ខេត្តបន្ទាយមានជ័យ ៖ យ៉ាងហោចណាស់មនុស្សចំនួន៣នាក់បានរងរបួសធ្ងន់ និងម្នាក់ផ្សេងទៀតរបួសស្រាល ក្នុងហេតុការណ៍គ្រោះថ្នាក់ចរាចរណ៍២ករណីផ្សេងគ្នាបានកើតឡើងក្នុងថ្ងៃតែមួយគឺថ្ងៃទី២៣ កុម្ភៈ ឆ្នាំ២០១៩ នៅស្រុកថ្មពួក និងស្រុកព្រះនេត្រព្រះ។
ករណីទី១-រថយន្តមួយគ្រឿងបើកបររេចង្កូតធ្វើឱ្យក្រឡាប់ធ្លាក់ចូលប្រឡាយ បណ្តាឱ្យមនុស្ស២នាក់រងរបួសធ្ងន់ ។ ហេតុការណ៍គ្រោះថ្នាក់ចរាចរណ៍បង្កឡើងដោយខ្លួនឯងនេះបានកើតឡើងកាលពីវេលាម៉ោង៣និង៣០នាទីរសៀលថ្ងៃទី២៣ ខែកុម្ភៈ ឆ្នាំ២០១៩ ត្រង់ចំណុចព្រៃទាល់ ស្ថិតនៅភូមិបន្ទាយឆ្មារជើង ឃុំបន្ទាយឆ្មារ ស្រុកថ្មពួក ខាងជើងភូមិចម្ងាយប្រមាណជា ៥០០ម៉ែត្រ។
លោកវរសេនីយ៍ទោ សៅ សារឿន អធិការនគរបាលស្រុកថ្មពួក បានឲ្យដឹងថា រថយន្តមួយគ្រឿងខាងលើម៉ាកកាមរី ស៊េរីឆ្នាំ១៩៩៣ ពាក់ផ្លាកលេខ ភ្នំពេញ ២D-៥៧១៥ បើកបរដោយឈ្មោះ អៀ សំអឿន ភេទប្រុស អាយុ២៤ឆ្នាំ បានរងរបួសធ្ងន់ និងអ្នករួមដំណើរម្នាក់ឈ្មោះ ឈៀង ម៉ៃ ភេទប្រុស អាយុ១៩ឆ្នាំ បានរងរបួសធ្ងន់ ។ ជនរងគ្រោះទាំង២នាក់មានទីលំនៅភូមិរុងរឿង ឃុំអំពិល ស្រុកបន្ទាយអំពិល ខេត្តឧត្តរមានជ័យ ។
លោកអធិការបានបន្តថា មុនពេលកើតហេតុ គេឃើញរថយន្តមួយគ្រឿងជិះគ្នា២នាក់ធ្វើដំណើរក្នុងទិសដៅពីត្បូងទៅជើង ដោយបើកបរក្នុងស្ថានភាពស្រវឹង លុះពេលមកដល់ចំណុចកើតហេតុ ទំនងអ្នកបើកបរងោកមួយភាំង ក៍បណ្ដាលឲ្យរេចង្កូតក្រឡាប់ធ្លាក់ពីចេញពីផ្លូវចូលប្រឡាយ បណ្ដាលឲ្យអ្នកបើកបរ និងអ្នករួមដំណើរ រងរបួស(ធ្ងន់) និងត្រូវបានបញ្ជូនទៅព្យាបាលនៅមន្ទីពេទ្យបង្អែកស្រុកថ្មពួក ។ ចំណែករថយន្តរងការខូចខាងយ៉ាងដំណំ ។
ចំណែកករណីទី២-គ្រោះថ្នាក់ចរាចរណ៍រវាងរថយន្តបុកជាមួយរថយន្ត បណ្តាលឱ្យមនុស្សរងរបួសធ្ងន់ម្នាក់ និងស្រាលម្នាក់ ។ ហេតុការណ៍នេះបានកើតឡើងកាលពីវេលាម៉ោង២និង៣០នាទីតសៀលថ្ងៃទី២៣ កុម្ភៈ ២០១៩ ស្ថិតលើកំណាត់ផ្លូវលំឃុំបុស្បូវក្រៅ ទីប្រជុំជន ត្រង់ចំណុចខាងត្បូងលូអូរសសរវៀច ចំងាយប្រហែល៤០ម៉ែត្រ នៅភូមិបុស្បូវ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ។
លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា ភាគីខាងរថយន្តមួយគ្រឿងជិះគ្នា៣នាក់ម៉ាកកាមរី ស៊េរីឆ្នាំ១៩៩៦ ពណ៌ស ពាក់ផ្លាកលេខ សៀមរាប ២A-៣២៨៤ បើកបរដោយឈ្មោះហាក់ សារ៉ុង ភេទប្រុស អាយុ២៧ឆ្នាំ ចំណែកអ្នករួមដំណើរ២នាក់ ក្នុងនោះម្នាក់ឈ្មោះ ណែម ស៊ីណី ភេទស្រី អាយុ២២ឆ្នាំ ត្រូវជាប្រពន្ធអ្នកបើកបរ បានរងរបួសស្រាល និងម្នាក់ទៀតឈ្មោះវៀក ណាំវ៉ាន ភេទស្រី អាយុ១ឆ្នាំ ត្រូវជាក្មួយ បានរងរបួសធ្ងន់ ។ អ្នកទាំង៣រស់នៅភូមិបុស្សអូរ ឃុំផ្គាំ ស្រុកស្វាយចេក ខេត្តបន្ទាយមានជ័យ ។
ចំណែកភាគីខាងថយន្តមួយគ្រឿងទៀត ពណ៌ស្ករ ពាក់ផ្លាកលេខ ភ្នំពេញ ២F-៧៧០៧ បើកបរដោយឈ្មោះជួ វណ្ណារ៉េត ភេទប្រុស អាយុ៤២ នៅភូមិផ្លាស់កង់ ឃុំសារង្គ ស្រុកស្វាយចេក ខេត្តបន្ទាយមានជ័យ មិនមានរងរបួស ។
លោកអធិការនគរបាលស្រុកព្រះនេត្រព្រះបានឲ្យដឹងបន្តថា មុនពេលកើតហេតុ មានរថយន្តមួយគ្រឿងជិះគ្នា៣នាក់ម៉ាកកាមរីបានបើកបរក្នុងទិសដៅពីជើងទៅត្បូង លុះពេលមកដល់ចំណុចកើតហេតុខាងលើ ដោយសារស្ថានភាពផ្លូវកោង ហើយរថយន្តបើកបរក្នុងល្បឿនលឿនផងនោះបានរ៉េចង្កូតទៅខាងឆ្វេងដៃបុកពេញទំហឹងចំទ្វារចំហៀងខាងស្តាំរបស់រថយន្តមួយគ្រឿងទៀតពណ៌ស្ករ បើកបរក្នុងទិសដៅបញ្ច្រាសគ្នា បណ្ដាលអោយរថយន្តម៉ាកកាមរីធ្លាក់ពីលើផ្លូវក្រឡាប់ផ្ងាជើងឡើងលើ ធ្វើឱ្យស្ត្រីជាប្រពន្ធអ្នកបើកបររងរបួសស្រាល ចំណែកក្មួយស្រីអាយុ១ខួបរងរបួសធ្ងន់ រីឯរថយន្តទាំង២គ្រឿងរងការខូចខាតយ៉ាងដំណំផងដែរ ៕
ចែករំលែកព័តមាននេះ