តាមប្រភពThe Sunបានឱ្យដឹងថា ស្ត្រីអាយុ៣៥ឆ្នាំម្នាក់ចេះតែក្អកមិនចេះបាត់ ហើយបន្តស្រកទម្ងន់បន្ទាប់ពីមានជំងឺស្ត្រេសជាប្រចាំ ក្រោយពីផ្លាស់ទីលំនៅពីអូស្ត្រាលី មកនៅចក្រភពអង់គ្លេសនោះ ។
Louise Moreton បានទៅជួបជាមួយគ្រូពេទ្យជាច្រើននាក់ តែពួកគេចេះតែប្រាប់នាងថា នាងមានជំងឺផ្តាសាយធម្មតាទេ ។ អាការៈក្អកនេះ បានកើតឡើងក្រោយពេលរើមកនៅអង់គ្លេសជាមួយប្តីនាងឈ្មោះ Paul និងកូនប្រុសឈ្មោះ Leo បានមួយខែ ។ នាងគិតថា នេះប្រហែលជាមានសត្វល្អិតតាមតំបន់មកខាំនាងហើយ។
នាងបានរៀបរាប់ឱ្យដឹងទៀតថា នាងចេះតែក្អកមិនឈប់ ហើយមានអារម្មណ៍អស់កម្លាំងជាប្រចាំ។ នាងមិនចង់ក្រោកចេញពីគ្រែឡើយរាល់ពេលងើបពីដេកម្តងៗ ។ អ្វីដែលធ្វើឱ្យនាងមានការព្រួយបារម្ភបំផុតនោះ គឺនៅពេលដែលនាងហូរឈាមច្រមុះ។
នៅថ្ងៃទី៣ វិច្ឆិកា ឆ្នាំមុន Louise បានធ្វើតេស្តឈាមជាបន្ទាន់ ដែលរកឃើញថានាងមានជម្ងឺមហារីកគ្រាប់ឈាម (ឈាម.សស៊ីឈាមក្រហម) រួមជាមួយនឹងជម្ងឺរលាកសួត និងមេរោគក្នុងឈាម ។ គ្រូពេទ្យថា បើនាងមិនទទួលការព្យាបាលក្នុងរយៈពេល៤៨ម៉ោងទេ នាងនឹងបាត់បង់ជីវិត។
នាងបានចំណាយពេល៦សប្តាហ៍ ទទួលការព្យាបាលនៅមន្ទីរពេទ្យ Newcastle’s Freeman។ នាងបានចែករំលែករឿងរ៉ាវរបស់នាងឱ្យមហាជនបានដឹង ដើម្បីឱ្យពួកគេមានការប្រុងប្រយ័ត្ននឹងរោគសញ្ញាដែលលេចចេញមកហើយឱ្យពួកគេប្រញាប់ទៅជួបគ្រូពេទ្យ ។
ចែករំលែកព័តមាននេះ