ខេត្តកំពត ៖ មានករណីហិង្សាក្នុងគ្រួសារបង្កឡើងដោយបុរសជាប្តីបានវាយទៅលើស្ត្រីជាប្រពន្ធ បណ្តាលឱ្យរងរបួស ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៥និង៣០នាទីល្ងាចថ្ងៃទី២៣ កុម្ភៈ ឆ្នាំ២០១៩ នៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច។
ជនសង្ស័យជាប្តីឈ្មោះ អឿន សួន អាយុ៤២ឆ្នាំ ចំណែកជនរងគ្រោះជាប្រពន្ធឈ្មោះភេន អ៊ុន អាយុ៤២ឆ្នាំ ។ អ្នកទាំង២មានទីលំនៅក្នុងភូមិឃុំកើតហេតុខាងលើ និងមានកូនចំនួន៤នាក់ ។
ប្រភពព័ត៌មានបានឱ្យដឹងថា ជនសង្ស័យបានផឹកស្រាស្រវឹងរួចវាយបំផ្លាញទ្រព្យសម្បត្តិក្នុងផ្ទះ បន្ទាប់មកជនរងគ្រោះបានទៅឃាត់កុំឱ្យវាយបំផ្លាញទ្រព្យសម្បត្តិក្នុងផ្ទះ ពេលនោះស្រាប់តែជនសង្ស័យខឹងក៏យកពូថៅកាប់ក្បាលជនរងគ្រោះ បណ្តាលឱ្យត្រូវរបួសចំក្បាល១កន្លែងដេរចំនួន៣ថ្នេរ ។
តាមប្រភពពីស្ត្រីរងគ្រោះបានឱ្យដឹងថា កន្លងមកប្តីរបស់គាត់បានប្រើអំពើហិង្សាក្នុងគ្រួសារជាញឹកញាប់ តែគាត់មិនដែលប្តឹងនោះទេ តែលើកនេះគាត់មិនអាចទ្រាំបាន ទើបប្តឹងសមត្ថកិច្ចឱ្យចាប់ឃាត់ខ្លួនតែម្តង។
ក្រោយពេលឃាត់ខ្លួន ជនសង្ស័យបានឆ្លើយសារភាពថា ខ្លួនពិតជាបានវាយទៅលើប្រពន្ធបណ្តាលឱ្យរងរបួសប្រាកដមែន ។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងដើម្បីចាត់ការតាមនីតិវិធី ៕
ចែករំលែកព័តមាននេះ