ខេត្តក្រចេះ ៖ ទីតាំងអាជីវកម្មរ៉ែមាសទាំងតូចទាំងធំជាច្រើនកន្លែង សុទ្ធសឹងជាកម្មសិទ្ធិរបស់ប្រជាពល
រដ្ឋក្នុងភូមិដែលស្ថិតនៅតំបន់ជាប់បរិវេណក្រុមហ៊ុនវិនិយោគរ៉ែរបស់ចិន ក្នុងស្រុកសំបូរ បានត្រូវបោសសម្អាតគ្មានសល់ក្នុងប្រតិបត្តិការបង្ក្រាបទ្រង់ទ្រាយធំមួយពីសំណាក់ក្រុមមន្ត្រីជំនាញដែលមានរយៈពេលល៣ថ្ងៃជាប់គ្នាកន្លងទៅ ។ នេះបើតាមការអះអាងរបស់មន្ត្រីនៃមន្ទីររ៉ែនិងថាមពលខេត្ត ។
ប្រធានមន្ទីររ៉ែនិងថាមពលខេត្ត លោក សុខ គីរីរ័ត្ន បានថ្លែងឲ្យដឹងនៅថ្ងៃទី២៥ ខែកុម្ភៈថា ប្រតិបត្តិការរបស់មន្ត្រីជំនាញថ្នាក់ខេត្ត និងក្រសួង ដឹកនាំដោយលោកអភិបាលរងខេត្ត និងក្រោមការសម្របសម្រួលពីស្ថាប័នអយ្យការអមសាលាដំបូងខេត្ត បានធ្វើឡើង៣ថ្ងៃជាប់ៗគ្នាគឺចាប់ពីថ្ងៃទី២១ដល់ថ្ងៃទី២៣ ខែកុម្ភៈ កន្លងទៅ ។ មានទីតាំងរ៉ែតូចធំជាច្រើនកន្លែងដែលអាជ្ញាធរកំណត់ថា ជាទីតាំងធ្វើអាជីវកម្មខុសច្បាប់ ដែលលួចធ្វើអាជីវកម្មនៅតំបន់ព្រៃរ៉ែ ក្នុងភូមិអូរត្រូន ឃុំក្បាលដំរី ស្រុកសំបូរ ត្រូវបានធ្វើការកម្ទេចនិងបោសសម្អាតគ្មានសល់ឡើយ ។
លោកប្រធានមន្ទីរអះអាងថា ប្រតិបត្តិការលើកនេះ អាជ្ញាធរមានវិធានការធ្ងន់ជាងកាលពី លើកមុន ដោយបានប្រើគ្រឿងចក្រកាយដីលុបរណ្តៅទៅជាមួយនឹងការបំផ្លាញរោងសិប្បកម្ម ក្នុងនោះមាន រណ្តៅរ៉ែមាសធំៗជិត១០រណ្តៅត្រូវបានកម្ទេច និងបានឈូសពង្រាយស្រះទឹកតូចៗដែលគេរក្សាទឹកទុកធ្វើសកម្មភាពកិនដីនិងថ្មរ៉ែ បានចំនួន១២ស្រះ ។ ធ្វើការឈូសពង្រាបពំនូកដីរ៉ែបានចំនួន២០ពំនូក និងធ្វើកិច្ចសន្យាជាមួយនឹងម្ចាស់ទីតាំងអាជីវកម្មរ៉ែ ដោយទុករយៈពេល១សប្តាហ៌ឲ្យពួកគាត់បញ្ឈប់សកម្មភាពធ្វើអាជីវកម្មរ៉ែខុសច្បាប់ និងព្រមធ្វើការរុះរើសម្ភារដែលបម្រើឲ្យការធ្វើអាជីវកម្មខុសច្បាប់ទាំងនោះចេញដោយខ្លួនឯង ។
ក្រុមអាជ្ញាធរបានឲ្យដឹងទៀតថា នាអំឡុងពេលប្រតិបត្តិការរបស់ក្រុមមន្ត្រីជំនាញដែលបានប្រើវិធានការធ្ងន់ជាងកាលពីមុនៗនោះ ក៏មានការព្យាយាមចេញមករារាំងសកម្មភាពបង្ក្រាបរបស់មន្ត្រីជំនាញពីសំណាក់ម្ចាស់រណ្តៅក៏ដូចជាក្រុមកម្មករមួយចំនួនដែរ តែបើទោះជាបែបណាឆន្ទៈក្នុងការបង្ក្រាបគឺនៅតែអាចធ្វើទៅបាន ។ លោក សុខ គីរីរ័ត្ន បានអះអាងថា បើទោះបីជាស្ថានភាពនៃការបង្ក្រាបបានធូរស្រាលយ៉ាង ណាក្តី តែលោកបានចាត់ឲ្យមន្ត្រីក្រសួង និងមន្ត្រីមន្ទីរ នៅប្រចាំការបន្តឃ្លាំមើលសកម្មភាពជីករ៉ែធ្វើអាជីវកម្មខុសច្បាប់នេះ ដើម្បីមានវិធានការបង្ក្រាបបន្ត ។
មានប្រភពព័ត៌មានខ្លះបង្ហើបថា ប្រតិបត្តិការចុះបង្ក្រាបនេះ គឺអាជ្ញាធរមានសមត្ថកិច្ចធ្វើឡើងទៅតាមពាក្យបណ្តឹរបស់ក្រុនហ៊ុនវិនិយោគរ៉ែមាសរបស់ចិនមួយឈ្មោះ«សិងយ័នគ័ងយិ» ដែលបានប្តឹងទាមទារឲ្យអាជ្ញាធរចុះបង្ក្រាបអាជីវកម្មរ៉ែអនាធិបតេយ្យរបស់ពលរដ្ឋដែលកំពុងកើតមាននៅក្នុងតំបន់របស់ក្រុមហ៊ុន ។ ប៉ុន្តែបើតាមពលរដ្ឋរស់នៅតំបន់នោះនិយាយថា ការធ្វើអាជីវកម្មរ៉ែរបស់ពួកគាត់គឺធ្វើឡើងតៗគ្នាជាយូរយារណាស់មកហើយ ពោលគឺតាំងពីមុនក្រុមហ៊ុនចិនមកវិនិយោគម្លេ៉ះ ។
ពលរដ្ឋបានលើកឡើងទៀតថា ពួកគាត់រស់នៅតំបន់នេះតាំងពីដើមរៀងមក គ្មានរបរអ្វី ក្រៅពីការធ្វើរ៉ែមាសនេះទេ ។ ការធ្វើអាជីវកម្មរបស់ពួកគាត់ គឺជាលក្ខណៈគ្រួសារនៅក្រោយផ្ទះក្បែរៗភូមិតែប៉ុណ្ណោះ ។ ពួកគាត់និយាយថា សកម្មភាពពួកគាត់គឺសុទ្ធតែធ្វើនៅតាមរណ្តៅ ចាស់ៗ ជាកាកដីរ៉ែសល់ពីក្រុមហ៊ុនវិនិយោគរបស់ចិន មិនមានការជីករណ្តៅថ្មីនោះទេ ៕
ចែករំលែកព័តមាននេះ