មេសហជីព ៖ ការផ្ដាច់ EBA មិនមែនជាការផ្ដាច់ទំនាក់ទំនងពាណិជ្ជកម្មឡើយ
- ភ្នំពេញ
រាជធានីភ្នំពេញ ៖ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាហៅកាត់ថា ស៊ីខៅឌូ (CCAWDU) លោក អាត់ ធន់ បានលើឡើងថា ការផ្ដាច់…
រាជធានីភ្នំពេញ ៖ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាហៅកាត់ថា ស៊ីខៅឌូ (CCAWDU) លោក អាត់ ធន់ បានលើឡើងថា ការផ្ដាច់ EBA មិនមែនជាការផ្ដាច់ទំនាក់ទំនងពាណិជ្ជកម្មឡើយកម្ពុជានៅតែមាន ទំនាក់ទំនងពាណិជ្ជកម្មជាមួយប្រទេសសហគមអឺរ៉ុបតាមរយៈ WTO នៅតែអាចនាំទំនិញចូលបានដដែល ។
ការអះអាងនេះ ខណៈដែលសហគមន៍អឺរ៉ុបបានចាប់ផ្តើម នីតិវិធីជាផ្លូវការលើការផ្អាកជាបណ្តោះអាសន្ន ការអនុគ្រោះពន្ធគ្រប់ប្រភេទលើកលែងតែអាវុធ (EBA) នៅថ្ងៃទី១៣ ខែកុម្ភៈ ឆ្នាំ២០១៩ មុននឹងអាច ឈានទៅរកការព្យូរនៅខែកុម្ភៈ ឆ្នាំ២០២០ ប្រសិនបើរកឃើញថា កម្ពុជាអនុវត្តមិនត្រឹមត្រូវ ទៅរកភាពល្អ ប្រសើរគ្រប់គ្រាន់ទៅលើបញ្ហាសិទ្ធិមនុស្ស និងប្រជាធិបតេយ្យ ។ ថ្លែងប្រាប់អ្នកសារព័ត៌មាន ក្នុងពិធីផ្ទេរតួនាទីលេខាធិការដ្ឋាន ITUC-CC សម្រាប់ឆ្នាំ២០១៩ កាលពីពេលថ្មីៗកន្លងមកនេះលោក អាត់ ធន់ បានឲ្យដឹងថា «ការផ្ដាច់ EBA មិនមែនជាការផ្ដាច់ទំនាក់ទំនងពាណិជ្ជកម្មទេ កម្ពុជានៅតែមាន ទំនាក់ទំនងពាណិជ្ជកម្មជាមួយប្រទេសសហគមអឺរ៉ុបតាមរយៈ WTO នៅតែនាំចូលបាន តែក្នុង លក្ខណនៃពន្ធកម្មវិធី EBA គឺជាឱកាសមួយ ដើម្បីឲ្យកម្ពុជាកាន់តែមានឱកាសនាំទៅដោយមិនបង់ពន្ធ មានឱកាសទាក់ទាញវិនិយោគច្រើន» ។
លោកបន្តថា កិច្ចព្រមព្រៀង EBA ជាកិច្ចព្រមព្រៀងមួយដែលពិសេស ដែលមិនថាប្រទេសកម្ពុជា សូម្បីតែប្រទេសជឿនលឿនដូចជា វៀតណាម ដែលគេមិនមានជាប្រទេសអភិវឌ្ឈន៍តិចតួចបាន ដែលមិនបានទទួលការអនុគ្រោះពន្ធ EBA ក៏គេចង់ចចារទ្វេភាគីដោយនាំចូលមិនយកពន្ធដែរ ។ លោកបានបន្ថែមថា EBA គឺជាចំណុចមួយដ៏សំខាន់ដែលបង្កើតឲ្យរដ្ឋនោះបង្កើននូវចំណូលសេដ្ឋកិច្ច ឲ្យប្រជាពលរដ្ឋដែលនៅរដ្ឋនោះបង្កើតការងារ ដើម្បីកាត់បន្ថយភាពគ្មានការងារធ្វើ ក្នុងប្រទេស និងកាត់បន្ថយភាពក្រីក្របាន ។ ក្នុងនោះលោកក៏បានស្នើរឲ្យរដ្ឋាភិបាលកម្ពុជា និងសហគមអឺរ៉ុប ត្រូវជជែកគ្នារក្សាទុក EBAឲ្យរស់បានទៅមុខទៀតផងដែរ ។
សូមជម្រាបថា ការលើកឡើងរបស់មេសហជីពនេះ បន្ទាប់ពីរាជរដ្ឋាភិបាលក៏បានអះអាងថា កម្ពុជាមិនស្លាប់នោះទេ បើទោះបីសហភាពអឺរ៉ុបផ្តាច់ការអនុគ្រោះពន្ធកមកម្ពុជាក៏ដោយ ។ សម្តេចតេជោ ហ៊ុនសែន ធ្លាប់បានមានប្រសាសន៍ថា កម្ពុជាមិនស្លាប់ទេ បើអត់ការអនុគ្រោះពន្ធក៏ដោយ ៕
ចែករំលែកព័តមាននេះ