ខេត្តកំពង់ឆ្នាំង ៖ ក្រុមអ្នកកាសែត១ក្រុមបានប្រទះឃើញគោយន្តចំនួន៥គ្រឿងដឹកឈើអារពេញដោយក្នុង១គោយន្តៗមានចាប់ពី៥ទៅ៦ម៉ែត្រគូបដឹកឆ្លងកាត់ផ្នែករដ្ឋបាលព្រៃឈើរមាសទាំងថ្ងៃតែសមត្ថិច្ចជំនាញជាអ្នកបង្ក្រាបបែរជានាំគ្នាដេកយោលអង្រឹងធ្វើមិនឃើញ មិនឮ គឺមិនព្រមបង្ក្រាបនោះឡើយ ។
ក្រុមអ្នកដឹកឈើខុសច្បាប់ម្នាក់ក្នុងចំណោមគោយន្តទាំង៥គ្រឿងបានប្រាប់ក្រុមអ្នកកាសែតថា ៖ ពួកគាត់បានដឹកឈើនេះចេញមកពីស្រុកភ្នំក្រវ៉ាញ ខេត្តពោធិសាត់ ដោយបានបង់លុយក្នុង១គោយន្តៗអោយជំនាញរដ្ឋបាលព្រៃឈើគ្រប់ទីកន្លែងដោយក្នុងនោះនៅស្រុកភ្នំក្រវ៉ាញនោះអស់៤០ម៉ឺនរៀល, បង់លុយអោយជំនាញរដ្ឋបាលព្រៃឈើនៅឃុំបំណក់ ខេត្តពោធិ៍សាត់ ចំនួន៤០ម៉ឺនរៀល, បង់លុយអោយសង្កាត់រដ្ឋបាលព្រៃឈើក្តុល ស្រុកទឹកផុស ខេត្តកំពង់ឆ្នាំង ចំនួន៤០ម៉ឺនរៀល និងបង់លុយអោយផ្នែករដ្ឋបាលព្រៃឈើរមាស ស្រុកទឹកផុស ខេត្តកំពង់ឆ្នាំងបង់៣០ម៉ឺនរៀល ។
ដោយឡែកបង់អោយក្រុមនគរបាល និងកងរាជអាវុធហត្ថដែលឈរជើងនៅតាមទីតាំងរដ្ឋបាលព្រៃឈើគ្រប់កន្លែងគឺក្នុង១អង្គភាពៗចំនួន១០ម៉ឺនរៀល និងប៉ុស្តិ៍នគរបាលរដ្ឋបាលគ្រប់កន្លែងពី១ទៅ២ម៉ឺនរៀលទៀតទើបឆ្លងកាត់រួច ។
ក្រោយពីបានឃើញបទល្មើសដឹកឈើខុសច្បាប់បែបនេះក្រុមអ្នកកាសែតបានរាយការណ៍ទៅលោក ថោង វ៉ាន់វីរ៉ាវុឌ្ឍី នាយខណ្ឌរដ្ឋបាលព្រៃឈើខេត្តកំពង់ឆ្នាំង តែត្រូវលោកប្រាប់ថា ៖ អោយក្រុមអ្នកកាសែតជួយថតរូបបទល្មើសបញ្ជូនរូបភាពមកអោយគាត់មើលសិន ! បើមានមែនលោកនឹងបញ្ជារកូនចៅគាត់អោយចុះទៅចាប់ ព្រោះលោកកំពុងជាប់ប្រជុំ ។
ក្រោយពីអ្នកកាសែតបានបាញ់រូបអោយលោកមើលតាមតេឡេក្រាមរួចហើយ គឺលោកមិនបានមើលនោះទេ ដោយប្រាប់ថា លោកកំពុងជាប់ប្រជុំគឺគេទុកឱកាសអោយបទល្មើសគេចខ្លួនមិនទទួលខុសត្រូវចំពោះតួនាទីរបស់ខ្លួនឡើយ ។
ករណីនេះក្រុមអ្នកកាសែតក៏បានទូរស័ព្ទរាយការណ៍ជូនលោក វន ស៊ីផា អភិបាលស្រុកសាមគ្គីមានជ័យ ព្រោះបទល្មើសបានឆ្លងដែនពីស្រុកទឹកផុសចូលដល់ស្រុកសាមគ្គីមានជ័យហើយ ពេលនោះលោកអភិបាលស្រុកសាមគ្គីមានជ័យក៏បានបញ្ជារមន្ត្រីអធិការនគរបាលស្រុក និងនគរបាលប៉ុស្តិ៍រដ្ឋបាលសហការគ្នាចាប់បានគោយន្តដឹកឈើខុសច្បាប់២គ្រឿង ចំណែកគោយន្ត៣គ្រឿងទៀតបានគេចចូលពួនតាមផ្លូវបាត់អស់តែម្តង ។
ប្រជាពលរដ្ឋរស់នៅតាមដងផ្លូវបានបញ្ជាក់អោយដឹងថា បទល្មើសព្រៃឈើបានដឹកឆ្លងកាត់ពីខេត្តពោធិ៍សាត់ មកស្រុកទឹកផុសជារៀងរាល់ថ្ងៃដូចគេហែរកឋិន ប៉ុន្តែមិនដែលឃើញជំនាញបង្ក្រាបម្តងណាឡើយប៉ុន្តែយូរៗឃើញចាប់ម្តងសង្ស័យសម្ងំចាំយកលុយ ។
ជុំវិញករណីនេះប្រជាពលរដ្ឋស្នើសុំលោកប្រធានមន្ទីរកសិកម្មខេត្តកំពង់ឆ្នាំង និងឯកឧត្តរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ សូមជួយពិនិត្យមើលកូនចៅជាមន្ត្រីជំនាញកំពុងធ្វើអោយខូចឈ្មោះស្ថាប័នអស់ហើយ ព្រោះតែដើម្បីប្រាក់ភ្លេចគិតតួនាទីខ្លួនឯង ៕
ចែករំលែកព័តមាននេះ