អ្នកជំនាញផ្នែកចិត្តវិទ្យាកុមារ និងទីប្រឹក្សារដ្ឋាភិបាលអាល្លឺម៉ង់ Julia von Weiler បាននិយាយថា កុមារអាយុក្រោម១៤ឆ្នាំមិនគួរត្រូវបានអនុញ្ញាតឲ្យប្រើស្មាតហ្វូនឡើយ ព្រោះវាអាចបង្កគ្រោះថ្នាក់នៃការទទួលបានព័ត៌មានអាសអាភាស ។
អ្នកស្រីបាននិយាយប្រាប់ដល់សារព័ត៌មាន Deutsche Welle របស់អាល្លឺម៉ង់ថា «ពួកយើងគួរតែការពារកុមារពីហានិភ័យបង្កឡើងពីការប្រើស្មាតហ្វូនក្នុងអាយុក្មេងពេកដូចដែលយើងការពារពួកគេពីគ្រឿងស្រវឹងនិងគ្រឿងញៀនផ្សេងៗដែរ» ។
អ្នកស្រីបានស្នើឡើងដូច្នេះខណៈដែលកំពុងមានការព្រួយបារម្ភពីអាណាព្យាបាល សកម្មជនការពារកុមារ និងក្រុមអតិថិជនទាក់ទិននឹងកំណើននៃការប្រើប្រាស់ឧបករណ៍ឌីជីថល និងផលប៉ះពាល់ដល់វាមានដល់ការអប់រំ ជំនាញក្នុងសង្គម និងសុខភាពផ្លូវចិត្តជាដើម ។
ក្រុមហ៊ុនបច្ចេកវិទ្យាក៏កំពុងតែឆ្លើយតបនឹងការព្រួយបារម្ភនេះដែរដោយមាន Apple និង Goolge ចេញឧបករណ៍សម្រាប់អាណាព្យាបាលប្រើដើម្បីទាមដាននិងគ្រប់គ្រងការប្រើស្មាតហ្វូនរបស់កូនៗជាដើម។
ប៉ុន្តែអ្នកជំនាញដទៃទាក់ទិននឹងបញ្ហានេះដូចជាលោក Johannes-Wilhelm Rörig ដែលជាគណៈកម្មការឯករាជ្យទទួលបន្ទុកផ្នែកបញ្ហារំលោភបំពានផ្លូវភេទកុមារបាននិយាយថាសំណើររបស់អ្នកស្រីមិនអាចដោះស្រាយបញ្ហានេះបានទេ ។
អ្នកស្រាវជ្រាវដទៃបានផ្តោតសំខាន់លើផលប៉ះពាល់ផ្សេងៗទៀតដែលបង្កឡើងពីការប្រើស្មាតហ្វូនដែលរួមមានដូចជាការប៉ះពាល់ដល់ការអភិវឌ្ឍន៍អាកប្បិរិយា និងការអប់រំជាដើម ។
សំណើរការរបស់អ្នកស្រី Von Weiler ត្រូវបានស្នើឡើងបន្ទាប់ពីប្រទេសបារាំងហាមមិនឲ្យសិស្សយកស្មាតហ្វូននិងថាប្លេតទៅសាលារៀន ឬតម្រូវឲ្យពួកគេបិទវាទាំងស្រុងពេលកំពុងនៅក្នុងថ្នាក់រៀន។
យោងតាមការសិក្សារបស់សមាគមន៍ចិត្តវិទ្យាអាមេរិកបានឲ្យដឹងថា ស្មាតហ្វូននិងប្រព័ន្ធសង្គមកំពុងតែផ្លាស់ប្តូរទម្លាប់អានរបស់កុមារនិងយុវជនដែលប៉ះពាល់ដល់ការត្រិះរិះពិចារណារបស់ពួកគេ ៕
ប្រភព ៖ Washingtonpost
ចែករំលែកព័តមាននេះ