រាជធានីភ្នំពេញ៖ រហូតមកដល់ពេលនេះដំណឹងពីការត្រៀមចាកចេញពីផលិតថោនរបស់តារាចម្រៀងអ្នកនាងមាស សុខសោភា កំពុងតែមានការចាប់អារម្មណ៍យ៉ាងខ្លាំង ក្នុងពេលដែលព័ត៌មាននេះត្រូវបានចុះផ្សាយពីបណ្តាញសារព័ត៌មាននៅក្នុងស្រុកជាបន្តបន្ទាប់។ មិនមានការបញ្ជាក់ឲ្យច្បាស់លាស់ពីការចាកចេញពីផលិតថោនរបស់មាស សុខសោភា នៅពេលណានោះឡើយ ប៉ុន្តែដំណឹងនៃការចាកចេញនេះទំនងជាកើតមានឡើង ។…
រាជធានីភ្នំពេញ៖ រហូតមកដល់ពេលនេះដំណឹងពីការត្រៀមចាកចេញពីផលិតថោនរបស់តារាចម្រៀងអ្នកនាងមាស សុខសោភា កំពុងតែមានការចាប់អារម្មណ៍យ៉ាងខ្លាំង ក្នុងពេលដែលព័ត៌មាននេះត្រូវបានចុះផ្សាយពីបណ្តាញសារព័ត៌មាននៅក្នុងស្រុកជាបន្តបន្ទាប់។
មិនមានការបញ្ជាក់ឲ្យច្បាស់លាស់ពីការចាកចេញពីផលិតថោនរបស់មាស សុខសោភា នៅពេលណានោះឡើយ ប៉ុន្តែដំណឹងនៃការចាកចេញនេះទំនងជាកើតមានឡើង ។ បើយោងតាមការចុះផ្សាយរបស់សារព័ត៌មាននៅក្នុងស្រុកមួយកាលពីពេល ថ្មីៗកន្លងមកឲ្យដឹងថា មាស សុខសោភា កំពុងតែពិចារណាក្នុងការចាកចេញពីផលិតកម្មថោន តែមិនទាន់កំណត់ពេលជាក់លាក់នោះទេ ។ មាស សុខសោភា ក៏បានឲ្យដឹងផងដែរថា ពេលនេះ នាងកំពុងតែរវល់ក្នុងការថតបទ ថ្មីៗដែលជាបទប្រពៃណី សម្រាប់ចេញក្នុងពិធីបុណ្យចូលឆ្នាំថ្មី ប្រពៃណីជាតិខ្មែរនាពេលខាងមុខនេះ ។
មាស សុខសោភា បញ្ជាក់ថា សម្រាប់ការសម្រេចចិត្តក្នុងការចាកចេញពីផលិតកម្មថោននៅពេលណានោះ នាងនឹងជម្រាបជូននៅពេលក្រោយ ។
ជាការកត់សម្គាល់មានការលើកឡើងថា ការចាកចេញពីផលិតកម្មថោនរបស់ មាស សុខសោភា នេះនាងអាចនឹងពិចារណាចូលមកជ្រកនៅក្នុងផលិតហង្សមាសដែលជាផលិតដ៏ធំមួយ។ ប្រសិនបើមាស សុខសោភា ពិតជាទៅផលិតហង្សមាសមែននោះ គេរំពឹងថា តារាចម្រៀងរូបនេះអាចនឹងដណ្តើបានទីផ្សារខ្ពស់បន្ថែមទៀត ដោយសារតែនាងមានអ្នកគាំទ្រច្រើនស្រាប់ ។
ពាក់ព័ន្ធរឿងនេះកោះសន្តិភាពមិនអាចសុំការបកស្រាយបន្ថែមណាមួយពីតារាចម្រៀងមាស សុខ សោភា បានទេ ខណៈពេលបងប្រុសរបស់នាងគឺលោកមាស សុខរតនៈ ក៏មិនមានការឆ្លើយតបណាមួយឡើយគិតត្រឹមថ្ងៃទី១៨ ខែកុម្ភៈ ឆ្នាំ២០១៩នេះ ។
ករណីដែលមាស សុខសោភា ពិតជាចាកចេញពីផលិតថោន ទៅនៅហង្សមាស ពិតប្រាកដមែននោះវានឹងធ្វើឲ្យផលិតកម្មដ៏ធំមួយនេះកាន់តែខ្លាំង ព្រោះបានប្រមូលផ្តុំទៅដោយតារាចម្រៀងដ៏ល្បីប្រចាំប្រទេស៕
ចែករំលែកព័តមាននេះ