ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ (Donald Trump) បាននិយាយថា លោកនឹងពន្យារពេលការបង្កើនពន្ធលើផលិតផលចិន ព្រោះតែការចរចាពាណិជ្ជកម្មកំពុងតែដំណើរការយ៉ាងរលូន ហើយលោកនិងលោកប្រធានាធិបតីស៊ី…
ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ (Donald Trump) បាននិយាយថា លោកនឹងពន្យារពេលការបង្កើនពន្ធលើផលិតផលចិន ព្រោះតែការចរចាពាណិជ្ជកម្មកំពុងតែដំណើរការយ៉ាងរលូន ហើយលោកនិងលោកប្រធានាធិបតីស៊ី ជិនពីង (Xi Jinping) របស់ប្រទេសចិន នឹងជួបគ្នាដើម្បីសម្រេចកិច្ចព្រមព្រៀងជាផ្លូវការផងដែរ ប្រសិនបើដំណើរការចរចានៅតែទៅមុខដោយរលូនល្អ ។ នេះបើតាមការចេញផ្សាយពីទីភ្នាក់ងារសារព័ត៌មាន Reuters កាលពីថ្ងៃទី២៤ កុម្ភៈ កន្លងមក ។
សេចក្តីប្រកាសនេះ គឺសញ្ញាដ៏ច្បាស់បង្ហាញថា ប្រទេសចិននិងសហរដ្ឋអាមេរិកកាន់តែខិតជិតក្នុងការសម្រេចបានកិច្ចព្រមព្រៀងមួយហើយដើម្បីបញ្ចប់សង្គ្រាមពាណិជ្ជកម្មដែលបានប៉ះពាល់ដល់ការលូតលាស់សេដ្ឋកិច្ច និងទីផ្សារជុំវិញពិភពលោក។
លោកប្រធានាធិបតីត្រាំមានគម្រោងបង្កើនពន្ធពី១០ទៅ២៥%លើផលិតផលចិនប្រមាណ ២០០ប៊ីលានដុល្លារ ប្រសិនបើប្រទេសទាំងពីរមិនអាចសម្រេចកិច្ចព្រមព្រៀងបាននៅថ្ងៃសុក្រទេ ។
លោកប្រធានាធិបតីខាងលើបាននិយាយលើ Twitter ថា ការចរចាលើបញ្ហាសំខាន់ៗដូចជាការការពារកម្មសិទ្ធិបញ្ញា ការផ្ទេរបច្ចេកវិទ្យា កសិកម្ម សេវាកម្ម និងរូបិយវត្ថុបានដំណើរការទៅយ៉ាងរលូន ។
យ៉ាងណាក្តី លោក Scott Kennedy ដែលជាអ្នកជំនាញផ្នែកប្រទេសចិននៅមជ្ឈមណ្ឌលយុទ្ធសាស្ត្រនិងសិក្សាអន្តរជាតិនៅរដ្ឋធានីវ៉ាស៊ីនតោនបាននិយាយថា ៖« ពួកយើងមិនទាន់ច្បាស់នៅឡើយទេថាវាគឺជាការបរាជ័យឬជោគជ័យព្រោះពួកយើងមិនទាន់ដឹងពីព័ត៌មានលម្អិតដែលកំពុងត្រូវបានចរចាឡើយ។ ប៉ុន្តែ… ការពន្យារពេលចរចាប៉ុន្មានសប្តាហ៍ទៀតគឺជាអ្វីដែលប្រទេសចិនចង់បាន។ មកដល់ពេលនេះ សហរដ្ឋអាមេរិកប្រហែលជាទទួលបានអ្វីដែលពួកគេអាចទាមទារពីប្រទេសចិនហើយ »។
លោក Tai Hui អ្នកយុទ្ធសាស្ត្រទីផ្សារនៅ J.P. Morgan Asset Management បាននិយាយថា ការសម្រេចចិត្តនេះបង្ហាញថាភាគីទាំងសងខាងចង់ដោះស្រាយជម្លោះ និងបានបន្ថែមថា ការបង្កើនពន្ធនឹងជំរុញដល់ការព្រួយបារម្ភពីការលូតលាស់ក្នុងសហរដ្ឋអាមេរិកផងដែរ ៕
ចែករំលែកព័តមាននេះ