តាមការស្រាវជ្រាវបានបង្ហាញឲ្យដឹងថា ការសម្លឹងមើលស្គ្រីនទូរស័ព្ទស្មាតហ្វូនយូរ គឺអាចធ្វើឲ្យប៉ះពាល់ភ្នែករបស់អ្នក ។ លោកវេជ្ជបណ្ឌិត Justin Bazan ឯកទេសភ្នែក និងជាទីប្រឹក្សារបស់ The…
តាមការស្រាវជ្រាវបានបង្ហាញឲ្យដឹងថា ការសម្លឹងមើលស្គ្រីនទូរស័ព្ទស្មាតហ្វូនយូរ គឺអាចធ្វើឲ្យប៉ះពាល់ភ្នែករបស់អ្នក ។ លោកវេជ្ជបណ្ឌិត Justin Bazan ឯកទេសភ្នែក និងជាទីប្រឹក្សារបស់ The Vision Council បានប្រាប់ថា ៖« ព្រោះតែកំណើននៃការប្រើប្រាស់បច្ចេកវិទ្យាឌីជីថល មនុស្សជាច្រើនបានជួបប្រទះនឹងបញ្ហាភ្នែកមិនស្រួល បន្ទាប់ពីពួកគេប្រើវារយៈពេលជាង២ម៉ោង » ។
ស្គ្រីនទូរស័ព្ទស្មាតហ្វូនអាចប៉ះពាល់ដល់សុខភាពភ្នែកបានដោយច្រើនវិធី ។ នៅពេលយើងសំឡឹងមើលស្គ្រីនណាមួយ គឺយើងព្រិចភ្នែកតិចជាងពេលធម្មតា ។ តាមការសិក្សាមួយនៅឆ្នាំ២០១៧ ប្រទះឃើញថា អ្នកដែលចំណាយពេលច្រើនក្នុងការប្រើប្រាស់ស្មាតហ្វូន ឬថេបប្លេត ពួកគេអាចនឹងងាយមានជំងឺភ្នែកស្ងួត ។ វាជាជំងឺដែលភ្នែកមិនអាចផលិតភាពសើមបានគ្រប់គ្រាន់ដើម្បីការពារភ្នែក និងធ្វើឲ្យភ្នែកអាចឆ្លងជំងឺ ឬរលាកដោយងាយ ។
ការសិក្សានេះក៏បានរកឃើញទៀតថា នៅពេលយើងឈប់ប្រើស្មាតហ្វូន មុខសញ្ញានៃជំងឺនេះនឹងកាត់បន្ថយបានយ៉ាងខ្លាំង ។ ការឈឺភ្នែក ក៏អាចបង្កឡើងដោយពន្លឺរបស់ស្គ្រីនទូរស័ព្ទ ដែលយើងកំពុងតែសំឡឹងមើលផងដែរ ។
ប្រសិនបើយើងសំឡឹងមើលស្គ្រីនទាំងនេះជាញឹកញាប់ លោកវេជ្ជបណ្ឌិត Bazan បានប្រាប់ពីវិធីមួយចំនួនក្នុងការការពារភ្នែក ថា ៖« ការពាក់វ៉ែនតាដែលមានកញ្ចក់ពង្រីក ការពារការចាំង និងការពារពន្លឺពណ៌ខៀវ គឺវាអាចជួយកាត់បន្ថយមុខសញ្ញាដែលទាក់ទងនឹងការរោយភ្នែក ។ អ្នកគួរតែដាក់ឧបករណ៍ឲ្យឆ្ងាយពីមុខប្រមាណ១ហត្ថផងដែរ ឬពង្រីកទំហំអក្សរ ហើយឧស្សាហ៍ងាកចេញពីស្គ្រីន ដើម្បីកាត់បន្ថយពន្លឺចាំងមកលើភ្នែករបស់អ្នក » ៕
ចែករំលែកព័តមាននេះ