រាជធានីភ្នំពេញ ៖ បុរសម្នាក់ជាមន្ត្រីយោធាពាក់ស័ក្តិ៤កន្លះបានបើកបររថយន្តមួយគ្រឿងក្នុងល្បឿនយ៉ាងលឿន សង្ស័យងោកមួយភាំងរេចង្កូតបុកក្បាលនាគពុះចែកទ្រូងផ្លូវពេញទំហឹង បណ្តាលអោយអ្នកបើកបររថយន្តស្លាប់ ដែលហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោង៨និង៣០នាទីយប់ថ្ងៃទី១៨ ខែកុម្ភៈ ឆ្នាំ២០១៩ ស្ថិតនៅតាមបណ្តោយផ្លូវជាតិលេខ៥ ត្រង់ចំណុចម្តុំឃ្លាំងសាំងសូគីមិច ស្ថិតនៅក្នុងសង្កាត់ឫស្សីកែវ ខណ្ឌឫស្សីកែវ ។
ជនរងគ្រោះដែលស្លាប់ឈ្មោះចេង ដារ៉ាឌី ភេទប្រុស អាយុ៥០ឆ្នាំ ជាមន្ត្រីយោធាពាក់ស័ក្តិ៤កន្លះ ស្នាក់នៅផ្ទះលេខ១៥០Z ភូមិ៩ សង្កាត់ទឹកល្អក់២ ខណ្ឌទួលគោក មានស្រុកកំណើត នៅភូមិអូរស្លែង ឃុំដំណាក់កន្តូត ស្រុកកំពង់ត្រាច ខេត្តកំពត ។
តាមប្រភពពីសាក្សីដែលឃើញហេតុការណ៍បានអោយដឹងថា មុនកើតហេតុ គេបានឃើញ បុរសរងគ្រោះខាងលើបើករថយន្តមួយគ្រឿងម៉ាកអុីស៊ុយហ្សុ៊យប្រភេទមួយបាំងកន្លះ ពណ៌ខ្មៅ ពាក់ស្លាកលេខ ព្រះសីហនុ ២A-៨០០០ ធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង បើកបរក្នុងល្បឿនយ៉ាងលឿន លុះមកដល់ចំណុចកើតហេតុខាងលើនេះ សង្ស័យអ្នកបើកបររថយន្តងងុយដេកងោកមួយភាំងបានជារេចង្កូតទៅបុកក្បាលនាគពុះចែកទ្រូងផ្លូវចំពីមុខពេញទំហឹង ធ្វើអោយរថយន្តខ្ទេចអស់មួយកំណាត់ខាងមុខ និងបែកកញ្ចក់ខាងមុខទៅមុខលែងរួច ថែមទាំងផ្ទុះពោងសុវត្ថិភាពទាំងសងខាងថែមទៀត បណ្តាលអោយអ្នកបើកបររថយន្តខាងលើរងរបួសធ្ងន់ ។
ភ្លាមៗនោះដែរ រថយន្តសង្គ្រោះរបស់មន្ទីរពេទ្យកាល់ម៉ែតបានមកដល់ និងបំរុងដឹកយកទៅសង្គ្រោះដែរ ប៉ុន្តែជាអកុសលជនរងគ្រោះបានស្លាប់នៅនឹងកន្លែងកើតហេតុបាត់ទៅហើយ ចំណែកក្បាលនាគពុះចែកផ្លូវមិនមានរងការខូចខាតធ្ងន់ធ្ងរនោះទេ ។
ក្រោយពេលកើតហេតុ សមត្ថកិច្ចប៉ុស្តិ៍ឫស្សីកែវបានរក្សាទុកកាបូបមួយរបស់ជនរងគ្រោះ ដែលក្នុងកាបូបនោះមានលុយមួយចំនួន ទូរស័ព្ទដៃមួយគ្រឿង និងចិញ្ចៀនចំនួន២វង់ផងដែរ ។ បន្ទាប់ពីសមត្ថកិច្ចធ្វើការវាស់វែងរួច បានហៅរថយន្តស្ទូចមកស្ទូយយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក ចំណែកសពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី ៕
ចែករំលែកព័តមាននេះ