ខេត្តត្បូងឃ្មុំ ៖ តាមសេចក្តីរាយការណ៍បឋមឲ្យដឹងថា ជនសង្ស័យចំនួន៣នាក់ជាប់ពាក់ព័ន្ធអំពើប្លន់ ត្រូវបានកម្លាំងសមត្ថកិច្ចនគរបាលខេត្តត្បូងឃ្មុំក្របួចបានទាំងអស់ ក្រោយពីធ្វើសកម្មភាពប្លន់យកម៉ូតូ១គ្រឿងពីជនរងគ្រោះ២នាក់ម្តាយ និងកូនដែលកំពុងជិះឌុបគ្នាទៅមើលល្ខោនបាសាក់ ។
ជនសង្ស័យទាំង៣នាក់ខាងលើ ១-ឈ្មោះ ជា បូណា ភេទប្រុស អាយុ៣០ឆ្នាំ រស់នៅភូមិស្រែតានង ឃុំចាន់មូល ស្រុកមេមត់ ខេត្តត្បូងឃ្មុំ ២-ឈ្មោះ វិត សុធា ភេទប្រុស អាយុ២៤ឆ្នាំ រស់នៅភូមិស្រែតានង ឃុំចាន់មូល ស្រុកមេមត់ ខេត្តត្បូងឃ្មុំ និង៣-ឈ្មោះ នុត ហន ភេទប្រុស អាយុ២៣ ឆ្នាំ រស់នៅភូមិជីវ ឃុំស្រែចារ ស្រុកស្នួល ខេត្តក្រចេះ ។
តាមសេចក្តីរាយការណ៍បានឲ្យដឹងថា កាលពីវេលាម៉ោង១០យប់ថ្ងៃទី១៩ កុម្ភៈ ២០១៩ នៅចំនុចផ្លូវលំ ស្ថិតនៅភូមិស្អំ ឃុំចាន់មូល ស្រុកមេមត់ ខេត្តត្បូងឃ្មុំ មានករណីលួចមានស្ថានទម្ងន់ទោស (ប្លន់) យកម៉ូតូមួយគ្រឿងម៉ាកហុងដាឌ្រីមសង់១២៥ ពណ៌ខ្មៅ ស៊េរីឆ្នាំ២០១៦ បង្កឡើងដោយជនល្មើសចំនួន៣នាក់ ខណៈជនរងគ្រោះជាកូនកំពុងឌុបម្តាយទៅមើលល្ខោនបាសាក់តាមជនបទ ។
ក្រោយកើតមានអំពើប្លន់នោះ កម្លាំងសមត្ថកិច្ចនគរបាលជំនាញស្រុកមេមត់ ចុះស្រាវជ្រាវជាបន្ទាន់ និងបានកំណត់មុខ សញ្ញាតែរយៈពេល១ថ្ងៃ គឺនៅថ្ងៃទី២០ កុម្ភៈ ឈានដល់ការ ក្របួចក្រុមជនសង្ស័យទាំង៣នាក់នោះ រួមទាំងដកហូតបានម៉ូតូជនរងគ្រោះវិញផងដែរ ។ ជនសង្ស័យត្រូវបានសមត្តកិច្ចកសាងសំណុំរឿងបញ្ជូនទៅកានសាលាដំបូងខេត្តតាមនីតិវិធី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ