ទីក្រុងឡុងដ៍៖ ចារ.កអង់គ្លេសម្នាក់បាននិយាយប្រាប់ភ្នាក់ងារសារព័ត៌មាន Reuters កាលពីថ្ងៃចន្ទ កន្លងមកថា ប្រទេសលោកខាងលិចត្រូវតែយល់ដឹងថា ឧបសគ្គដែលបង្កឡើងពីបដិវត្ដបច្ចេកវិទ្យារបស់ប្រទេសចិនមានច្រើនជាងបញ្ហា Huawei ទាក់ទិននឹងការលួចកម្មសិទ្ធិបញ្ញា និងការធ្វើចារកម្មទៅទៀត ។
គួរបញ្ជាក់ផងដែរថា ក្រុមហ៊ុន Huawei ត្រូវបានរិះគន់យ៉ាងខ្លាំងបន្ទាប់ពីសហរដ្ឋអាមេរិកបានប្រាប់ដល់សម្ព័ន្ធមិត្តរបស់ខ្លួនមិនឲ្យប្រើបច្ចេកវិទ្យារបស់ក្រុមហ៊ុននេះព្រោះវាអាចត្រូវបានប្រើប្រាស់សម្រាប់ការធ្វើចារកម្មដោយប្រទេសចិន ។
លោក Jeremy Fleming ដែលជាប្រធានការិយាល័យទំនាក់ទំនងរដ្ឋាភិបាលរបស់អង់គ្លេស (GCHQ) បាននិយាយថាការផ្លាស់ប្តូរផ្នែកបច្ចេកវិទ្យាក្នុងល្បឿនលឿនកំពុងតែបង្កឲ្យមានភាពមិនប្រាកដប្រជា អស្ថេរភាព និងហានិភ័យផងដែរ ។
លោក Fleming បាននិយាយនៅសិង្ហបុរីថា «បញ្ហាផ្នែកយុទ្ធសាស្ត្រនៃគោលជំហររបស់ប្រទេសចិនក្នុងជំនាន់បច្ចេកវិទ្យាសកលគឺមានធំជាងក្រុមហ៊ុនឧបករណ៍ទូរគមនាគមន៍មួយទៀត»។
សហរដ្ឋអាមេរិកមានការព្រួយបារម្ភថាការគ្រប់គ្រងបច្ចេកវិទ្យា 5G អាចនឹងអនុញ្ញាតឲ្យដៃគូប្រកួតប្រជែងដូចជាប្រទេសចិនទទួលបានអត្ថប្រយោជន៍ដែលសហរដ្ឋអាមេរិកមិនទាន់ត្រៀមខ្លួនទទួលយក ។
លោក Fleming បានបន្តថា បច្ចេកវិទ្យា 5G អនុញ្ញាតឲ្យមានការផ្ទេរទិន្នន័យក្នុងល្បឿនលឿនជាងមុន ហើយវាបានក្លាយជាមូលដ្ឋានដ៏សំខាន់របស់វិស័យជាច្រើន ។ លោកបានបន្ថែមថា «5G នឹងស្ថិតក្នុងចំណោមបច្ចេកវិទ្យាដែលសំខាន់និងមានឥទ្ធិពលច្រើនជាងគេក្នុងជំនាន់នេះនិងជំនាន់ផ្សេងៗ»។
លោកបានបន្តថា លោកចង់ឲ្យអ្នកផ្គត់ផ្គង់មានភាពចម្រុះ ។ លោកបាននិយាយទៀតថា ទីផ្សារដែលមិនមានជម្រើសច្រើនគឺមិនល្អសម្រាប់សន្តិសុខប្រព័ន្ធអ៊ីនធើណែតទេ មិនថាជម្រើសទាំងនោះជាអ្នកផ្គត់ផ្គង់ពីលោកខាងលិច ចិន ឬពីទីណាក៏ដោយ ៕
ប្រភព ៖ Reuters
ចែករំលែកព័តមាននេះ