ទីក្រុងវ៉ាស៊ីនតោន ៖ អ្នកចរចាតំណាងសហរដ្ឋអាមេរិកនិងប្រទេសចិនបានជួបគ្នាកាលពីថ្ងៃសៅរ៍ចុងសប្ដាហ៍មុននេះ ដើម្បីដោះស្រាយជម្លោះពាណិជ្ជកម្ម និងជៀសវាងការដាក់ពន្ធលើគ្នាទៅវិញទៅមកបន្ថែមទៀត ។
យោងតាមសារព័ត៌មាន Channel NewsAsia ចេញផ្សាយកាលពីថ្ងៃទី ២៤ កុម្ភៈ ម្សិលមិញ បានឲ្យដឹងថា ភាគីទាំងសងខាងក៏មានកិច្ចប្រជុំនៅថ្ងៃអាទិត្យដែរដើម្បីរុះរាន់សម្រេចបានកិច្ចព្រមព្រៀងមួយមិនឲ្យក្រោយថ្ងៃទី១ខែមីនា ដែលជាថ្ងៃកំណត់របស់លោកប្រធានាធិបតីដូណាល់ត្រាំ (Donald Trump) ដែលបានគំរាមថា នឹងបង្កើនពន្ធលើផលិតផលនាំចូលពីប្រទេសចិន ។
កិច្ចប្រជុំនៅថ្ងៃសៅរ៍កន្លងមកគឺជាលើកទី៥នៃការចរចាគ្នារវាងប្រទេសទាំងពីរ ហើយយោងទៅតាមប្រភពមួយបានឲ្យដឹងថា ក្រុមប្រតិភូចិននឹងចាកចេញពីសហរដ្ឋអាមេរិកនៅថ្ងៃចន្ទនេះផងដែរ ។ វាក៏ជាការចរចាលើកទី៤ផងដែរតាំងពីសហរដ្ឋអាមេរិកនិងប្រទេសចិនបានព្រមព្រៀងគ្នាផ្អាកសង្គ្រាមពាណិជ្ជកម្ម ។
កាលពីថ្ងៃសុក្រ លោកប្រធានាធិបតីត្រាំបាននិយាយថា កិច្ចព្រមព្រៀងអាចនឹងសម្រេចបាន ហើយលោកអាចនឹងពន្យារពេលថ្ងៃកំណត់និងជួបជាមួយនឹងលោកប្រធានាធិបតីស៊ី ជិនពីង (Xi Jinping) របស់ប្រទេសចិនក្នុងពេលឆាប់ៗនេះផងដែរ ។ ការពន្យារថ្ងៃកំណត់នឹងផ្អាកការបង្កើនពន្ធអាមេរិកលើផលិតផលប្រមាណ២០០ប៊ីលានដុល្លារដែលនាំចូលពីប្រទេសចិនពី១០% ទៅ២៥%។
លោកប្រធានាធិបតីត្រាំ និងរដ្ឋមន្ត្រីក្រសួងរតនាគារអាមេរិកគឺលោក Steven Mnuchin បាននិយាយថា មន្ត្រីអាមេរិកនិងចិនបានព្រមព្រៀងគ្នាលើបញ្ហារូបិយវត្ថុហើយ តែមិនបានផ្តល់ព័ត៌មានលម្អិតបន្ថែមទេ។ មន្ត្រីអាមេរិកបានធ្លាប់រិះគន់ថា ប្រទេសចិនបានទម្លាក់តម្លៃប្រាក់យន់របស់ខ្លួនដើម្បីបង្កើនការនាំចេញ។ ជាមួយគ្នានេះផងដែរ ប្រទេសចិនក៏បានសន្យាថា នឹងទិញសណ្តែកសៀងប្រមាណ១០លានតោនគូបបន្ថែមពីសហរដ្ឋអាមេរិកទៀត ផង ៕
ចែករំលែកព័តមាននេះ