ខេត្តកំពង់ឆ្នាំង ៖ ថ្ងៃទី២៥ ខែកុម្ភៈ ឆ្នាំ២០១៩នេះ គឺជាថ្ងៃផុតឱសានវាទដែលអាជ្ញាធរខេត្តកំពង់ឆ្នាំងតម្រូវឲ្យប្រជាពលរដ្ឋរស់នៅតាមច្រាំងទន្លេចំនួន២៥០គ្រួសាររុះរើផ្ទះចេញឲ្យអស់ ដើម្បីកែលំអរចាំងទន្លេ ប៉ុន្តែការរុះរើរបស់ប្រជាពលរដ្ឋនៅសេសសល់តិចតួចមានប្រមាណជាង៣០ខ្នងផ្ទះនៅមិនទាន់រុះអស់នៅឡើយ។ យ៉ាងនេះក្តីអាជ្ញាធរខេត្តមិនបានបង្ខិតបង្ខំដល់បងប្អូនប្រជាពលរដ្ឋទាំងនោះឡើយ ហើយថែមទាំងបញ្ជូនកងកម្លាំងនគរបាលរួមទាំងរថយន្តទៅជួយដឹកជញ្ជូនជូនប្រជាពលរដ្ឋទាំងនោះទៀតផង ។
ជាក់ស្តែងនៅព្រឹកថ្ងៃផុតឱសានវាទរបស់អាជ្ញាធរខេត្តថ្ងៃទី២៥ ខែកុម្ភៈនេះគេឃើញកងកម្លាំងនគរបាល មានចំនួនច្រើននាក់ មានរថយន្តចំនួន២គ្រឿងបានទៅចូលរួមជួយរុះរើ និងដឹកជញ្ជូនផ្ទះប្រជាពលរដ្ឋដែលកំពុងតែរុះរើនៅតាមច្រាំងទន្លេចាប់ពីភូមិចុងកោះ សង្កាត់ផ្សារឆ្នាំង រហូតទៅដល់តំបន់អភិវឌ្ឍន៍ថ្មី ក្នុងភូមិទី៧ សង្កាត់ខ្សាម ក្រុងកំពង់ឆ្នាំង ។
សូមរំលឹកដែរថា ដើម្បីសោភ័ណភាព និងរៀបចំឱ្យបានស្អាតនៅតាមមាត់ទន្លេផ្សារក្រោមក៏ដូចជា ដើម្បីត្រៀមរៀបចំបុណ្យទន្លេក្នុងពេលខាងមុខនេះអាជ្ញាធរខេត្តកំពង់ឆ្នាំងបានរៀបចំបន្លាស់ទីផ្ទះបណ្ដែតទឹកអោយចាកចេញទៅរស់នៅលើគោករួចហើយ នៅឡើយតែផ្ទះដែលមានសរសរជាប់ដីនៅតាមច្រាំងទន្លេចាប់ពីភូមិចុងកោះរហូតដល់ភូមិទី៧ ដែលមានចំនួន២៥០គ្រួសារ ។ រយៈកាលកន្លងមកបានប្រជាពលរដ្ឋបានរុះរើជាបណ្ដើរៗ ហើយនៅសល់ប្រមាណតែ២០ភាគរយប៉ុណ្ណោះដែលមិនទាន់បានរុះរើ ហើយក៏ដល់ថ្ងៃផុតឱសានវាទដែរ តែអាជ្ញាធរខេត្តមិនបានបង្ខិតបង្ខំដល់បងប្អូនប្រជាពលរដ្ឋទាំងនោះឡើយ ហើយអាជ្ញាធរមានតែភាពទន់ភ្លន់ដោយបានបញ្ជូនកងកម្លាំងប្រដាប់អាវុធទៅជួយលើកគ្រឿងផ្ទះដាក់លើរថយន្តដឹកជញ្ជូនទៅទីតាំងថ្មីឲ្យពួកគាត់ទៀតផង ។ ប្រជាពលរដ្ឋទាំង២៥០គ្រួសារសុទ្ធតែបានទទួលរបបគោលនយោបាយដីធ្លី និងថ្លៃរុះរើលំនៅដ្ឋានពីអាជ្ញាធរខេត្តអស់ហើយនៅឡើយតែពួកគាត់អនុវត្តទៅតាមកិច្ចសន្យាតែប៉ុណ្ណោះ។
គួរបញ្ជាក់ដែរថា ខេត្តកំពង់ឆ្នាំង និងធ្វើជាម្ចាស់ផ្ទះក្នុងរៀបចំពិធីបុណ្យទន្លេលើកទី៥ដែលនឹងប្រព្រឹត្តទៅចាប់ពីថ្ងៃទី១៥ដល់ថ្ងៃទី១៧ ខែមីនា ឆ្នាំ២០១៩ខាងមុខនេះ ។ បើគ្មានការប្រែប្រួលទេសម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិតបណ្ឌិតប៊ុន រ៉ានី ហ៊ុន សែន នឹងអញ្ជើញជាអធិបតីភាពក្នុងពិធីបើកជាផ្លូវការបុណ្យទន្លេនេះផងដែរ ។
ប្រជាពលរដ្ឋនៅខេត្តកំពង់ឆ្នាំងសង្ឃឹមថា នឹងទទួលបានសមិទ្ធផលថ្មីអ្វីមួយពីសម្ដេចតេជោហ៊ុនសែន ក្នុងពីធីបើកជាផ្លូវការ ក្នុងពិធីបុណ្យទន្លេជាមិនខាន ពិសេស គឺស្ពានឆ្លងកាត់ពីទីរួមខេត្តកំពង់ឆ្នាំងទៅស្រុកកំពង់លែងដែលជាគមនាគមន៍តភ្ជាប់ទៅខេត្តកំពង់ធំ ៕
ចែករំលែកព័តមាននេះ