ប្រទេសវៀតណាម ៖ សារព័ត៌មាន Bloomberg បានឲ្យដឹងកាលពីថ្ងៃទី១៩ កុម្ភៈ កន្លងមកថា ប្រទេសវៀតណាមគឺជាទីផ្សារថ្មីដ៏មានប្រជាប្រិយភាពសម្រាប់អតិថិជនដែលចាប់អារម្មណ៍លើអចលនទ្រព្យថ្នាក់ខ្ពស់ ។
តាំងពីមានការបើកទទួលយកការវិនិយោគពីបរទេស និងកាត់បន្ថយការគ្រប់គ្រងលើក្រុមហ៊ុនឯកជន ប្រទេសវៀតណាមបានស្ថិតក្នុងចំណោមប្រទេសដែលលូតលាស់លឿនជាងគេជុំវិញពិភពលោកដោយសេដ្ឋកិច្ចលូតលាស់បានជាមធ្យមច្រើនជាង ៦%ទៅទៀតក្នុងមួយឆ្នាំក្នុងរយៈពេល២០ឆ្នាំកន្លងមកនេះ ។
ក្នុងពេលថ្មីៗនេះ រោងចក្រដែលប្តូរទីតាំងផលិតកម្មពីប្រទេសចិនទៅកាន់វៀតណាមក៏បានជួយឲ្យផលិតផលក្នុងស្រុកសរុប (GDP) របស់វៀតណាមលូតលាស់បាន៧%ផងដែរកាលពីឆ្នាំមុន ។ ស្ថានការនេះបានទាក់ទាញវិនិយោគិនបរទេសឲ្យងាកមកកាន់វិស័យអចលនទ្រព្យរបស់វៀតណាម ខណៈដែលមានប្រជាជនក្នុងស្រុកកាន់តែច្រើនចាប់ផ្តើមចូលក្នុងទីផ្សារនេះ ។
លោក Goodwin Gaw ដែលជាអគ្គនាយកក្រុមហ៊ុន Gaw Capital Partners បាននិយាយថា វៀតណាមគឺជាប្រទេសចិនប៉ែកខាងត្បូងកាលពី១០ទៅ ១៥ឆ្នាំមុន ។ លោកបានបន្ថែមថា វាមិនទាន់ច្បាស់នៅឡើយទេព្រោះតម្លៃផ្ទះបន្តកើនឡើងជាបន្តបន្ទាប់ក្នុងរយៈពេល១៨ខែមកនេះ ប៉ុន្តែ ក្នុងរយៈពេលវែង វានឹងល្អប្រសិនបើអ្នក ។
យោងទៅតាមក្រុមហ៊ុន CBRE Group Inc. បានឲ្យដឹងថា តម្លៃខុនដូថ្នាក់ខ្ពស់ក្នុងទីក្រុងហូជីមិញបានកើនឡើង ១៧%កាលពីឆ្នាំ ២០១៨ មកស្មើជាមធ្យមប្រមាណ៥,៥១៨ដុល្លារក្នុងមួយម៉ែត្រការេ និងបានព្យាករណ៍ទៀតថាតម្លៃអាចនឹងកើនឡើងជិត ១០%នៅដើមឆ្នាំ ២០២០ មកស្មើ ៦ពាន់ដុល្លារក្នុងមួយម៉ែត្រការេ ។
បើទោះជាតម្រូវការវិនិយោគិនបរទេសនៅរឹងមាំពិតមែនក្តី អតិថិជនថ្មីៗក្នុងទីផ្សារនេះជាប្រជាជនវៀតណាមដែលមានទ្រព្យសម្បត្តិច្រើន ។ យោងទៅតាមរបាយការណ៍មួយរបស់ Knight Frank កាលពីឆ្នាំ ២០១៧បានឲ្យដឹងថា ចំនួនប្រជាជនវៀតណាមដែលមានទ្រព្យសម្បត្តិស្មើនិងច្រើនជាង៣០លានដុល្លារបានកើនឡើងដល់ទៅ ៣០២%ពីឆ្នាំ ២០០៦ ដល់២០១៦ ៕
ចែករំលែកព័តមាននេះ