ខេត្តព្រះសីហនុ ៖ តាមសេចក្តីរាយការណ៍ព័ត៌មានបឋមបានឱ្យដឹងថា រថយន្តដឹកទូកុងតឺន័រមួយគ្រឿងបើកបរពីខេត្តព្រះសីហនុទៅភ្នំពេញក្នុងល្បឿនលឿន ស្រាប់តែរថយន្តរេចង្កូតប៊ិះធ្លាក់ចេញពីផ្លូវជាតិ ស្របពេលនោះអ្នកបើកបរទាញចង្កូតមកវិញ ធ្វើឱ្យរថយន្តក្រឡាប់ជាច្រើនត្រឡប់ធ្លាក់ទូកុងតឺន័រទៅលើចិញ្ចឹមផ្លូវក្រួសក្រហម ចំណែកឯក្បាលរថយន្តធ្លាក់ចេញពីផ្លូវ រីឯកន្ទុយរថយន្តនៅលើចិញ្ចើមផ្លូវ បណ្តាលឱ្យអ្នកបើកបរកៀបជាប់ក្នុងកាប៊ីនស្លាប់ ។
ហេតុការណ៍ខាងលើនេះបានកើតឡើងកាលពីវេលាម៉ោង១១និង២៥នាទីយប់ថ្ងៃទី២៥ កុម្ភៈ ឆ្នាំ២០១៩ លើដងផ្លូវជាតិលេខ៤ ចន្លោះគីឡូម៉ែត្រលេខ១៦៨-១៦៩ ភូមិតាពៅ ឃុំតានៃ ស្រុកព្រៃនប់ ខេត្តព្រះសីហនុ ។
រថយន្តដឹកទូកុងតឺន័រម៉ាកហ្វុ៊យសូ ពណ៌ត្រួយចេកចាស់ ពាក់ស្លាកលេខ ភ្នំពេញ ៣A-៤៨៧៣ បើកបរដោយឈ្មោះមុត សុភូមិ ភេទប្រុស អាយុ២៤ឆ្នាំ មុខរបរអ្នកបើកបររថយន្ត មានទីលំនៅភូមិពង្រធំ ឃុំការហែង ស្រុកសំរោងទង ខេត្តកំពង់ស្ពឺ បានស្លាប់កៀបជាប់ក្នុងកាប៊ីន ។
ក្រោយពេលកើតហេតុ កំលាំងស្នាក់ការ៤០១ចំនួន២នាក់ សហការជាមួយកំលាំងអធិការស្រុកព្រៃនប់ បានចុះទៅសំរួលចរាចរណ៍ដើម្បីបញ្ធៀសការកកស្ទះ ហើយកំពុងគាស់កាប៊ីនរថយន្តដើម្បីយកសពជនរងគ្រោះចេញ និងស្វែងរកសាច់ញាតិជនរងគ្រោះដើម្បីមកទទួលយកទៅធ្វើបុណ្យតាមប្រពៃណី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ