រាជធានីភ្នំពេញ៖ ពេញមួយឆ្នាំ២០១៨កន្លងទៅនេះខ្សែភាពយន្តដុំខ្មែរដែលបានផលិតនិងដាក់បញ្ចាំងមានចំនួន៤៣រឿង ។ ចំនួននេះ បើប្រៀបធៀបទៅឆ្នាំ២០១៧គឺមានការកើនឡើង ។
ប្រធាននាយកដ្ឋានភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈលោកប៉ុក បូរក្ស ឲ្យដឹងថា នាឆ្នាំ២០១៨កន្លងទៅនេះការផលិតខ្សែភាពយន្តដុំរបស់ខ្មែរគឺមានការកើនឡើងបន្តិចជាងឆ្នាំ២០១៧ ពោលគឺកើនពី៣៥រឿងរហូតដល់៤២រឿង ។ ចំនួននេះគឺគិតតែភាពយន្តដុំប៉ុណ្ណោះ ចំណែកការផលិតភាពយន្តភាគសម្រាប់ដាក់បញ្ចាំងតាមស្ថានីយទូរទស្សន៍មិនមានទិន្នន័យឡើយ ព្រោះមិនស្ថិតក្រោមការគ្រប់គ្រងរបស់នាយកដ្ឋានភាពយន្តនោះ ។
បើតាមលោកប៉ុក បូរក្ស សម្រាប់ទិន្នន័យសម្រាប់ឆ្នាំ២០១៩វិញគឺលោកមិនទាន់អាចដឹងបាននៅឡើយទេ ព្រោះទើបតែដើមឆ្នាំ ប៉ុន្តែបានទទួលការស្នើសុំការចាក់បញ្ចាំងខ្សែភាពយន្តជាបន្តបន្ទាប់ ដោយនៅក្នុងនោះអំឡុងខែកុម្ភៈបានអនុញ្ញាតឲ្យបញ្ចាំងនៅរោងភាពយន្តចំនួន៤រឿងរួចហើយ ។
និយាយជារួមការផលិតកុនខ្មែរគឺមិនមានការថយចុះឡើយ ហើយចំនួនរោងភាពយន្តក៏មានការកើនឡើង ខណៈពេលដែលចំនួនទស្សនិកជនដែលបានចូលទស្សនាក៏មានការកើនឡើងគួរឲ្យកត់សម្គាល់ផងដែរ ។
កត្តាមួយចំនួនដែលនាំឲ្យមានការកើនឡើងនៃចំនួនខ្សែភាពយន្តនេះ គឺដោយសារការផលិតរឿងគឺឆ្លងមកពីឆ្នាំ២០១៧ ពោលមកពីរឿងដែលបាននៅសេសសល់ពីចុងឆ្នាំចាស់ មិនបានដាក់បញ្ចាំង ហើយបានដាក់បញ្ចាំងនៅក្នុងឆ្នាំ២០១៨ ទើបបណ្តាលឲ្យវាមានការកើនឡើង។ បញ្ហានេះក៏វាអាស្រ័យទៅលើការកើនឡើងនៃរោងភាពយន្តផងដែរ ដែលវាបានធ្វើឲ្យចំណែកទីផ្សារកាន់តែធំ និងបានទាក់ទាញផលិតករនៅក្នុងផលិតរបស់ខ្លួនផងដែរ ។
ចំនួនទស្សនិកជនដែលបានប្រមូលតួលេខពីតាមរោងភាពយន្តដោយគិតទាំងការចូលទស្សនាភាពយន្តខ្មែរ និងភាពយន្តបរទេសនោះគឺមានការកើនឡើងប្រមាណ៥ភាគរយ ។
ពាក់ព័ន្ធទៅនឹងការផលិតរឿងដោយមានគុណភាពជាងមុនឬយ៉ាងណានោះលោកប៉ុក បូរក្ស ថ្លែងថា «គុណភាពនៃការផលិតគឺមិនទាន់មានការកើនឡើងណាមួយគួឲ្យកត់សម្គាល់នៅឡើយទេ ។ ការផលិតរបស់ផលិតករយើងបច្ចុប្បន្ននេះគឺតម្រូវតែទៅលើទីផ្សារនៃទស្សនិកជនដែលចូលចិត្តទស្សនារឿងខ្មោច រឿងកំប្លែងតែប៉ុណ្ណឹ ហើយបើនិយាយពីគុណភាពគឺមិនមានការវិវឌ្ឍឈានឡើងណាស់ណានោះឡើយ »។
លោកប៉ុក បូរក្ស លើកឡើងថា ដើម្បីជាការលើកទឹកចិត្ត និងជំរុញផលិតករឲ្យផលិតខ្សែភាពយន្តបន្ថែមនោះ ក្រសួងវប្បធម៌បានធ្វើកិច្ចការជាច្រើនពាក់ព័ន្ធនឹងផ្នែកមួយនេះ។ ក្រសួងបានធ្វើការជាមួយក្រសួងស្ថាប័នជាច្រើន ដើម្បីសម្រួលដល់ផលិតករសម្រាប់ផ្តល់ជាទីកន្លែងថត និងបានលើកសំណើទៅកាន់ស្ថាប័នពន្ធដារដើម្បីសុំលើកលែងការយកពន្ធពីផលិតករខ្មែរ ដែលបញ្ហានេះកំពុងតែរង់ចាំការឆ្លើយតបពីក្រសួងសេដ្ឋកិច្ច និងហិរញ្ញវត្ថុ ។
ដោយឡែកសម្រាប់ចំណុចដែលត្រូវធ្វើនៅឆ្នាំ២០១៩នេះ គឺនឹងពិនិត្យមើលការបែងចែកភាគលាភរវាងផលិតករ និងរោងភាពយន្ត ជាពិសេសលក្ខខណ្ឌមួយចំនួនទៀតដែលគិតថា នឹងអាចផ្តល់នូវអត្ថប្រយោជន៍បន្ថែមដល់ផលិតករភាពយន្ត ៕
ចែករំលែកព័តមាននេះ