ខេត្តព្រះសីហនុ ៖ តាមសេចក្តីរាយការណ៍បឋមបានឲ្យដឹងថា នៅស្រុកកំពង់សីលាមានគ្រោះថ្នាក់ចរាចរណ៍មួយបានកើតឡើងរវាងរថយន្ត៤គ្រឿងបុកប៉ះបន្តគ្នា នៅផ្លូវជាតិលេខ៤ ត្រង់ចំណុចហួសស្ពានចុះពីពេជ្រនិល ព្រំប្រទល់ខេត្តកំពង់ស្ពឺ និងខេត្តព្រះសីហនុ នៅថ្ងៃទី២៤ កុម្ភៈ ២០១៩នេះ ។
សេចក្តីរាយការណ៍បានបន្តថា ករណីខាងលើនេះកងរាជអាវុធហត្ថស្រុកកំពង់សីលាបានអោយដឹងថា នៅកន្លែងកើតហេតុការណ៍មិនមានមនុស្សរងគ្រោះថ្នាក់ដល់អាយុជីវិតនោះទេ មានតែអ្នករងរបួសធ្ងន់ និងស្រាលប្រមាណ១០នាក់ ព្រមទាំងរថយន្តរងការខូចខាតផង ។
តាមរបាយការណ៍សមត្ថកិច្ចស្រុកថា នៅវេលាម៉ោង៦ និង៤៥នាទី ថ្ងៃទី២៤ កុម្ភៈ មានករណីគ្រោះថ្នាក់ចរាចរណ៍មួយកើតឡើងចន្លោះគីឡួម៉ែតលេខ១០៧ ១០៨ ស្ថិតក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុរវាងរថយន្ត០៤គ្រឿង ១-រថយន្តម៉ាកហ៊ីណួសន្តោងរ៉ឺម៉កក្បាលត្រួយចេក ពាក់ស្លាកលេខព្រះសីហនុ 3A- 8995 ទិសដៅពីភ្នំពេញទៅព្រះសីហនុអ្នកបើកបររត់គេចខ្លួនបាត់ ។ ២- រថយន្តកុងទីត័រ ម៉ាកហ៊ីយ៉ានដាយ ក្បាលត្រួយចេកលាយខៀវ ពាក់ស្លាកលេខភ្នុំពេញ 3A- 5956 ទិសដៅពីព្រះសីហនុទៅភ្នំពេញ អ្នកបើកបរឈ្មោះយ៉ួង បារាំង ភេទប្រុស អាយុ២៦ឆ្នាំ ទីលំនៅភូមិព្រែកត្នោត ឃុំព្រែកត្នោត ស្រុកទឹកឈួ ខេត្តកំពត រងរបូសស្រាល ។ ៣ -រថយន្តម៉ាកស៊ីណា ពណ៌ស ពាក់ស្លាកលេខភ្នុំពេញ2AJ- 0511ទិសដៅពីព្រះសីហនុទៅភ្នំពេញ អ្នកបើកបរឈ្មោះ ឈិត សុភី ភេទប្រុស អាយុ៤០ឆ្នាំ ទីលំនៅភូមិត្រពាំង ឃុំស្រែអំបិល ស្រុកស្រែអំបិល ខេត្តកោះកុង ។ ៤- រថយន្តម៉ាកហាយលិន ដឺ ពណ៌ទឹកប្រាក់ ពាក់ស្លាកលេខភ្នុំពេញ2AI- 1958 ទិសដៅពីភ្នំពេញទៅព្រះសីហនុ បើកបរដោយឈ្មោះ មុយ ឆាយ ភេទប្រុយ អាយុ៥៦ឆ្នាំ ទីលំនៅភូមិ១ សង្កាត់បឹងកេងកងទី៣ ខណ្ឌចំការមន ភ្នំពេញ ។
បណ្តាលអោយអ្នករួមដំណើរក្នុងរថយន្តស៊ីណាប្រុស ស្រីចំនួន១០នាក់ រងរបួសស្រាល ។ បច្ចុប្បន្នរថយន្តទាំង៤ត្រូវកម្លាំងជំនាញធ្វើការវាស់វែង និងយកមករក្សាទុក្ខនៅអធិការស្រុក៕
ចែករំលែកព័តមាននេះ