ការតុបតែងលំនៅឋានឲ្យមើលទៅស្អាតជានិច្ច ក្រៅពីជួយបន្ថែមបរិយាកាសផ្នែកខាងក្នុងគួរឲ្យចង់រស់នៅ ចម្រើនរុងរឿងហើយ នឹងជួយឲ្យការរស់នៅមានសិរីសួស្ដី ត្រជាក់ត្រជុំនៅក្នុងគ្រួសារផងដែរ ។ តាមក្បួនហុងស៊ុយមួយចំនួនបានបង្ហាញពីវិធីថែទាំ និងការតុបតែងផ្ទះងាយៗឲ្យមើលទៅស្អាត ដែលអ្នកគួរយកទៅអនុវត្តដោយខ្លួនឯងដូចខាងក្រោម ៖
១-ពន្លឺថ្ងៃ ៖ ពន្លឺថ្ងៃមានផលប៉ះពាល់ដល់សភាពតុបតែងនៅក្នុងផ្ទះ បើមានពន្លឺថ្ងៃខ្លាំងពេក គឺវាខូចខាតដល់សម្ភារគ្រប់ប្រភេទ មិនថា ឈើ ក្រណាត់ពណ៌តាមធម្មជាតិ និងក្រដាស ។ ដូច្នេះ គួរព្យាយាមមិនឲ្យរូបភាព គ្រឿងសង្ហារិមឈើ ឬវាំងននស្អាតៗប៉ះនឹងពន្លឺថ្ងៃដោយផ្ទាល់ ដោយរករនាំងឫស្សីមកបិទបាំងពន្លឺនេះ ។
២-សត្វចម្លងរោគ និងសត្វល្អិត ៖ កណ្តុរ កន្លាត សត្វល្អិតស៊ីក្រណាត់ ស្រមោច និងមូស វិធីមួយដែលទប់ទល់ជាមួយបណ្តាសត្វទាំងនេះ គឺការបូមធូលី និងសម្អាតបរិវេណផ្ទះឲ្យបានល្អ ដោយពិនិត្យមើលបរិវេណក្បែរៗផ្ទះ នៅពេលជួបអ្វីខុសប្រក្រតី គួររកវិធីដោះស្រាយជាមុន ។ ការកម្ចាត់សត្វល្អិត ឬសត្វមួយចំនួននៅក្នុងផ្ទះ យើងអាចត្រូវប្រើសារជាតិគីមី ដែលវាក៏បង្កគ្រោះថ្នាក់ផងដែរ ។ បើអស់លទ្ធភាពហើយ យើងអាចត្រូវពឹងពាក់ក្រុមហ៊ុនកម្ចាត់សត្វល្អិត ។
៣-សម្ភារចាស់នៅក្នុងផ្ទះ ៖ សត្រូវសម្រាប់សម្ភារចាស់ៗ គឺសភាពព័ទ្ធជុំវិញផ្សេងៗ វិធីងាយៗ គឺកុំឲ្យពន្លឺថ្ងៃប៉ះជាមួយសម្ភារដោយផ្ទាល់ខ្លាំងពេក ។ យើងគួរទុកសម្ភារចាស់ៗនៅទីកន្លែងណាប៉ះនឹងពន្លឺថ្ងៃតិចបំផុត ក៏ដូចជាសម្ភារតុបតែងផ្សេងទៀត ។ ក្នុងពេលផ្លាស់ទី គួរចាប់កាន់ថ្នមៗ ជាពិសេសបំផុត ជាមួយវត្ថុងាយបែក ។
៤-គ្រឿងសង្ហារិមឈើ ៖ គួរដាក់វាឲ្យត្រូវកន្លែង ដោយមិនឲ្យនៅជិតទីកន្លែងក្តៅឬសើម ប៉ុន្តែគួរដាក់នៅកន្លែងណាដែលមានសីតុណ្ហភាពធម្មតា ងាយស្រួលផ្លាស់ទី កុំឲ្យត្រូវពន្លឺថ្ងៃ, Spot light និងពន្លឺផ្សេងៗដោយផ្ទាល់ ហើយស្នាមគូសវាស និងស្នាមដានទឹក សុទ្ធតែមានផលប៉ះពាល់ដល់ភាពស្រស់ស្អាតរបស់សាច់ឈើទាំងអស់ ។
វិធីល្អ គួរស្វែងរកផ្ទាំង ឬអ្វីផ្សេងៗមកបាំងមិនឲ្យមានអ្វីប៉ះពាល់ជាមួយផ្ទាំងឈើដោយផ្ទាល់ និងបោសសម្អាតធូលីជាប្រចាំ ដើម្បីបង្ការសត្វល្អិតមកចោះស៊ី ឬរស់នៅក្នុងឈើ ។
៥-ផ្ទាំងគំនូរ ៖ ទាំងផ្ទាំងគំនូរពណ៌ទឹក និងពណ៌ប្រេង រមែងប្រែប្រួលសភាពតាមសីតុណ្ហភាពឡើងចុះ ។ គួរព្យួររូបភាពនៅកន្លែងសមស្រប និងមិនគួរប្រើដៃចាប់លើរូបភាពដោយផ្ទាល់ ។ បើត្រូវផ្លាស់ទីតាំងរបស់វា គួរវេចខ្ចប់ដោយវត្ថុការពារពីការប៉ះទង្គិច ឬអ្វីក៏បានដែលមិនធ្វើឲ្យវារងការប៉ះទង្គិចខ្លាំង ។
លោកអ្នកអាចសាកល្បងអនុវត្តតាមវិធីខាងលើនេះ ហើយប្រសិនបើមានវិធីល្អៗសូមជួយចែករំលែកផង៕
ចែករំលែកព័តមាននេះ