លោក Juncker ៖ លោកត្រាំនឹងមិនដាក់ពន្ធបន្ថែមលើរថយន្តទេ
ទីក្រុងប៊ែឡាំង ៖ លោក Jean-Claude Juncker ប្រធានគណៈកម្មាធិការអឺរ៉ុបបាននិយាយថា លោកប្រធានាធិបតីដូណាល់ ត្រាំ (Donald Trump)…
ទីក្រុងប៊ែឡាំង ៖ លោក Jean-Claude Juncker ប្រធានគណៈកម្មាធិការអឺរ៉ុបបាននិយាយថា លោកប្រធានាធិបតីដូណាល់ ត្រាំ (Donald Trump) បានសន្យាជាមួយលោកថាលោកនឹងមិនដាក់ពន្ធបន្ថែមលើរថយន្តអឺរ៉ុបទេក្នុងពេលនេះ។ នេះបើយោងតាមទីភ្នាក់ងារសារព័ត៌មាន Reuters ចេញផ្សាយកាលពីថ្ងៃទី១៨ កុម្ភៈ កន្លងមក ។
លោក Juncker បានប្រាប់ដល់សារព័ត៌មានអាល្លឺម៉ង់ Stuttgarter Zeitung ក្នុងបទសម្ភាសន៍មួយថា ៖« លោកត្រាំបានសន្យាជាមួយខ្ញុំថានឹងមិនមានពន្ធលើរថយន្តទេក្នុងពេលនេះ។ ខ្ញុំមើលឃើញវាជាការប្តេជ្ញាមួយ និងជាអ្វីដែលយើងអាចពឹងផ្អែកបាន »។
លោកបានបន្ថែមថា ប្រសិនបើលោកប្រធានាធិបតីត្រាំដាក់ពន្ធលើរថយន្តអឺរ៉ុបពិតមែនសហភាពអឺរ៉ុបនឹងឆ្លើយតបភ្លាមៗ ហើយក៏មិនមានកាតព្វកិច្ចក្នុងការធ្វើតាមការសន្យាថានឹងទិញសណ្តែកសៀង និងហ្គាសបន្ថែមពីសហរដ្ឋអាមេរិកដែរ ។
របាយការណ៍មួយពីក្រសួងពាណិជ្ជកម្មរបស់អាមេរិកត្រូវបានផ្ញើទៅកាន់លោកប្រធានាធិបតីត្រាំកាលពីចុងសប្តាហ៍មុន ដើម្បីឲ្យលោកពិចារណាថា គួរតែដាក់ពន្ធ ២៥%លើរថយន្ត និងគ្រឿងរថយន្តដែលនាំចូលឬទេ ។
សេចក្តីលម្អិតក្នុងរបាយការណ៍នឹងត្រូវទុកជាការសម្ងាត់ដែលធ្វើឲ្យប្រទេសនាំចេញរថយន្តធំៗដូចជាអាល្លឺម៉ង់ ជប៉ុន និងកូរ៉េខាងត្បូងជាដើម កំពុងព្រួយបារម្ភ ។
មន្ត្រីក្នុងវិស័យបាននិយាយថា ពួកគេគិតថា របាយការណ៍ខាងលើនឹងផ្តល់យោបល់ឲ្យមានការដាក់ពន្ធដើម្បីសហរដ្ឋអាមេរិកអាចប្រើរបាយការណ៍នេះមកចរចាជាមួយនឹងជប៉ុន និងសហភាពអឺរ៉ុបបន្ត។ អ្នកនាំពាក្យម្នាក់របស់គណៈកម្មាធិការអឺរ៉ុបបាននិយាយកាលពីថ្ងៃទី១៨ កុម្ភៈថា សហភាពអឺរ៉ុបចង់ពង្រឹងទំនាក់ទំនងពាណិជ្ជកម្មជាមួយនឹងសហរដ្ឋអាមេរិក តែនឹងឆ្លើយតបទៅវិញប្រសិនបើលោកប្រធានាធិបតីត្រាំសម្រេចចិត្តថា ដាក់ពន្ធលើរថយន្តនាំចូលពីសហភាពអឺរ៉ុប។
រាល់ការដាក់ពន្ធលើយានយន្តនឹងប៉ះពាល់ដល់ប្រទេសអាល្លឺម៉ង់ខ្លាំងជាងគេ។ សហរដ្ឋអាមេរិកគឺជាទីតាំងនាំចេញធំជាងគេរបស់ប្រទេសអាល្លឺម៉ង់ បន្ទាប់ពីប្រទេសក្នុងសហភាពអឺរ៉ុប ៕
ចែករំលែកព័តមាននេះ