ទីក្រុងបាងកក ៖ ការរអាក់រអួលផ្នែកបច្ចេកវិទ្យាដែលបង្កឡើងដោយប្រព័ន្ធស្វ័យប្រវត្តិ និងបច្ចេកវិទ្យា Arificial Intelligence (AI)កំពុងតែដាក់សម្ពាធលើទីផ្សារការងាររបស់ប្រទេសថៃ ជាពិសេសក្នុងវិស័យផលិតកម្ម ។ នេះបើតាមការផ្សាយពីសារព័ត៌មានបាងកក ប៉ុស្ដិ៍ កាលពីថ្ងៃទី១៨ កុម្ភៈ កន្លង
មក ។
លោក Thavorn Chalassathien ប្រធានវិទ្យាស្ថានអភិវឌ្ឍន៍ធនធានមនុស្សបាននិយាយថា កត្តាជាច្រើនផ្លាស់ប្តូរយ៉ាងលឿន ដូច្នេះក្រុមហ៊ុនគួរតែត្រៀមខ្លួនរួចជាស្រេច ។ លោកបានបន្តថា ទីផ្សារការងាររបស់ប្រទេសថៃក្នុងឆ្នាំ២០១៩ នឹងមើលឃើញមានអត្រាអ្នកគ្មានការងារធ្វើកាន់តែខ្ពស់ព្រោះក្រុមហ៊ុនជាច្រើនចាប់ផ្តើមប្រើប្រព័ន្ធស្វ័យប្រវត្តិកម្ម និង AI ដើម្បីជំនួសពលករ ។
លោកបានបន្ថែមថា កត្តាជាច្រើនដែលបង្កឲ្យមានការប្រើបច្ចេកវិទ្យាច្រើនជាងមុន ដែលក្នុងនោះរួមមាន កង្វះពលករ ពលករមិនមានជំនាញត្រូវតាមតម្រូវការ និងកំណើនប្រាក់បៀវត្សរ៍ជាដើម ។ វិទ្យស្ថានខាងលើបានធ្វើការស្ទង់មតិ និងប្រទះឃើញថា ក្រុមហ៊ុនជាច្រើនចាប់ផ្តើមត្រូវការបុគ្គលិកមានជំនាញ ដូចជា អ្នកបច្ចេកទេស និងវិស្វករ ព្រោះពួកគេមានជំនាញស្របទៅនឹងវិស័យថ្មីៗដែលរដ្ឋាភិបាលកំពុងតែលើកស្ទួយ ។
លោក Thavorn បាននិយាយដែរថា ៖« ប្រមាណ៣០%នៃសិស្សវិជ្ជាជីវៈក្នុងស្ថាប័នអប់រំប្រទេសថៃអាចចូលក្នុងទីផ្សារការងារបាន ខណៈដែល៧០%ទៀតមានជំនាញខុសពីតម្រូវការទីផ្សារ »។ លោកបានបន្តថា ក្រុមហ៊ុននីមួយៗគួរតែផ្តល់ជាកម្មវិធីហ្វឹកហាត់ដើម្បីអភិវឌ្ឍន៍ធនធានមនុស្សដែលមានស្រាប់ ខណៈដែលកំពុងមានកង្វះពលករក្នុងស្រុក ។
លោក Tanit Sorat អនុប្រធានក្រុមប្រឹក្សាផ្តល់ទីប្រឹក្សាផ្នែកអភិវឌ្ឍន៍ការងារជាតិបាននិយាយថា អត្រាអ្នកគ្មានការងារធ្វើក្នុងប្រទេសថៃនៅឆ្នាំ២០១៩ នឹងកើនដល់ប្រមាណពី១,២ ទៅ១,៣% ឬប្រមាណពី ៤០ម៉ឺនទៅ៥០ម៉ឺននាក់ក្នុងចំណោមពលករទាំង៣៨លាននាក់ក្នុងប្រទេស ៕
ចែករំលែកព័តមាននេះ