លោកត្រាំគំរាមដាក់ពន្ធលើ EU ប្រសិនបើមិនមានកិច្ចព្រមព្រៀង
ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ (Donald Trump) របស់សហរដ្ឋអាមេរិកបានគំរាមកាលពីថ្ងៃទី២០ កុម្ភៈ ថា នឹងដាក់ពន្ធលើការនាំចូលយានយន្តពីអឺរ៉ុប…
ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ (Donald Trump) របស់សហរដ្ឋអាមេរិកបានគំរាមកាលពីថ្ងៃទី២០ កុម្ភៈ ថា នឹងដាក់ពន្ធលើការនាំចូលយានយន្តពីអឺរ៉ុប…
ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ (Donald Trump) របស់សហរដ្ឋអាមេរិកបានគំរាមកាលពីថ្ងៃទី២០ កុម្ភៈ ថា នឹងដាក់ពន្ធលើការនាំចូលយានយន្តពីអឺរ៉ុប ប្រសិនបើលោកមិនអាចសម្រេចបានកិច្ចព្រមព្រៀងពាណិជ្ជកម្មមួយជាមួយនឹងសហភាពអឺរ៉ុប(EU) ទេនោះ ។ នេះបើយោងតាមសារព័ត៌មាន Channel NewsAsia កាលពីថ្ងៃទី២១ កុម្ភៈ ម្សិលមិញ ។
ការគំរាមកំហែងថ្មីរបស់លោកត្រាំនេះកើតមានឡើងពីរថ្ងៃ បន្ទាប់ពីក្រសួងពាណិជ្ជកម្មអាមេរិកផ្ញើរបាយការណ៍មួយដែលប្រទះឃើញថារថយន្តដែលនាំចូលពីអឺរ៉ុបផ្តល់ការគំរាមកំហែងដល់សន្តិសុខជាតិរបស់សហរដ្ឋអាមេរិក ។
របាយការណ៍ខាងលើអាចអនុញ្ញាតឲ្យ White House ដាក់ពន្ធក្នុងរយៈពេល៩០ថ្ងៃ ប៉ុន្តែសហភាពអឺរ៉ុបបានសន្យាថា នឹងឆ្លើយតបវិញ ប្រសិនបើកើតមានឡើងពិតមែន ។ សហរដ្ឋអាមេរិកបានប្រើសន្តិសុខជាតិដើម្បីដាក់ពន្ធលើការនាំចូលដែកថែបនិងអាលុយមីញ៉ូមរួចទៅហើយ ដែលបង្កឲ្យ EU កាណាដា ម៉ិកសិក និងប្រទេសចិន ឆ្លើយតបជាមួយនឹងការដាក់ពន្ធលើផលិតផលអាមេរិកវិញ ។
លោកប្រធានាធិបតីត្រាំបានគំរាមថា នឹងដាក់ពន្ធ២៥%លើយានយន្តដែលនាំចូលពីប្រទេសអឺរ៉ុប ជាពិសេសអាល្លឺម៉ង់ដែលលោកបាននិយាយថា បង្កការប៉ះពាល់ដល់វិស័យរថយន្តអាមេរិក ។
យ៉ាងណាក្តី លោកប្រធានាធិបតីខាងលើបានព្រមព្រៀងគ្នាក្នុងការផ្អាកការដាក់ពន្ធលើ EU បន្ទាប់ពីមានកិច្ចប្រជុំមួយកាលពីខែកក្កដាមុនជាមួយនឹងប្រធានគណៈកម្មាធិការអឺរ៉ុបលោក Jean-Claude Juncker ប៉ុន្តែលោកត្រាំបានបង្ហាញថា លោកមិនពេញចិត្តនឹងស្ថានការណ៍នៃការចរចានេះឡើយ ។
លោកប្រធានាធិបតីត្រាំបាននិយាយថា ៖« ពួកយើងកំពុងតែព្យាយាមសម្រេចឲ្យបានកិច្ចព្រមព្រៀងមួយ។ ពួកគេពិតជាពិបាកក្នុងការសម្រេចកិច្ចព្រមព្រៀងជាមួយណាស់ »។ ប៉ុន្តែការចរចាជាមួយ EU មិនទាន់បានចាប់ផ្តើមទេ។ គណៈកម្មាធិការអឺរ៉ុបត្រូវទទួលបានការអនុញ្ញាតពីសមាជិកលើការចរចាសិន មុននឹងអាចចាប់ផ្តើមការចរចាបាន ។
ភាគីទាំងសងខាងមានការខ្វែងគំនិតគ្នាលើបញ្ហាមួយចំនួនដូចជា សហរដ្ឋអាមេរិកមានគោលដៅចង់ចរចាពីវិស័យកសិកម្ម ខណៈដែល EU ប្រឆាំង និងចង់ឲ្យការចរចាផ្តោតសំខាន់តែលើផលិតផលឧស្សាហកម្ម និងនិយ័តកម្មប៉ុណ្ណោះ ៕
ចែករំលែកព័តមាននេះ