រាជធានីភ្នំពេញ ៖ មន្ទីរពេទ្យរ៉ូយ៉ាល់ភ្នំពេញ បានរៀបចំនូវសិក្ខាសាលាមួយបង្ហាញពីជំងឺឈឺក្បាលប្រកាំង ដែលកើតឡើងចំពោះមនុស្សជាច្រើន ក្នុងនោះប្រទេសកម្ពុជាក៏មានអ្នកជំងឺប្រភេទនេះច្រើនដែរ ។ សិក្ខាសាលាបង្ហាញនេះ ធ្វើឡើងកាលពីថ្ងៃទី២៣ កុម្ភៈ…
រាជធានីភ្នំពេញ ៖ មន្ទីរពេទ្យរ៉ូយ៉ាល់ភ្នំពេញ បានរៀបចំនូវសិក្ខាសាលាមួយបង្ហាញពីជំងឺឈឺក្បាលប្រកាំង ដែលកើតឡើងចំពោះមនុស្សជាច្រើន ក្នុងនោះប្រទេសកម្ពុជាក៏មានអ្នកជំងឺប្រភេទនេះច្រើនដែរ ។ សិក្ខាសាលាបង្ហាញនេះ ធ្វើឡើងកាលពីថ្ងៃទី២៣ កុម្ភៈ ២០១៩ នៅមន្ទីរពេទ្យរ៉ូយ៉ាល់ភ្នំពេញ ដោយមានអ្នកចូលរួមជាច្រើនផងដែរ ។
លោកវេជ្ជបណ្ឌិត Thanarat នាយករងមន្ទីរពេទ្យរ៉ូយ៉ាល់ភ្នំពេញ បានមានប្រសាសន៍ថា នៅក្នុងមន្ទីរពេទ្យរ៉ូយ៉ាល់ភ្នំពេញ តែងមានអ្នកជំងឺឈឺក្បាល ឬអ្នកជំងឺដែលពាក់ព័ន្ធនឹងខួរក្បាលមកស្វែងរកការព្យាបាលកាន់តែច្រើន ដូច្នេះហើយទើបមន្ទីរពេទ្យបានរៀបចំអោយមាននូវវគ្គបណ្ដុះបណ្ដាលចែករំលែកចំណេះដឹងពាក់ព័ន្ធនឹងជំងឺនេះដល់ពលរដ្ឋកម្ពុជា ក្នុងការទប់ស្កាត់ និងព្យាបាល កុំអោយជំងឺវិវត្តន៍កាន់តែខ្លាំងឡើង ។
លោកបន្តថា កន្លងមក អ្នកជំងឺគ្រាន់តែឈឺក្បាលសោះ បែរជាពួកគាត់ហោះទៅរកការព្យាបាលនៅប្រទេសជាច្រើន ដោយគិតថា ដុះសាច់ក្នុងខួរក្បាល និងត្រូវចំណាយប្រាក់ជាច្រើន ដូច្នេះហើយ វគ្គបណ្ដុះបណ្ដាលនេះ នឹងបង្ហាញដល់ពលរដ្ឋកម្ពុជា ពីចំណេះដឹងបន្ថែមទៀតផងដែរ ។
លោកវេជ្ជបណ្ឌិត Assawin Chomjit ឯកទេសប្រព័ន្ធប្រសាទនៃមន្ទីរពេទ្យ រ៉ូយ៉ាល់ភ្នំពេញ បានអោយដឹងថា ជំងឺឈឺក្បាលជាប្រចាំ អាចប៉ះពាល់ដល់ការរស់នៅប្រចាំថ្ងៃរបស់អ្នកជំងឺ ដោយសារពេលខ្លះវាឈឺខ្លាំងដែលអ្នកជំងឺស្ទើរតែទ្រាំមិនបាន ហើយបើសិនជាទុកវាកាន់តែយូរហើយវិវត្តន៍ទៅជាជំងឺស្ត្រូក ដែលធ្វើអោយពិបាកក្នុងការព្យាបាល ។
លោកបន្តថា អ្នកជំងឺក៏អាចមានវិធីសាស្ត្រក្នុងការព្យាបាលដោយខ្លួនគាត់បានដែរ ដូចជាស្វែងរកភេសជ្ជៈណាដែលអាចកាត់បន្ថយនូវភាពឈឺចាប់ដូចជាតែ កាហ្វេ ជាដើម ហើយអ្នកជំងឺនៅតែអាចធ្វើបានជាធម្មជាតិ ។ ជំងឺឈឺក្បាលប្រកាំងមិនបណ្ដាលអោយស្លាប់នោះទេ តែវាប៉ះពាល់ដល់ការរស់នៅ ពិបាកក្នុងការបំពេញការងារផ្សេងៗជាដើម ដូច្នេះហើយត្រូវការស្វែងរកការព្យាបាលជាមួយមន្ទីរពេទ្យណាក៏បានដែលមានជំនាញ ច្បាស់លាស់ ។
លោកវេជ្ជបណ្ឌិត Nanthasak Tisavipat ឯកទេសវះកាត់ប្រព័ន្ធប្រសាទ មកពីមន្ទីរពេទ្យ បាងកក បានអោយដឹងថា ជំងឺឈឺក្បាលជាប្រចាំនេះដែរ ក៏បណ្ដាលមកពីការដុះសាច់ក្នុងខួរក្បាលដែរ ដូច្នេះហើយត្រូវតែរកពេទ្យពិនិត្យមើល និងព្យាបានអោយបានទាន់ពេលវេលា ក្នុងពេលដុំសាច់នោះ មិនទាន់រីកធំ បើសិនជាទុកយូរៗទៅវានឹងរីកធំ ដែលធ្វើអោយពិបាកក្នុងការព្យាបាលរឺវះកាត់ ។
លោកបន្តថា ការឈឺក្បាលនៅពេលបច្ចុប្បន្ននេះ បណ្ដាលមកពីកត្តាមួយចំនួន ដូចជាបរិយាកាសដែលមានជាតិពុលច្រើន ការប្រើប្រាស់ទូរសព្ទច្រើន ជាក់ស្ដែងកាលពីមុនឱកាសនៃការកើតជំងឺនេះ មានតិចតួចប៉ុណ្ណោះ ប៉ុន្តែបច្ចុប្បន្ននេះឱកាសនៃការកើតជំងឺឈឺក្បាល បានកើតឡើងច្រើន ដោយសារតែការរស់នៅកាន់តែទំនើប ជាមួយនឹងបរិយាកាសកាន់តែមានធាតុពុលច្រើន ៕ ដោយសហការ
ចែករំលែកព័តមាននេះ