ខេត្តក្រចេះ ៖ ជនសង្ស័យជាស្រ្តីភេទ ជើងឆើតជាប់ចោទកាច់សោ.កម៉ូតូស៊េរីទំនើបមួយគ្រឿង ទាំងព្រឹកព្រលឹម ហើយបានព្យាយាមគេចចេញពីក្រុងក្រចេះ តែត្រូវសមត្ថកិច្ចក្របួចបាននៅស្រុកឆ្លូង ខណៈពេលដែលស្រ្តីរូបនេះធ្វើសកម្មភាពរួចបំរុងជិះរត់គេច ។ អាចចាត់ទុកថា ជាលើកទី១តែម្តង ដែលស្រ្តីម្នាក់ហ៊ានធ្វើសកម្មភាពកាច់សោម៉ូតូដោយផ្ទាល់ ដែលកន្លងមកធ្លាប់មានតែជាអ្នករួមគំនិតប៉ុណ្ណោះ ។ ហេតុការណ៍នេះបានកើតឡើងកាលពីវេលាម៉ោង៧ព្រឹកថ្ងៃទី១០ សីហា នៅចំណុចខាងក្រោយផ្សារក្រចេះ ។
តាមព័ត៌មានពីប៉ូលិសស្រុកឱ្យដឹងថា នារីជាប់ចោទនេះឈ្មោះ តាំង ស្រី ហៅ អាវី អាយុ២០ឆ្នាំ មានមុខរបរមិនពិតប្រាកដ មានទីលំនៅខណ្ឌមានជ័យ រាជធានីភ្នំពេញ បានធ្វើសកម្មភាពលួចកាច់សោ.កម៉ូតូម៉ាកសេ១២៥ ពណ៌ខ្មៅ ស៊េរីឆ្នាំ២០១០ ។ រីឯស្រ្តីម្ចាស់ម៉ូតូឈ្មោះវ័រ ស៊ីណេត អាយុ៤៣ឆ្នាំ មានទីលំនៅសង្កាត់ក្រចេះ ក្រុងក្រចេះ បានឱ្យដឹងថា នៅព្រឹកថ្ងៃកើតហេតុ គាត់បានចតម៉ូតូទុកនៅចិញ្ចើមផ្លូវ ហើយចូលទៅក្នុងផ្សារត្រីដែលនៅក្បែរនោះ ដើម្បីហូបអាហារពេលព្រឹក ។ រយៈពេលមួយស្របក់ ក្រោយមកពេលចេញពីផ្សារមកវិញក៏បាត់ម៉ូតូតែម្តង ទើបមានការផ្អើលឆោឡោ ហើយប្តីរបស់គាត់ក៏បានប្តឹងប៉ូលិសឱ្យជួយអន្តរាគមន៍ ។
លោកហុង សុខលី អធិការនគរបាលស្រុកឆ្លូងបានឱ្យដឹងថា បន្ទាប់ពីទទួលបានព័ត៌មានពីការបាត់ម៉ូតូ និងកំណត់លើមុខសញ្ញាម៉ូតូដែលបាត់រួចមក កំលាំងប៉ូលិសតាមបណ្តាគោលដៅសហការជាមួយកំលាំងកងរាជអាវុធហត្ថបានធ្វើការត្រួតពិនិត្យលើមុខសញ្ញា ហើយក៏ស្ទាក់ឃាត់បានម៉ូតូសង្ស័យ១គ្រឿងនេះនៅចំណុចភូមិព្រែកចំឡាក់ ឃុំកញ្ជរ ស្រុកឆ្លូង ដែលនារីសង្ស័យកំពុងតែជិះយ៉ាងលឿនបំណងគេចខ្លួន ។ លោកអធិការបានឱ្យដឹងទៀតថា បន្ទាប់ពីឃាត់បានម៉ូតូមួយគ្រឿងនេះរួចមក សមត្ថកិច្ចក៏បាននាំខ្លួននារីសង្ស័យនេះមកធ្វើការសួរនាំទើបដឹងថា ម៉ូតូ១គ្រឿងនេះពិតជានាងបានលួចកាច់សោ.កយកមកប្រាកដមែន ។ បច្ចុប្បន្នទាំងម៉ូតូ និងនារីជាប់ចោទខាងលើ ត្រូវកំលាំងជំនាញនៃអធិការដ្ឋាននគរបាលស្រុក កសាងសំណុំរឿងបញ្ជូនមកកាន់ស្នងការដ្ឋាននគរបាលខេត្ត ដើម្បីចាត់ការតាមនីតិវិធី ៕
ចែករំលែកព័តមាននេះ