ខេត្តព្រះវិហារ ៖ ដោយឃើញថាទណ្ឌិតចំនួន៣៣នាក់មានការកែប្រែខ្លួន មានចរិកលក្ខណៈល្អឡើងវិញ និងផ្អែកតាមអនុវត្តទោស ២ភាគ៣ នៃច្បាប់ស្តីពីពន្ធនាគារ ប្រធានពន្ធនាគារខេត្តព្រះវិហារ បានអះអាងថា ទណ្ឌិតប្រុសស្រីទាំងនោះគ្រោងនឹងទទួលបានការលើកលែង…
ខេត្តព្រះវិហារ ៖ ដោយឃើញថាទណ្ឌិតចំនួន៣៣នាក់មានការកែប្រែខ្លួន មានចរិកលក្ខណៈល្អឡើងវិញ និងផ្អែកតាមអនុវត្តទោស ២ភាគ៣ នៃច្បាប់ស្តីពីពន្ធនាគារ ប្រធានពន្ធនាគារខេត្តព្រះវិហារ បានអះអាងថា ទណ្ឌិតប្រុសស្រីទាំងនោះគ្រោងនឹងទទួលបានការលើកលែង ទោស និងបន្ធូរបន្ថយទោស តាមការស្នើសុំរបស់អាជ្ញាធរខេត្ត នាឱកាសបុណ្យវិសាខបូជា និងបុណ្យចូលឆ្នាំខ្មែរនាពេលខាងមុខនេះ ។
នាថ្ងៃទី២០ ខែកុម្ភៈ ឆ្នាំ២០១៩នេះ លោកឧត្តមអាគារនុរក្ស យ៉ន់ ម៉ានី ប្រធានពន្ធនាគារ ខេត្តព្រះវិហារ បានឲ្យដឹងថា ដោយមើលឃើញការកែប្រែខ្លួនរបស់ទណ្ឌិត នៅកំពុងជាប់ឃុំខ្លួននៅក្នុងពន្ធនាគារខេត្តព្រះវិហារ អាជ្ញាធរ និងសមត្ថកិច្ចពាក់ព័ន្ធគ្រប់លំដាប់ថ្នាក់ បានធ្វើការវាយតម្លៃទៅលើលក្ខណៈសម្បត្តិ របស់ទណ្ឌិតប្រុសស្រីចំនួន៣៣នាក់ ឃើញថាមានការ កែប្រែខ្លួនមកជាមនុស្សល្អឡើងវិញ ចេះធ្វើពលកម្ម ចេះរៀនសូត្រ ទទួលការបណ្តុះបណ្តាលវិជ្ជាជីវៈបានល្អនៅក្នុងពន្ធនាគារកន្លងទៅ ។
ម្យ៉ាងវិញទៀត ទណ្ឌិតទាំង៣៣នាក់នេះ បានអនុវត្តទោសបាន២ភាគ៣ រួចមកហើយ យោងតាមច្បាប់ស្តីពីពន្ធនាគារ ក៏បានសម្រេចជ្រើសយកទណ្ឌិតទាំង៣៣នាក់ ធ្វើការស្នើសុំទៅថ្នាក់ជាតិ ដើម្បីសុំឲ្យមានការលើកលែង និងបន្ធូរបន្ថយទោស របស់ពួកគេ នៅក្នុងបុណ្យវិសាខបូជា និងបុណ្យចូលឆ្នាំប្រពៃណីជាតិខ្មែរ នាពេលខាងមុខនេះ ។
ជាមួយគ្នានេះលោក អ៊ុន ចាន់ដា អភិបាលខេត្តព្រះវិហារ មានប្រសាសន៍ថា នៅក្នុងចំណោមទណ្ឌិតចំនួន៣៣នាក់ ដែលអាជ្ញាធរ បានស្នើទៅក្រសួង សុំការលើកលែងទោសនោះ ទណ្ឌិតចំនួន១៩នាក់ (ស្រី១នាក់) សម្រាប់ស្នើសុំបន្ធូរបន្ថយ និងលើកលែងទោស នាឱកាសបុណ្យ ចូលឆ្នាំខ្មែរ ដោយឡែកទណ្ឌិតចំនួន១៤នាក់ទៀត ស្នើសុំលើកលែងទោស និងបន្ធូរបន្ថយទោស នៅក្នុងពិធីបុណ្យវិសាខបូជា ។
លោកបន្ថែមថា ការធ្វើបែបនេះ ដើម្បីបណ្តុះស្មារតី និងលើកទឹកចិត្តដល់ទណ្ឌិតដ៏ទៃទៀតឲ្យចេះកែប្រែខ្លួនឲ្យបានល្អសារជាថ្មីឡើងវិញ ដើម្បីធ្វើជាមនុស្ស ល្អនៅក្នុងសង្គម ចៀសវាងការប្រព្រឹត្តអំពើល្មើសដែលសង្គមស្អប់ខ្ពើម ៕
ចែករំលែកព័តមាននេះ