ខេត្តសៀមរាប ៖ យោងលើស្ថានភាពជាក់ស្តែងដែលក្រុមការងារនាយកដ្ឋានគ្រប់គ្រងទឹកនៃអាជ្ញាធរជាតិអប្សរាបានធ្វើការអង្កេតជាប្រចាំឃើញថា បរិមាណទឹកក្នុងកសិណប្រាសាទអង្គរវត្ត ក្រុងអង្គរធំ បារាយណ៍ខាងជើងកំពុងប្រឈមនឹងការខ្វះខាតទឹកខ្លាំងនារដូវប្រាំងខាងមុខនេះ។ លោក ភឿន សុឃីម អនុប្រធាននាយកដ្ឋានគ្រប់គ្រងទឹក…
ខេត្តសៀមរាប ៖ យោងលើស្ថានភាពជាក់ស្តែងដែលក្រុមការងារនាយកដ្ឋានគ្រប់គ្រងទឹកនៃអាជ្ញាធរជាតិអប្សរាបានធ្វើការអង្កេតជាប្រចាំឃើញថា បរិមាណទឹកក្នុងកសិណប្រាសាទអង្គរវត្ត ក្រុងអង្គរធំ បារាយណ៍ខាងជើងកំពុងប្រឈមនឹងការខ្វះខាតទឹកខ្លាំងនារដូវប្រាំងខាងមុខនេះ។
លោក ភឿន សុឃីម អនុប្រធាននាយកដ្ឋានគ្រប់គ្រងទឹក បានឱ្យដឹង ពីមូលហេតុនៃការខ្វះខាតទឹក ដើម្បីបញ្ជូលក្នុងកសិណប្រាសាទអង្គរវត្ត ក្រុងអង្គរធំ និងបារាយណ៍ខាងជើងនេះ គឺដោយសារនាយកដ្ឋានទឹកបានបើកទ្វារទឹកដើម្បីបញ្ចូលទឹកទៅស្ទឹងព្រះស្រុកសម្រាប់ស្រោចស្រពស្រែប្រជាពលរដ្ឋចំនួន៣០០ហិកតា មានចំនួន២លើក គឺលើកទី១ រយៈពេល២សប្តាហ៍ និងលើកទី២ រយៈពេលមួយសប្តាហ៍ ចេញពីប្រឡាយស្តុកទឹកបម្រុងសម្រាប់បញ្ចូលទៅក្នុងបារាយណ៍ខាងជើង កសិណក្រុងអង្គរធំ កសិណប្រាសាទអង្គរវត្ត។
ម្យ៉ាងវិញទៀត បច្ចុប្បន្នប្រឡាយស្តុកទឹកបម្រុងក៏ពុំមានទឹកទេ ដោយសារបរិមាណទឹកស្ទឹងសៀមរាបដែលហូរពីភ្នំគូលែនតិចតួចពេក ហើយ ក្រុមការងារក៏បានចែកទឹកមួយផ្នែកមកក្រុងសៀមរាបផងដែរ។
លោកបញ្ជាក់ថា បើធៀបនឹងឆ្នាំមុន កម្ពស់ទឹកបច្ចុប្បន្ននៅបារាយណ៍ខាងជើងមានកម្រិតទាបជាង០,៨ម៉ែត្រ (ប្រហែលជា២,៦លានម៉ែត្រគូប) កសិណក្រុងអង្គរធំ ទាបជាង០,៩៣ម៉ែត្រ (៦៥ម៉ឺនម៉ែត្រគូប) និងកសិណប្រាសាទអង្គរវត្ត ទាបជាង០,៤ម៉ែត្រ (៣៨ម៉ឺនម៉ែត្រគូប)។ ជាសរុបយើងបានបាត់បង់ទឹកប្រហែលជា៣,៦៣លានម៉ែត្រគូប ដែលនេះជាចំណុចក្រុមការងារកំពុងយកចិត្តទុកដាក់ខ្ពស់ក្នុងការរក្សាទឹកក្នុងអាងស្តុកទឹកទាំងនេះ។
ទោះបីជាយ៉ាងណា ការគ្រប់គ្រងទឹកក្នុងរមណីយដ្ឋានអង្គរនឹងពុំមានបញ្ហាឡើយ។
ពេលនេះក្រុមការងារកំពុងមមាញឹកក្នុងការស្តារប្រឡាយ និងបិទទ្វារទឹកពីស្ទឹងសៀមរាបដើម្បីបញ្ចូលទឹកទៅក្នុងកសិណក្រុងអង្គរធំ ប្រាសាទអង្គរវត្ត ចៀសវាងរីងស្ងួតនាពេលខាងមុខនេះ។ ក្នុងនោះដែរ អាជ្ញាធរជាតិអប្សរា ក៏សូមអំពាវនាវដល់ប្រជាពលរដ្ឋដែលបានបិទទំនប់កាត់ប្រឡាយស្ទាក់ទឹកសម្រាប់ទុកប្រើប្រាស់ សូមបើកឡើងវិញ ដើម្បីកុំឱ្យមានការលំបាកដល់ការបញ្ចូលទឹកទៅក្នុងកសិណប្រាសាទនៅក្នុងតំបន់អង្គរ ៕
ចែករំលែកព័តមាននេះ