ខេត្តប៉ៃលិន ៖ កសិករដាំតាង៉ែន ឬមៀនប៉ៃលិនម្នាក់មានបច្ចេកទេសខ្ពស់ក្នុងការធ្វើឲ្យផ្លែតាង៉ែនទុំទៅតាមរដូវកាលដែលមានតម្រូវការខ្ពស់ដូចជា បុណ្យចូលឆ្នាំចិន-វៀតណាម, ចូលឆ្នាំខ្មែរ និងរដូវភ្ជុំបិណ្ឌជាដើម ។
អ្នកស្រី អឿន ផល្លា ដែលបានដាំតាង៉ែនចំនួន៧០០ដើម នៅភូមិអូរប្រើស សង្កាត់អូរតាវ៉ៅ ក្រុងប៉ៃលិន បានរៀបរាប់ថា អ្នកស្រីដាំដំណាំនេះអស់រយៈពេល៤ឆ្នាំមកហើយ ដោយសារតែតម្លៃលើទីផ្សារឡើងចុះមិនទៀង ទើបអ្នកស្រីបានព្យាយាមសាកល្បងពិសោធដើមតាង៉ែនដើម្បីឲ្យវាផ្លែ និងទុំទៅតាមរដូវមានតម្រូវការខ្ពស់វិញ ។
អ្នកស្រីបន្ដថា ឆ្លងកាត់ការពិសោធច្រើនឆ្នាំមកនេះ អ្នកស្រីបានដាក់អ័រម៉ូនដើមតាង៉ែនចំនួន៧០ដើម ឲ្យវាផ្លែ និងទុំចំរដូវបុណ្យទាន ហើយលទ្ធផលឃើញថាជោគជ័យ និងទៅតាមរដូវកាលដែលខ្លួនចង់បានមែន ។
អ្នកស្រី អឿន ផល្លា និយាយថា ៖« នៅថ្ងៃធម្មតា តម្លៃតាង៉ែន ១គីឡូក្រាមលក់បានត្រឹមតែ២.៥០០រៀលទៅ៣.០០០រៀលទេ ប៉ុន្តែបើយើងបេះនៅថ្ងៃបុណ្យទាន ជាពិសេសចំថ្ងៃបុណ្យចូលឆ្នាំចិន គឺអាចលក់បាន៤.០០០ទៅ៥.០០០រៀលឯណោះក្នុង១គីឡូក្រាម ។ ហេតុនេះហើយ ខ្ញុំតែងដាក់អ័រម៉ូនឲ្យវាផ្លែ និងទុំចំរដូវបុណ្យទាន ព្រោះវាមានតម្រូវការខ្ពស់ »។
អ្នកស្រីបញ្ជាក់ថា ៖« ជាក់ស្ដែងបុណ្យចូលឆ្នាំចិនឆ្នាំនេះ ខ្ញុំលក់បានច្រើនគឺក្នុង១ថ្ងៃៗ អាចបេះលក់ឱ្យភ្ញៀវក្នុងភូមិយកទៅសែន និងភ្ញៀវទេសចរជាតិដែលមកដើរលេងកម្សាន្ដ និងជួបជុំសាច់ញាតិដោយ១ថ្ងៃៗ អាចបេះលក់បានចាប់ពី៤០ទៅ៦០គីឡូក្រាម »។
អ្នកស្រីបន្ថែមថា អ្នកស្រីកំពុងមានគម្រោងដាក់អ័រម៉ូនលើដើមតាង៉ែនដែលនៅសល់ចំនួន៦០០ដើមនោះ ឱ្យវាទុំនៅរដូវចូលឆ្នាំប្រពៃណីជាតិខ្មែរខាងមុខ និងនៅរដូវបុណ្យភ្ជុំបិណ្ឌផងដែរ ។ ទោះយ៉ាងណា អ្នកស្រីកំពុងតែបារម្ភដោយសារតែពីអាកាសធាតុឆ្នាំនេះក្ដៅខ្លាំង និងពុំមានភ្លៀងធ្លាក់កក់ខែដូចឆ្នាំមុន ខណៈទឹកអូរនៅក្បែរចម្ការរបស់អ្នកស្រីបានរីងស្ងួតអស់ជាបណ្តើរៗហើយដែរ ៕
ចែករំលែកព័តមាននេះ