ខេត្តកំពត ៖ អាកាសធាតុឆ្នាំនេះពិតជាអំណោយផលខ្ពស់សម្រាប់អ្នកផលិតអំបិល ប៉ុន្ដែបែរជាអាជីវកម្មមួយនេះជួបបញ្ហាកង្វះកម្លាំងពលកម្មយ៉ាងធ្ងន់ធ្ងរទៅវិញ ហើយកំពុងតែប្រឈមនឹងការបោះបង់មុខរបរនេះតែម្ដងក្នុងខេត្តកំពត និងខេត្តកែប ដែលជាខេត្តតែពីរគត់របស់ប្រទេសកម្ពុជាក្នុងការផលិតអំបិល ។ បើយោងតាមលោក ខាត់…
ខេត្តកំពត ៖ អាកាសធាតុឆ្នាំនេះពិតជាអំណោយផលខ្ពស់សម្រាប់អ្នកផលិតអំបិល ប៉ុន្ដែបែរជាអាជីវកម្មមួយនេះជួបបញ្ហាកង្វះកម្លាំងពលកម្មយ៉ាងធ្ងន់ធ្ងរទៅវិញ ហើយកំពុងតែប្រឈមនឹងការបោះបង់មុខរបរនេះតែម្ដងក្នុងខេត្តកំពត និងខេត្តកែប ដែលជាខេត្តតែពីរគត់របស់ប្រទេសកម្ពុជាក្នុងការផលិតអំបិល ។
បើយោងតាមលោក ខាត់ សាមឿន អ្នកផលិតអំបិលធំមួយនៅក្នុងខេត្តកំពត បានឲ្យដឹងតាមទូរស័ព្ទថា ឆ្នាំនេះអាកាសធាតុពិតជាអំណោយផលណាស់សម្រាប់ការផលិតអំបិលហើយរំពឹងថា អំបិលនឹងទទួលផលបានច្រើន និងល្អជាងឆ្នាំមុនៗ ក៏ប៉ុន្តែបែរជាម្ចាស់ស្រែអំបិលមួយចំនួនធំ កំពុងជួបបញ្ហាកង្វះកម្លាំងកម្មសម្រាប់ធ្វើការក្នុងស្រែអំបិល ជាពិសេសកម្មកររែកអំបិលចូលឃ្លាំង ។
លោកបន្តថា សម្រាប់ការងារផ្សេងៗទៀត ក្រៅពីរែកអំបិល គឺអាចរកបាន ដោយសារតែការងារនោះមិនត្រូវការប្រើកម្លាំងធ្ងន់ៗ ដូច្នេះ គេអាចយកមនុស្សចំណាស់បន្តិចក៏អាចធ្វើបានដែរ ក៏ប៉ុន្តែសម្រាប់ការរែកអំបិលនេះគឺត្រូវការអ្នកដែលមានកម្លាំងខ្លាំង ជាពិសេសមនុស្សប្រុសពេញវ័យ ក៏ប៉ុន្តែកម្លាំងពលកម្មទាំងនោះបានឈប់ធ្វើការងារនេះដោយទៅធ្វើការងារណាដែលស្រាលៗក្នុងម្លប់ដូចជានៅតាមរោងចក្រ សហគ្រាសផ្សេងៗអស់មួយចំនួនហើយ ។ លោកថា ៖« បើទោះបីជាឲ្យប្រាក់កម្រៃគ្រប់គ្រាន់ និងសមល្មមនឹងការងារនេះក៏ដោយ ក៏ពិបាករកដែរ ដោយសារតែពួកគេបានងាកទៅធ្វើការនៅតាមរោងចក្រ ក្នុងម៉ាស៊ីនត្រជាក់ ក្រោមកង្ហារវិញ និងទទួលបានប្រាក់កម្រៃប្រចាំខែទៀងទាត់ទៀតផង ដូច្នេះហើយ ទើបយើងពិបាកស្វែងរកកម្លាំងពលកម្ម ដែលជាបញ្ហាប្រឈមមួយសម្រាប់អាជីវកម្មស្រែអំបិលរបស់យើង »។
លោកបន្ថែមថា បច្ចុប្បន្ននេះ អាជីវកម្មស្រែអំបិលក្នុងខេត្តកំពត មិនទាន់មានវិធីសាស្ត្រណាមួយដែលយកកម្លាំងម៉ាស៊ីន មកជំនួសកម្លាំងមនុស្សបានឡើយក្នុងការប្រមូលផល ដូច្នេះបើសិនជាវានៅតែមានបញ្ហាបែបនេះមិនយូរទេ អាជីវកម្មស្រែអំបិល នឹងត្រូវបាត់បង់បន្ថែមទៀត ខណៈបច្ចុប្បន្ននេះលោកសង្កេតឃើញវាបានបាត់បង់បន្តិចម្ដងៗហើយ ដូចជានៅម្ដុំលក ព្រែកចាក ក្នុងខេត្តកែប បានឈប់ផលិតហើយ និងយកស្រែអំបិលនោះ មកធ្វើការស្រែបង្គាវិញ ។
លោកបញ្ជាក់ថា នៅក្នុងខេត្តកំពតពេលនេះ ក៏នឹងប្រឈមដូចគ្នានឹងខេត្តកែបដែរ ព្រោះតាមដែលលោកដឹង គឺមានក្រុមហ៊ុនបរទេសមួយចំនួនកំពុងស្វែងរកទិញដីស្រែអំបិលនោះមកវិនិយោគធ្វើអ្វីផ្សេងវិញ ហើយក៏លឺដំណឹងថា មានក្រុមហ៊ុនផ្សេងទៀត កំពុងស្វែងរកទិញដីស្រែអំបិលសម្រាប់ផលិតអំបិលដែរ តែត្រូវសហការជាមួយនឹងបរទេស ដើម្បីផលិតផ្គត់ផ្គង់ក្នុងស្រុក និងនាំចេញទៅកាន់ទីផ្សារអន្តរជាតិ ដោយសារតែគេអាចមានបច្ចេកទេសក្នុងការផលិតខុសពីបច្ចុប្បន្ន ។
អនុប្រធានផែនការនៃសមាគមផលិតអំបិលខេត្តកំពត និងកែប លោក តុង ខ្លឹង បានឲ្យដឹងដែរថា ពាក់ព័ន្ធនឹងការលក់ដីស្រែអំបិលនោះទៅវិនិយោគិន លោកក៏មិនទាន់ច្បាស់ដែរ ក៏ប៉ុន្តែវាអាចកើតឡើង ដោយការព្រមព្រៀងពីសំណាក់ពលរដ្ឋ និងក្រុមហ៊ុនទិញដីនោះ ដោយសារតែកង្វះកម្លាំងពលកម្ម ក្នុងអាជីវកម្មនេះ ។
លោកបន្តថា សម្រាប់ឆ្នាំ២០១៩នេះ លោកមើលឃើញថា ការផ្គត់ផ្គង់អំបិលក្នុងស្រុក ប្រហែលជានឹងមិនគ្រប់ទៅតាមតម្រូវការទេ ហើយនឹងត្រូវនាំចូលពីក្រៅប្រទេស ដើម្បីផ្គត់ផ្គង់ឲ្យគ្រប់ទៅតនឹងតម្រូវការ បើទោះបីជាឆ្នាំនេះ អាកាសធាតុអំណោយផល ក្នុងការផលិតអំបិលក្នុងស្រុកក៏ដោយ ។
គួរបញ្ជាក់ថា ទីផ្សារផលិតអំបិលបច្ចុប្បន្ននេះ ត្រូវបានផលិតករបង្ហើបឲ្យដឹងថា ក្នុងមួយបាវមានទំងន់៥០គីឡូក្រាម អាចលក់បានក្នុងតម្លៃ១៥.០០០រៀល ហើយឈ្មួញលក់បន្ត អាចបានក្នុងតម្លៃ ២០.០០០រៀល។ ចំណែកអ្នកលក់រាយវិញក៏អាចបានតម្លៃលើសពី២៥.០០០រៀលក្នុងមួយបាវដែរ ។ អ្វីដែលពិសេសនោះ គុណភាពអំបិលក្នុងស្រុក ក៏ត្រូវបានទទួលស្គាល់ថា ជាអំបិលដែលល្អ ផលិតតាមធម្មជាតិសុទ្ធសាធ មិនមានលាយសារធាតុគីមីនោះទេ ក៏ប៉ុន្ដែគួរឲ្យសោកស្ដាយ វាសនាស្រែអំបិលកម្ពុជានឹងអាចបាត់បង់នៅថ្ងៃអនាគត ប្រសិនបើមិនមានវិធានលើកកម្ពស់ និងធ្វើទំនើបកម្ម ៕
ចែករំលែកព័តមាននេះ