ខេត្តរតនគិរី ៖ សូមរំលឹកថា កាលពីថ្ងៃទី២៤ កញ្ញា ឆ្នាំ២០១៨កន្លងមក មានករណីរំលោភសម្លាប់លើនារីក្រមុំអាយុ២០ឆ្នាំម្នាក់ នៅចំណុចចមការកៅស៊ូក្នុងភូមិពាក់ ឃុំយាទង់ ស្រុកអូរយ៉ាដាវ ប៉ន្តែរហូតមកទល់ថ្ងៃទី២០ កុម្ភៈ ឆ្នាំ២០១៩ នេះ សមត្ថកិច្ចនៅមិនទាន់អាចវែកមុខរកឃាតករឃើញនៅឡើយ ខណៈម្តាយនាងក្រមុំរងគ្រោះ បានយំទួញសោកជារៀងរាល់ថ្ងៃ រហូតដល់គាត់បានស្លាប់ផងដែរ ។
នារីដែលត្រូវឃាតកររំលោភសម្លាប់ខាងលើ គឺមានអាយុ២០ឆ្នាំ និងមានស្រុកកំណើតនៅភូមិស្វាយ ទាបឃុំតាប្រុក ស្រុកចំការលើ ខេត្តកំពង់ចាម ។ រីឯម្តាយដែលទើបនិងស្លាប់នោះ មានឈ្មោះឌឹប ហ៊ុន អាយុ៤៨ឆ្នាំ (គាត់ស្លាប់២ខែមុន) ។
ប្រភពបន្តថា ដោយសារជីវភាពក្នុងគ្រួសារជនរងគ្រោះក្រីក្រលំបាកពេក ក៏ដាច់ចិត្តនាំកូនស្រីទៅស៊ីឈ្នួលចាក់ជ័រកៅស៊ូឱ្យគេនៅស្រុកអូរយ៉ាដាវ ខេត្តរតនគិរី (ទីកន្លែងកើតេហតុ) រយៈពេលជាងមួយឆ្នាំ ដើម្បីបានលុយមកផ្គត់ផ្គង់និងចង់ធ្វើផ្ទះឱ្យបានធំផង ។ ក្រោយមក ក៏បានទៅចម្ការកៅស៊ូនិងចាក់ជ័រឱ្យថៅកែឈ្មោះ
រិន និងប្រពន្ធឈ្មោះពៅ ស្ថិតនៅភូមិពាក់ ឃុំយ៉ាទង់ ស្រុកអូរយ៉ាដាវ ខេត្តរតនគិរី ។
ស្រាប់តែនៅថ្ងៃទី២៤ មីនា ឆ្នាំ២០១៨ ខណៈម្តាយមកទិញម្ហូបនៅផ្សារឆ្ងាយពីចំការជិត១ម៉ោង ។ លុះពេលគាត់ត្រឡប់ទៅវិញ នៅមិនឃើញកូនស្រី ក៏បានប្រាប់ឈ្មោះរ៉ន ស្រីហ៊ាន់ ឱ្យជួយដើររកកូន ។ ប៉ុន្តែនៅតែរកមិនឃើញ ម្តាយក៏បានប្តឹងសមត្ថកិច្ច ឱ្យជួយអន្តរាគមន៍ ។
ប្រភពបន្តទៀតថា លុះនៅព្រឹកឡើងថ្ងៃទី២៥ខែ មីនា ទើបត្រូវប្រទះឃើញសពកូនស្រីស្លាប់ទាំងអាក្រាតកាយនៅគុម្ពចេក ក្រោយចំការកៅស៊ូរបស់ថៅកែឈ្មោះរិន និងប្រពន្ធឈ្មោះពៅ នោះតែម្តង ។
ហើយមកទល់ពេលនេះ មានរយៈពេលជិត១ឆ្នាំមកហើយ ដែលសមត្ថកិច្ចរកឃាតករមិនឃើញដដែល ។
ទាក់ទងករណីឃាតកម្មនេះដែរ ពលរដ្ឋម្នាក់ដែលរស់នៅស្រុកអូរយ៉ាដាវ គាត់ឱ្យកោះសន្តិភាពដឹងថា បើគ្មានលុយឱ្យសមត្ថកិច្ចទេ គឺមិនរកយុត្តិធម៌ឃើញឡើយ ។ យ៉ាងណានោះ កោះសន្តិភាពនឹងផ្សាយជូនបន្តទៀតលើករណីនេះ ៕
ចែករំលែកព័តមាននេះ