ពេជ្រ ថៃ និងឡុង លីគ័ង ជីវិតឡើងត្រដែត
- ភ្នំពេញ
រាជធានីភ្នំពេញ៖ ក្រោយពេលជាប់ជ័យលាភីកម្មវិធីThe Voice Kid ម្ចាស់ជ័យលាភីនៃកម្មវិធីThe Voice Kid រដូវកាលទី១ ពេជ្រ ថៃ…
រាជធានីភ្នំពេញ៖ ក្រោយពេលជាប់ជ័យលាភីកម្មវិធីThe Voice Kid ម្ចាស់ជ័យលាភីនៃកម្មវិធីThe Voice Kid រដូវកាលទី១ ពេជ្រ ថៃ និងឡុង លីងគ័ង ជីវភាពគ្រួសារបានលូតឡើងល្អប្រសើរ ។ ទាំងពេជ្រ ថៃ និងឡុង លីងគ័ង ត្រូវគេមើលឃើញថា អ្នកទាំងពីរបានបង្ហាញខ្លួនជាញឹកញាប់នៅលើឆាកតន្ត្រីរបស់ទូរទស្សន៍ហង្សមាសទាំងនៅក្នុងស្ទូឌីយោ និងតាមបណ្តាខេត្ត ផ្សេងៗ ។ ការបង្ហាញខ្លួនស្ទើរមិនដាច់រយៈពីតារាចម្រៀងវ័យទាំងពីររូបនេះគឺបង្ហាញថា ពួកគេអាចរកប្រាក់ចំណូលបានច្រើនគួរសមសម្រាប់ជីវភាពរស់នៅ ការផ្គត់ផ្គង់លើការសិក្សា ។
ក្មេងដែលចេញពីខេត្តបាត់ដំបង និងបានធំធាត់ដោយសារការមើលថែពីជីដូន ដោយឪពុកម្តាយចេញទៅប្រកបការងារនៅប្រទេសថៃ កុមារាពេជ្រ ថៃ បានប្រែក្លាយជាជីវភាពទៅជាប្រសើរឡើងមួយកម្រិត ក្រោយមានសមត្ថភាពប្រឡងជាប់កម្មវិធី The Voice Kid Cambodia រដូវកាលទី១ ។ ក្រោយពីបានប្រឡងជាប់សន្ទុះប្រជាប្រិយភាព របស់ម្ចាស់ជ័យលាភី The Voice Kids Cambodia រដូវកាលទី១ កុមារា ពេជ្រ ថៃ កាន់តែកើនឡើងជាលំដាប់ និងមិនដែលថយចុះនោះទេ ។
ទន្ទឹមនឹងប្រជាប្រិយភាពរបស់កុមារារូបនេះកាន់តែកើនឡើង មហាជនសង្កេតឃើញថា ជីវិតរបស់គេហាក់ផ្លាស់ប្តូរទាំងស្រុង មិនដូចពីមុននោះទេ ។ ជាក់ស្តែងកាលពីកន្លងទៅនេះ ពេជ្រ ថៃ បានធ្វើឲ្យមហាជន និងពិធីករនៅលើឆាក ភ្ញាក់ផ្អើលយ៉ាងខ្លាំង នៅពេលដែលឃើញ ពេជ្រ ថៃ ពាក់ចិញ្ចៀនពេជ្រ ឡើងច្រៀង ។ បន្ទាប់ពីឃើញពេជ្រ ថៃ ពាក់ចិញ្ចៀនពេជ្រមក ធ្វើឲ្យមហាជនដឹងថា នៅពេលនេះជីវភាពរបស់តារាវ័យក្មេងរូបនេះពិតជាឡើងខ្ពស់ ។
ជាការកត់សម្គាល់បើមើលពីតម្លៃខ្លួនដែលពេជ្រ ថៃ ឡើងឆាកច្រៀង ម្តងៗនោះ ត្រូវគេបង្ហើបឲ្យដឹងថា កុមាររូបនេះទទួលបានតម្លៃ នៅក្នុងមួយកម្មវិធីចាប់ពី៨០០ ទៅ១២០០ដុលា្លរឯណោះ ក៏ប៉ុន្តែនៅពេលដែលទៅតាមខេត្តឆ្ងាយៗ ពេជ្រ ថៃ អាចទទួលបានតម្លៃខ្លួនរហូតដល់១០០០ ទៅ១២០០ដុល្លារ ដែលតម្លៃនេះ សឹងតែប្រហែលតារា ល្បីៗ យូរឆ្នាំទៀតផង ។
ដោយឡែកសម្រាប់កុមារឡុង លីគ័ង វិញក៏ត្រូវបានគេមើលឃើញថា មានការផ្លាស់ប្តូរជីវិតគួរឲ្យកត់សម្គាល់ បន្ទាប់ពីទទួលជ័យលាភីក្នុងរដូវកាលទី១ជាមួយពេជ្រ ថៃ ។ ឡុង លីងគ័ង បានបង្ហាញវត្តមានច្រៀងលើឆាកតន្ត្រីរបស់ស្ថានីយទូរទស្សន៍ហង្សមាស ទាំងក្នុងរាជធានីភ្នំពេញ និងតាមបណ្តាខេត្តនានាផងដែរ ក្នុងពេលដែលកុមាររូបនេះក៏បានចេញបទចម្រៀង ថ្មីៗ ដូចពេជ្រ ថៃ ផងដែរ។
ឡុង លីងគ័ង្គ សព្វថ្ងៃរស់នៅស្រុកសំរោង ខេត្តតាកែវ មានបងប្អូនបីនាក់ ប្រុស២ ស្រី១ហើយគេជាកូនច្បងក្នុងគ្រួសារ ។ មុនពេលចូលសិល្បៈ ម្តាយរបស់ឡុង លីងគ័ង ធ្វើការរោងចក្រ និងឳពុកបើកឡានដឹកកម្មកររោងចក្រ ជីវភាពនៅពេលនោះមិនសូវជាធូរធារប៉ុន្មានទេ ។ ដូច្នេះឪពុកម្តាយរបស់លីគ័ងបានឆ្លៀតពេលធ្វើស្រែដើម្បីសម្រាលជីវភាពរស់នៅ ហើយលីគ័ង ជាអ្នកដឹកកណ្តាប់ស្រូវស្ទើរតែទាំងអស់ដោយសារតែឳពុកម្តាយរវល់ ។
កាលពីពេល ថ្មីៗកន្លងមកឡុង លីងគ័ង បានបញ្ជាក់ថា «ក្រោយពេលចប់ការប្រលង The Voice Kid Cambodia មានពុកម៉ែ អ៊ុំពូមីងបានស្គាល់ខ្ញុំ និងពេញចិត្តខ្ញុំជាច្រើន ទើបធ្វើឲ្យរូបខ្ញុំបាទមានការងារដែលអាចរកប្រាក់ចំណូលជួយក្នុងគ្រួសារមួយផ្នែកធំ ។ សព្វថ្ងៃការងារក្នុងវិស័យសិល្បៈរាងរវល់គួរសមដែរ ដូចជាការសម្តែងតាមខេត្ត និងនៅរាជធានីភ្នំពេញ តែមិនប៉ះពាល់ដល់ការសិក្សារបស់ខ្ញុំទេព្រោះភាគច្រើនច្រៀងតែសៅរ៍ និងអាទិត្យ ។ ជាក់ស្តែងខ្ញុំនៅតែទទួលបានលេខ១នៅក្នុងថ្នាក់រៀនដោយសារតែខ្ញុំបែងចែកពេលវេលាច្រៀង និងរៀនបានច្បាស់លាស់ ។
ងាកមកចម្រៀងវិញសព្វថ្ងៃខ្ញុំបានចេញបទចម្រៀងចំនួន២បទហើយ នៅក្នុងផលិតកម្មរស្មីហង្សមាស គឺបទ«ស្នេហ៍ហ្មរដំរី និងបទ «ក្រោយពេលដែលតាបានឃ្លាតទៅឆ្ងាយ» ។នៅមានបទចម្រៀងជាច្រើនទៀតដែរជិតនឹងចេញ ព្រមទាំងបទបែប សប្បាយៗដើម្បីអបអរបុណ្យចូលឆ្នាំប្រពៃណីជាតិផងដែរ »។
តាមរយៈសកម្មភាពនៅក្នុងវិស័យសិល្បៈនេះពិតជាបានបង្ហាញថា ចំណូលពីសិល្បៈរបស់ឡុង លីគ័ង អាចទទួលបានកម្រិតមួយខ្ពស់ ពោលមិនចាញ់ពេជ្រ ថៃ ទេបើទោះបីជាគេមិនអាចបញ្ចេញឲ្យដឹងតម្លៃខ្លួនពេលឡើងច្រៀង ម្តងៗក៏ដោយ ៕
ចែករំលែកព័តមាននេះ