ខេត្តរតនគិរី ៖ មន្ត្រីមនី្ទរសុខាភិបាលខេត្តរតនគិរីបានឱ្យដឹងថា កាលពីថ្ងៃទី១៩ កុម្ភៈ ស្ត្រីម្នាក់បានឆ្លងទន្លេតាមផ្លូវ ដោយសារតែមិនអាចមកកាន់មណ្ឌលសុខភាពទាន់ពេលវេលា តែត្រូវបានក្រុមមន្ត្រីឆ្មបនៃមណ្ឌលសុខភាព បានចេញទៅជួយសង្គ្រោះទាន់ពេលវេលា និងសម្រាលបាន កូនប្រុសម្នាក់មានទម្ងន់៣,៩០គីឡូក្រាម ។
ប្រភពដដែលបានរៀបរាប់ថា នៅវេលាម៉ោង៥ និង៣០នាទីព្រឹកថ្ងៃទី១៩ កុម្ភៈ មន្ត្រីឆ្មបនៃមណ្ឌលសុខ ភាពកាចាញ បានទៅអន្តរាគមន៍សង្គ្រោះស្ត្រីឆ្លងទន្លេតាមផ្លូវឈ្មោះ សោម ស្រីណៃ នៅភូមិបីតាផ្លើន សង្កាត់កាចាញ ក្រោយពេលទទួលបានព័ត៌មាន ។ ស្ត្រីរូបនេះ សម្រាលបានកូនប្រុសដែលជាកូនទី២ និងមានឪពុកឈ្មោះ វេត សារ៉េត អាយុ២៤ឆ្នាំ ។
ការជួយអន្តរាគមន៍សង្គ្រោះគឺទទួលបានសុវត្ថិភាពទាំងកូននិងម្តាយ នៅកណ្តាលផ្លូវតែម្តង ព្រោះទៅពេទ្យមិនទាន់ដល់ ។ គ្រូពេទ្យនិយាយថា ការឆ្លងទន្លេតាមផ្លូវនេះគឺដោយសារតែស្ថានភាពផ្លូវលំបាកមានជ្រោះជ្រលងនិងផ្លូវលំឡើងចុះកាត់តាមចម្ការកៅស៊ូ ។
តាមព័ត៌មានថា ពីផ្ទះទៅមណ្ឌលសុខភាពមានចម្ងាយប្រមាណ៤ឬ៥គីឡូម៉ែត្រប៉ុណ្ណោះ តែដោយស្ថានភាពផ្លូវព្រៃភ្នំតម្រូវឱ្យជិះម៉ូតូទៀតទើបទៅពេទ្យមិនទាន់ ៕
ចែករំលែកព័តមាននេះ