ប្រទេសថៃ ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃអាទិត្យ កន្លងមកថា តម្លៃប្រាក់បាតអាចកើនឡើងខ្ពស់ជាងគេក្នុងចំណោមរូបិយវត្ថុទាំងអស់នៅអាស៊ីបន្ទាប់ពីកើនឡើងបាន៤%មកហើយក្នុងឆ្នាំ ២០១៩ នេះ…
ប្រទេសថៃ ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃអាទិត្យ កន្លងមកថា តម្លៃប្រាក់បាតអាចកើនឡើងខ្ពស់ជាងគេក្នុងចំណោមរូបិយវត្ថុទាំងអស់នៅអាស៊ីបន្ទាប់ពីកើនឡើងបាន៤%មកហើយក្នុងឆ្នាំ ២០១៩ នេះ ។
ការលូតលាស់សេដ្ឋកិច្ចដ៏រឹងមាំបានជំរុញដល់កំណើនតម្លៃរូបិយវត្ថុនេះឲ្យលើសប្រាក់វ៉ុន និងដុល្លាតៃវ៉ាន់ដែលបានកើនឡើងព្រោះតែអតិរេកពាណិជ្ជកម្មដែរ ។
អ្នកវិភាគ Hironori Sannami ដែលមកពីធនាគារ Mizuho នៅតូក្យូបាននិយាយថា កំណើនតម្លៃប្រាក់បាតត្រូវបានជំរុញដោយកម្លាំងមូលដ្ឋានសំខាន់ៗរបស់ប្រទេសដែលរួមមានអតិរេកពាណិជ្ជកម្មជាដើម ។ វាក៏រូមមានការទទួលរងផលប៉ះពាល់តិចតួចពីសង្គ្រាមពាណិជ្ជកម្មរវាងសហរដ្ឋអាមេរិក និងប្រទេសចិនដែរ ។
លើសពីនេះទៅទៀតប្រទេសថៃក៏មិនទទួលរងការប៉ះពាល់ច្រើនពីការអន់ថយនៃវិស័យបច្ចេកវិទ្យាដូចកូរ៉េខាងត្បូង និងតៃវ៉ាន់ឡើយ ដែលធ្វើឲ្យតម្លៃប្រាក់បាតកាន់តែមានភាពទាក់ទាញថែមទៀត ។
យ៉ាងណាក្តី លោក Veerathai Santiprabhob ដែលជាប្រធានធានគារជាតិថៃបានប្រាប់ដល់អ្នកកាសែតកាលពីថ្ងៃព្រហស្បត្តិ៍ កន្លងមកថា ធនាគារជាតិកំពុងតែតាមដានតម្លៃប្រាក់បាតយ៉ាងដិតដល់ហើយបានត្រៀមរួចជាស្រេចផងដែរក្នុងការចេញសកម្មភាពប្រសិនបើមានកំណើនខ្លាំង ។
កត្តាមួយទៀតដែលអាចប៉ះពាល់គឺការបោះឆ្នោតសកលរបស់ប្រទេសថៃដែលនឹងកើតមានឡើងក្នុងខែមីនាខាងមុខនេះ ហើយវិនិយោគិនកំពុងតែតាមដានថា តើនឹងមានចលាចលផ្នែកនយោបាយទៀតឬទេ? សម្ព័ន្ធមិត្តរបស់អតីតអ្នកដឹកនាំក្នុងប្រទេសថៃគឺលោក Thaksin Shinawatra កំពុងតែព្យាយាមទាក់ទាញអ្នកបោះឆ្នោតតាមរយៈគម្រោងបង្កើនការលូតលាស់សេដ្ឋកិច្ច ។
ប៉ុន្តែធនាគារ United Overseas Bank បានកត់សម្គាល់កាលពីថ្ងៃអង្គារ៍ មុនថា ព្រោះគណបក្សធំៗទាំងពីរមានគោលនយោបាយដែលផ្តោតសំខាន់លើតម្រូវការ ភាពតានតឹងនយោបាយអាចនឹងកើតមានឡើងជុំវិញទំហំនៃកញ្ចប់ជំរុញដល់សេដ្ឋកិច្ច និងការវិនិយោគលើហេដ្ឋារចនាសម្ព័ន្ធជាដើម ។
ប្រសិនបើភាពតានតឹងនេះស្ថិតក្នុងកម្រិតអាចគ្រប់គ្រងបាន សេដ្ឋកិច្ចថៃអាចបន្តការលូតលាស់បានល្អមិនថាគណបក្សណាឈ្នះឡើយ ហើយតម្លៃបាតនឹងបន្តលូតលាស់បានច្រើនជាងរូបិយវត្ថុក្នុងតំបន់ ៕
ចែករំលែកព័តមាននេះ