹងកន្លែងកើតហេតុ ។
ហេតុការណ៍នេះបានកើតឡើងកាលពីវេលាម៉ោង១រំលងអាធ្រាត្រឈានចូលថ្ងៃទី២៨ ខែកុម្ភៈ ឆ្នាំ២០១៩ តាមបណ្តោយផ្លូវជាតិលេខ៦ នៅចំណុចមុខវត្តព្រែកលៀប ស្ថិតនៅក្នុងសង្កាត់ព្រែកលៀប ខណ្ឌជ្រោយចង្វារ ។
ជនរងគ្រោះដែលស្លាប់ឈ្មោះ សាន់ សារ៉ាក់ ភេទប្រុស អាយុ៣៥ឆ្នាំ មានទីលំនៅភូមិស្វាយចេក ឃុំព្រៃឈរ ស្រុកកំពង់ត្របែក ខេត្តព្រៃវែង ជាអ្នកបើកបរម៉ូតូមួយគ្រឿងម៉ាកFTR ពណ៌ខ្មៅ ពាក់ស្លាកលេខ ភ្នំពេញ ១CP-២៩៨៦ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញជនរងគ្រោះខាងលើបើកបរតាមបណ្តោយផ្លូវជាតិលេខ៦ ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើនេះ ស្រាប់តែមានរថយន្តមួយគ្រឿងម៉ាកឡង់គ្រីស្ស័រ ពណ៌ខ្មៅ មិនចាំស្លាកលេខ បើកបរស្របទិសដៅគ្នាជាមួយម៉ូតូក្នុងល្បឿនយ៉ាងលឿនដេញបុកម៉ូតូរបស់ជនរងគ្រោះ ។
ប្រភពដដែលបានបន្តថា ពេលនោះជនរងគ្រោះក៏ជ្រុលចង្កូតម៉ូតូបត់ទៅផ្លូវស្របមិនទាន់ ស្រាប់តែជិះម៉ូតូទៅបុកខឿនពុះចែកទ្រូងផ្លូវ រួចបុកបង្គោលភ្លើងពេញទំហឹង បណ្តាលអោយដួលបាក់កបែកក្បាលធ្លាយចេញខួរស្លាប់ភ្លាមៗនៅនឹងកន្លែងកើតហេតុជាប់នឹងជាមួយម៉ូតូ ចំណែករថយន្តម៉ាកឡង់គ្រីស្ស័រនោះបើកគេចបាត់ស្រមោល រីឯម៉ូតូរបស់ជនរងគ្រោះរងការខូចខាតបាក់កាំខាងមុខ ។ បន្ទាប់ពីកើតហេតុ សមត្ថកិច្ចមូលដ្ឋានក៏បានចុះមកដល់កន្លែងកើតហេតុ និងពិនិត្យមើលក្នុងខ្លួនរបស់ជនរងគ្រោះមានតែលុយ មិនមានលិខិតស្នាមអ្វីនៅជាប់ខ្លួនជនរងគ្រោះឡើយ ។
ក្រោយពេលកើតហេតុ សពជនរងគ្រោះត្រូវបានសមត្ថកិច្ចយកទៅតម្កល់នៅឯវត្តទឹកថ្លាដើម្បីរង់ចាំក្រុមគ្រួសារសាច់ញាតិមកទទួលយកទៅធ្វើបុណ្យទៅតាមប្រពៃណី រីឯម៉ូតូរបស់ជនរងគ្រោះវិញត្រូវបានសមត្ថកិច្ចយកទៅរក្សាទុកអោយនៅអធិការដ្ឋាននគរបាលខណ្ឌជ្រោយចង្វារ ៕
ចែករំលែកព័តមាននេះ