រដ្ឋធានីវ៉ាស៊ីនតោន៖ យោងតាមសារព័ត៌មាន Channel News Asia កាលពីថ្ងៃទី២៤ កុម្ភៈ កន្លងមកបានឲ្យដឹងថា អ្នកចរចាតំណាងសហរដ្ឋអាមេរិក និងប្រទេសចិនបានជួបគ្នាកាលពីថ្ងៃសៅរ៍…
រដ្ឋធានីវ៉ាស៊ីនតោន៖ យោងតាមសារព័ត៌មាន Channel News Asia កាលពីថ្ងៃទី២៤ កុម្ភៈ កន្លងមកបានឲ្យដឹងថា អ្នកចរចាតំណាងសហរដ្ឋអាមេរិក និងប្រទេសចិនបានជួបគ្នាកាលពីថ្ងៃសៅរ៍ ដើម្បីដោះស្រាយជម្លោះពាណិជ្ជកម្ម និងចៀសវាងការដាក់ពន្ធលើគ្នាទៅវិញទៅមកបន្ថែមទៀត ។
ភាគីទាំងសងខាងក៏មានកិច្ចប្រជុំនៅថ្ងៃអាទិត្យដែរដើម្បីរុះរាន់សម្រេចបានកិច្ចព្រមព្រៀងមួយមិនឲ្យក្រោយថ្ងៃទី ១ ខែមីនា ដែលជាថ្ងៃកំណត់របស់លោកប្រធានាធិបតី ដូណាល់ ត្រាំ (Donald Trump) ដែលបានគម្រាមថានឹងបង្កើនពន្ធលើផលិតផលនាំចូលពីប្រទេសចិន ។
កិច្ចប្រជុំនៅថ្ងៃសៅរ៍កន្លងមកគឺជាថ្ងៃទី៥ នៃការចរចាគ្នារវាងប្រទេសទាំងពីរ ហើយយោងទៅទាមប្រភពមួយបានឲ្យដឹងថា ក្រុមប្រតិភូចិននឹងចាកចេញពីសហរដ្ឋអាមេរិកនៅថ្ងៃចន្ទផងដែរ ។ វាក៏ជាការចរចាលើកទីបួនផងដែរតាំងពីសហរដ្ឋអាមេរិកនិងប្រទេសចិនបានព្រមព្រៀងគ្នាផ្អាកសង្គ្រាមពាណិជ្ជកម្ម ។
កាលពីថ្ងៃសុក្រ លោកប្រធានាធិបតី ត្រាំ បាននិយាយថា កិច្ចព្រមព្រៀងអាចនឹងសម្រេចបាន ហើយលោកអាចនឹងពន្យាពេលថ្ងៃកំណត់ និងជួបជាមួយនឹងលោកប្រធានាធិបតី ស៊ី ជិនពីង (Xi Jinping) របស់ប្រទេសចិនក្នុងពេលឆាប់ៗនេះផងដែរ ។ ការពន្យាថ្ងៃកំណត់នឹងផ្អាកការបង្កើនពន្ធអាមេរិកលើផលិតផលប្រមាណ ២០០ប៊ីលានដុល្លារដែលនាំចូលពីប្រទេសចិនពី ១០% ទៅ ២៥% ។
លោកប្រធានាធិបតី ត្រាំ និងរដ្ឋមន្ត្រីក្រសួងរតនាគារអាមេរិកគឺលោក Steven Mnuchin បាននិយាយថា មន្ត្រីអាមេរិកនិងចិនបានព្រមព្រៀងគ្នាលើបញ្ហារូបិយវត្ថុហើយតែមិនបានផ្តល់ព័ត៌មានលម្អិតបន្ថែមទេ ។ មន្ត្រីអាមេរិកបានធ្លាប់រិះគន់ថាប្រទេសចិនបានទម្លាក់តម្លៃប្រាក់យាន់របស់ខ្លួនដើម្បីបង្កើនការនាំចេញ ។
ជាមួយគ្នានេះផងដែរ ប្រទេសចិនក៏បានសន្យាថានឹងទិញសណ្តែកសៀងប្រមាណ១០លានតោនគូបបន្ថែមពីសហរដ្ឋអាមេរិកទៀតផង ៕
ប្រភព ៖ Channel News Asia
ចែករំលែកព័តមាននេះ