រាជធានីភ្នំពេញ ៖ នៅក្នុងរយៈពេលប៉ុន្មានឆ្នាំកន្លងមកនេះ សកម្មភាពពុះដីឡូត៍នៅក្នុងប្រទេសកម្ពុជា ហាក់មានសន្ទុះយ៉ាងខ្លាំង ទាំងនៅតំបន់ជាយរាជធានី និងបណ្ដាខេត្តសក្ដានុពលសេដ្ឋកិច្ចនានាដូចជា ខេត្តព្រះសីហនុ, កំពត, ស្វាយរៀង, កំពង់ចាម, ត្បូងឃ្មុំ, មណ្ឌលគិរី, សៀមរាប និងបន្ទាយមានជ័យជាដើម ។
បើតាមអ្នកជំនាញវិស័យអចលនទ្រព្យ កម្ពុជា បានអះអាងថាការពុះដីឡូត៍នេះ នឹងជួយជំរុញកំណើនជីវភាពរបស់ប្រជាពលរដ្ឋដែលមានដីសម្រាប់លក់ឲ្យក្រុមឈ្មួញធ្វើការពុះលក់ជាឡូត៍ៗ ហើយវាក៏បានសម្រួលដល់ជីវភាពរបស់អ្នកទិញ ដែលមិនមានលទ្ធភាពបង់ផ្ដាច់ផងដែរ ដោយសារតែដីឡូត៍ភាគច្រើន ត្រូវបានលក់ទៅអតិថិជនដោយបង់រំលស់ជាប្រចាំខែ ហើយសកម្មភាពពុះដីឡូត៍នេះ ក៏បានធ្វើឲ្យតម្លៃដីធ្លីកើនឡើងជាបន្តបន្ទាប់ផងដែរ ។
លោក ម៉ាន់ ចណ្ឌី អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា បច្ចុប្បន្ននេះ សកម្មភាពពុះដីឡូត៍នៅក្នុងប្រទេសកម្ពុជា បានរីកសាយភាយស្ទើរតែគ្រប់ខេត្តទៅហើយ ហើយសកម្មភាពនេះ ក៏មិនមែនទើបតែកើតឡើងនៅពេលថ្មីៗនេះដែរ វាបានកើតឡើងយូរមកហើយ ប៉ុន្ដែទើបតែរយៈពេល២ឆ្នាំចុងក្រោយនេះមានសន្ទុះខ្លាំង ។
លោកបន្តថា សកម្មភាពពុះដីឡូត៍ក៏បានជំរុញឱ្យតម្លៃដីធ្លីនៅកម្ពុជាកើនឡើងមួយកម្រិតដែរ ក្នុងនោះដូចគេបានឃើញស្រាប់ហើយ នៅតំបន់ជាយក្រុងមួយចំនួនដែលមានសកម្មភាពពុះដីឡូត៍ខ្លាំងនោះបានធ្វើឲ្យតម្លៃដីស្រែរបស់ពលរដ្ឋកើនឡើងគុណនឹងពីរ គុណនឹងបី ។ លោកថា ៖« បើសិនជាការពុះដីឡូត៍បានទៅដល់តំបន់ណាមួយ វានឹងប្រែតម្លៃដីធ្លីភ្លាមៗ ហើយរដ្ឋក៏នឹងទទួលចំណូលបានកាន់តែច្រើនផងដែរ ពីវិស័យដីឡូត៍នេះ តាមរយៈការបង់ពន្ធជូនរដ្ឋនៅពេលមានការផ្ទេរកម្មសិទ្ធពីមួយទៅមួយ » ។
លោកបន្ថែមថា ទន្ទឹមនឹងផ្ដល់អត្ថប្រយោជន៍ដល់សេដ្ឋកិច្ច និងសង្គមនោះ វិស័យពុះដីឡូត៍នេះ ក៏មានគុណវិបត្តិមួយចំនួនផងដែរ ។ ជាក់ស្ដែងមានជនមួយក្ដាប់តូចដែលរកស៊ីមិនស្មោះត្រង់ លក់ដីឡូត៍ ហើយមិនព្រមកាត់ប្លង់ឲ្យអតិថិជន ឬយកលុយពីអតិថិជនហើយ មិនដឹងថាដីឡូត៍នោះនៅទីណានោះទេ អីចឹងហើយលោកក៏សូមស្នើឲ្យពលរដ្ឋមានការប្រុងប្រយ័ត្នឲ្យបានខ្ពស់ចំពោះសកម្មភាពបែបនេះ ។
បើតាមលោក ជា កុយ ម្ចាស់អាជីវកម្មដីឡូត៍មួយកន្លែង នៅភាគខាងលិចរាជធានីភ្នំពេញបានឲ្យដឹងថា កាលពីលោកចាប់ផ្ដើមអាជីវកម្មពុះដីឡត៍ដំបូងៗ ការទិញដីពីពលរដ្ឋមិនសូវពិបាកទេ ហើយអាចទិញបានក្នុងតម្លៃមួយសមរម្យទៀតផង តែបច្ចុប្បន្ននេះ ដោយសារតែ មានអ្នកចេញរកស៊ីក្នុងវិស័យនេះកាន់តែច្រើន ធ្វើឲ្យតម្លៃដីធ្លីរបស់ពលរដ្ឋបានកើនឡើងខ្ពស់ ហើយក៏ពិបាករកទិញដែរ ។
លោកបន្តថា កាលពីមុនការពុះដីឡូត៍នៅតំបន់ដែលលោកកំពុងធ្វើនោះ មិនសូវមានទេ តែទោះបីជាពេលនេះ មានអ្នកមកពុះដីឡូត៍ច្រើនក៏ដោយ ក៏ការលក់ដីឡូត៍នៅតែដាច់ជាធម្មតា និងមានអ្នកស្វែងទិញជាហូរហផងដែរ ជាពិសេសអ្នកមានចំណូលមធ្យមដោយទិញបង់រំលស់ប្រចាំខែ ។
គួរបញ្ជាក់ថាផងដែរ នៅក្នុងពេលវិស័យដីឡូត៍កំពុងកក្រើកនេះដែរ មានទាំងអ្នកសិល្បៈ អ្នកកាសែត និងអ្នកមានទ្រព្យធនជាច្រើន បានចេញទៅពុះដីឡូត៍លក់ព្រោងព្រាត ជាពិសេសនៅតំបន់ជាយរាជធានី និងនៅតាមបណ្ដោយផ្លូវជាតិលេខ៣ លេខ៤ ព្រមទាំងនៅតំបន់ដែលមានគម្រោងអភិវឌ្ឍរបស់រដ្ឋ ដូចជាគម្រោងអភិវឌ្ឍន៍ផ្លូវក្រវាត់ក្រុង និងគម្រោងអភិវឌ្ឍន៍ធំៗមួយចំនួន ។ យ៉ាងណាក៏ដោយ មន្ត្រីជាន់ខ្ពស់នៃរដ្ឋាភិបាល ក៏បានអំពាវនាវឲ្យពលរដ្ឋពិនិត្យនិងស្រាវជ្រាវឲ្យបានច្បាស់ផងដែរ មុននឹងសម្រេចចិត្តទិញ ៕
ចែករំលែកព័តមាននេះ