តើនរណាខ្លះមិនចង់ក្លាយជាអ្នកមាន ? នេះគឺជាសុបិនរបស់មនុស្សភាគច្រើន ដោយសារតែវានឹងអាចជួយសម្រួលដល់តម្រូវការរបស់អ្នកប្រចាំថ្ងៃ និងអាចជួយឱ្យជីវិតរបស់អ្នកកាន់តែប្រសើរ ។ បើទោះបីជាទ្រព្យសម្បតិ្តអាចជួយសម្រួលដល់ជីវិតរបស់អ្នកមែន តែអ្នកមានស្ដុកស្ដម្ភជាច្រើននៅតែមានទុក្ខកង្វល់ខ្វល់ខ្វាយឥតល្ហែដូចជនមានជីវភាពសាមញ្ញដែរ ។ តើមានអ្វីខ្លះដែលអ្នកមានទ្រព្យសម្បត្តិខ្វល់ខ្វាយជាងគេ?
១. តើគូស្នេហ៍របស់ខ្ញុំ ពិតជាស្រឡាញ់ខ្ញុំមែន ឬអត់ ? ៖ ប្រសិនបើអ្នកស្រឡាញ់គ្នាទាំងមិនទាន់មែនទ្រព្យជាប់នឹងខ្លួន នោះវាមិនអីទេ។ តែប្រសិនបើការស្រឡាញ់ចាប់ផ្តើមពីពេលអ្នកមានទ្រព្យសម្បត្តិកប់ពពកហើយនោះ អ្នកមានសំណួរសួរខ្លួនឯងដូចខាងលើនេះ។ មនុស្សមិនថាប្រុសឬស្រី គឺមិនដូចគ្នាទេ ។ អ្នកខ្លះអាចស្រឡាញ់ដោយស្មោះ រីឯអ្នកខ្លះទៀតស្រឡាញ់ដោយមើលឃើញតែទ្រព្យសម្បតិ្តប៉ុណ្ណោះ ។
២. តើកូនខ្ញុំនឹងដើរផ្លូវខុស ដោយសារតែទ្រព្យសម្បត្តិរបស់ខ្ញុំដែរឬទេ? ៖ កាលពីអ្នកនៅក្រ អ្នកដឹងថាវាលំបាកយ៉ាងណាក្នុងការរកប្រាក់។ តែកូនរបស់អ្នកអាចនឹងមិនដូចអ្នកទេ ព្រោះគេកើតមកធ្វើជាកូនអ្នកមានស្រាប់។ ទឹកប្រាក់របស់អ្នកអាចធ្វើឱ្យពួកគេឈ្លក់វង្វេង ហើយអាចដើរផ្លូវខុសទៀតផង ។
៣. តើមិត្តភក្តិរបស់ខ្ញុំ គឺពិតជាមិត្តភក្ដិពិតប្រាកដឬទេ ? ៖ នៅពេលអ្នកក្លាយជាអ្នកមាន អ្នកនឹងជួបមនុស្សជាច្រើន។ បើទោះបីជាអ្នកដើរលេង ឬ ទៅណាមកណាជាមួយពួកគេក៏ដោយ ក៏អ្នកនៅតែមិនអាចប្រាកដ១០០%ថា ពួកគេរាប់អានអ្នកដោយស្មោះនោះដែរ។ មិត្តភាពស្មោះត្រង់ គឺទាមទារពេលយល់ពីគ្នាច្រើន។ ការរាប់អានខ្លះ គឺគ្រាន់តែដើម្បីសម្រេចកិច្ចការអ្វីមួយប៉ុណ្ណោះ។ វាមិនមែនជាមិត្តភាពយូរអង្វែងឡើយ ។
៤. តើខ្ញុំអាចត្រូវគេប្តឹងដែរឬទេ ? ៖ ពេលអ្នកគឺជាអភិជន គ្រប់គ្នាគឺតែងតែសម្លឹងមើលអ្នកជានិច្ច។ រាល់នូវទង្វើរបស់អ្នក នឹងត្រូវបានគេតាមអង្កេត។ មានមនុស្សមួយចំនួន គឺចង់បានប្រយោជន៍ពីអ្នក ដោយការបង្ខូចកេរ្តិ៍ឈ្មោះរបស់អ្នក ឬ គំរាមកំហែងប្តឹងអ្នកពីរឿងអ្វីមួយ។ រឿងនេះក៏អាចកើតចេញពីអ្នកដែលចង់រកស៊ីប្រជែងអ្នកផងដែរ ។
៥. តើសុខភាពរបស់ខ្ញុំល្អគ្រប់គ្រាន់ដែរឬទេ ? ៖ តើវាមានន័យដែរឬទេ បើអ្នកមានទ្រព្យសម្បតិ្តចាយមិនអស់ តែត្រូវដេកនៅលើគ្រែពេទ្យងើបមិនរួចនោះ ? អ្នកមានទាំងអស់ គឺឱ្យតម្លៃទៅលើសុខភាពជាងគេ។ ពួកគេបានចំណាយថវិកាជាច្រើន ធ្វើយ៉ាងណាដើម្បីឱ្យសុខភាពល្អអាចនៅចាយទ្រព្យបានយូរ និង ជួយដល់សង្គម ។ នៅពេលមិនទាន់មាន អ្នកបានយកសុខភាពទៅដូរនឹងលុយ តែពេលមានអ្វីៗអស់ហើយ អ្នកនឹងយកលុយទៅដូរនឹងសុខភាពវិញ ។
ត្រឹមតែ៥ចំណុចខាងលើគឺមិនទាន់អស់នៅឡើយទេ ។ កង្វល់គឺតែងតែមានជានិច្ចសម្រាប់មនុស្សគ្រប់រូប មិនថាអ្នកមានឬអ្នកក្រឡើយ គ្រាន់តែវាជាប្រភេទកង្វល់ខុសគ្នាតែប៉ុណ្ណោះ។ ដូចនេះ អ្នកគួរតែរៀនយល់ពីវា និងធ្វើយ៉ាងណាឱ្យជីវិតរបស់អ្នករស់នៅបានសប្បាយចិត្ត ទើបគេហៅថាជីវិតរស់មានន័យ៕
ចែករំលែកព័តមាននេះ