ប្រទេសវៀតណាម ៖ ភ្នាក់ងារសារព័ត៌មាន Viet Nam News បានឲ្យដឹងកាលពីថ្ងៃអង្គារ៍ កន្លងមកថា ប្រទេសវៀតណាមទទួលបានការអនុញ្ញាតឲ្យនាំចេញផ្លែស្វាយទៅកាន់សហរដ្ឋអាមេរិកហើយបន្ទាប់ពីការចរចាអស់ ១០ឆ្នាំកន្លងមកនេះ…
ប្រទេសវៀតណាម ៖ ភ្នាក់ងារសារព័ត៌មាន Viet Nam News បានឲ្យដឹងកាលពីថ្ងៃអង្គារ៍ កន្លងមកថា ប្រទេសវៀតណាមទទួលបានការអនុញ្ញាតឲ្យនាំចេញផ្លែស្វាយទៅកាន់សហរដ្ឋអាមេរិកហើយបន្ទាប់ពីការចរចាអស់ ១០ឆ្នាំកន្លងមកនេះ ។
លោក Le Quoc Doanh ដែលជាអនុរដ្ឋមន្ត្រីកសិកម្ម និងអភិវឌ្ឍន៍ជនបទបាននិយាយកាលពីថ្ងៃចន្ទ ថា«ផ្លែស្វាយគឺជាផ្លែឈើដ៏ល្អមួយរបស់វៀតណាម ។ ការអនុញ្ញាតពីសហរដ្ឋអាមេរិកឲ្យមានការនាំចូលនេះគឺជាព័ត៌មានដ៏ល្អសម្រាប់វិស័យកសិកម្ម និងកសិករដាំដុះផ្លែស្វាយក្នុងវៀតណាម ហើយថែមទាំងជួយលើកស្ទួយផ្លែឈើវៀតណាមដែរ» ។
លោកបានបន្ថែមថា ការនាំចូលនេះនឹងផ្តល់ឱកាសដល់ផ្លែឈើវៀតណាមព្រោះសហរដ្ឋអាមេរិកជាទីផ្សារដែលមានតម្រូវការខ្ពស់ និងមានការគ្រប់គ្រងតឹងរឹងលើគុណភាព ហើយវានឹងជួយបង្កើតឱកាសផ្សេងៗក្នុងទីផ្សារដទៃ ។
លោកបាននិយាយថា «ក្រសួងនឹងលើកតម្កើងការស្រាវជ្រាវនិងការប្រើប្រាស់វិទ្យាសាស្ត្រ និងបច្ចេកវិទ្យាថ្មីៗទាក់ទិននឹងការដាំដុះ ការទុកដាក់ និងការវេចខ្ចប់ជាដើម ។ ជាមួយគ្នានេះផងដែរ ក្រសួងនឹងរៀបចំផលិតកម្មឡើងវិញជាពិសេសបង្កើតខ្សែសង្វាក់ផលិតកម្មកសិផលជាដើម ។ សកម្មភាពនេះអាចជួយឲ្យវៀតណាមមានកសិផលដែលមានគុណភាពខ្ពស់ និងមានអនាម័យល្អដើម្បីជួយនឹងលក្ខខណ្ឌតឹងរឹងពីអ្នកនាំចូលផងដែរ»។
ចម្ការដាំដុះផ្លែស្វាយ ក្រុមហ៊ុនវេចខ្ចប់ និងទុកដាក់ផ្លែស្វាយត្រូវទទួលបានលេខកូដមួយពីនាយកដ្ឋានការពាររុក្ខជាតិវៀតណាម និងសេវាកម្មត្រួតពិនិត្យសុខភាពសត្វនិងរុក្ខជាតិក្រោមក្រសួងកសិកម្មអាមេរិកដើម្បីការគ្រប់គ្រង និងការដឹងប្រភពច្បាស់លាស់ទើបអាចនាំចេញទៅកាន់សហរដ្ឋអាមេរិកបាន ។
ប្រមាណ៩៦%នៃផ្លែស្វាយក្នុងប្រទេសវៀតណាមត្រូវបានដាំដុះក្នុងប្រទេសវៀតណាមនិងលក់ក្នុងស្រុកប៉ុណ្ណោះ។ វៀតណាមនាំចេញផ្លែស្វាយទៅកាន់ប្រទេសចំនួន៤០ប្រទេសដែលរួមមានកូរ៉េខាងត្បូង ជប៉ុន សិង្ហបុរី អូស្ត្រាលី នូវែលសេឡង់ ចិន និងប្រទេសថៃជាដើម ៕
ប្រភព ៖ bizhub
ចែករំលែកព័តមាននេះ