រឿងរ៉ាវនៃជីវិតយើងនេះមួយថ្ងៃៗជួបបញ្ហាជាច្រើនមានសព្វរស់ជាតិ បញ្ហាខ្លះដោះស្រាយចេញ ឯខ្លះទៀតក៏ដោះមិនចេញគឺជួបប្រទះទាំងសុខ ទាំងទុក្ខលំបាកគ្រប់យ៉ាង តែទោះជាយ៉ាងណាក៏ជីវិតជួបទុក្ខច្រើនជាងសុខគ្មានអ្នកណាមួយគេចរួចទេ ។
ដោយហោចទៅពេលដែលយើងចូលសម្រាកសម្រាន្ត អ្នកខ្លះដេកលក់ស្រួល ដឹងខ្លួនក្រោកឡើងវិញក៏សុខស្រួល ក៏ឯអ្នកខ្លះទៀតដេកលក់មិនស្ងប់ ចិត្តចេះតែរវើរវាយក្នុងរឿងហេតុផ្សេងៗ លុះពេលបើកភ្នែកឡើងក៏ជួបទុក្ខលំបាកសព្វបែបយ៉ាង ព្រោះហេតុនោះបានជាលោកពោលថា ជីវិតយើងនេះប្រជុំទៅដោយបញ្ហា ប្រសព្វទៅដោយទុក្ខលំបាកគ្មានទីបំផុតឡើយ ។
ដើម្បីបន្ធូរការលំបាកខ្លះ បុគ្គលគួររៀនអប់រំចិត្តតាមផ្លូវធម៌ជារឿងសំខាន់ ព្រោះព្រះធម៌ធ្វើឱ្យមនុស្សលែងមានចិត្តលោភលន់ លែងច្រណែនឈ្នានីស លែងហ៊ានបៀតបៀនគ្នាហើយទុក្ខលំបាកផ្សេងៗទៀតក៏រសាយនាំជីវិតទៅរកសេចក្តីស្ងប់សុខបានច្រើន ។
ប៉ុន្តែបើចិត្តមិនបានអប់រំតាមផ្លូវធម៌ទេជីវិតមិនអាចទ្រាំទ្រនឹងបញ្ហាដែលកើតឡើងរាល់ថ្ងៃបានឡើយ ព្រោះជីវិតប្រជុំទៅដោយបញ្ហា ។ តាមធម្មតាជីវិតយើងទាំងអស់គ្នាហ្នឹង តែងតែពើបប្រទះនូវរឿងរ៉ាវជាប់មកជាមួយរាល់ថ្ងៃ បន្តិចបញ្ហានេះ បន្តិចរឿងនោះចូលមកមិនចេះចប់ដូចស្រមោលអន្ទោលតាមប្រាណ បើយើងមិនមានបញ្ញាសម្រាប់ដោះស្រាយបញ្ហាទេ នឹងជួបការលំបាកតានតឹងក្នុងចិត្តជានិច្ច ។
ចែករំលែកព័តមាននេះ