រាជធានីភ្នំពេញ ៖ កាលពីព្រឹកថ្ងៃទី១៨ កម្ភៈ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោស ស្ត្រី២នាក់ដែលជាមេខ្លោងឆបោកថយន្តគេចំនួន៤២គ្រឿងទៅបញ្ចាំតាមកុងស៊ី ដាក់ពន្ធនាគារ២ឆ្នាំម្នាក់ៗទៀត បន្ថែមលើសំណុំរឿងទី១០ សរុបជាបទោស២០ឆ្នាំម្នាក់ និងតម្រូវឲ្យសងប្រាក់ទៅដើមបណ្តឹងរាប់សែនដុល្លារអាមេរិក ក្រោមការចោទប្រកាន់ពីបទឆបោក និងបទរំលោភលើទំនុកចិត្តតាមមាត្រា៣៩១ និងមាត្រា៣៩២ នៃក្រមព្រហ្មទណ្ឌ ។
ជនជាប់ចោទម្នាក់ឈ្មោះ ឃាម រដ្ឋា ហៅ យ៉ា ភេទស្រី អាយុ៣៥ឆ្នាំ និងម្នាក់ទៀតឈ្មោះ ផេង លី ហៅ ដា ភេទស្រី អាយុ៣៣ឆ្នាំ ។
ដំបូង សមត្ថកិច្ចចាប់ខ្លួន៣នាក់ តែក្រោយមកចៅក្រមស៊ើបសួរដោះលែងម្នាក់ទៅវិញ ដែលទំនងមិនពាក់ពន្ធបទល្មើស ជននោះឈ្មោះ ឈាន ភក្ដី ហៅស្រម៉ូម ។
សូមរំលឹកថា រឿងក្ដីមួយនេះចៅក្រមស៊ើសួរបានបំបែកសំរឿងតាមអង្គហេតុនីមួយៗដោយកាត់ទោសម្ដងមួយករណីៗ សរុបចំនួន១០ករណី ដែលរឿងនីមួយៗបានផ្ដន្ទាទោសជនជាប់ជាប់រយៈពេល២ឆ្នាំ និងបង្គាប់ឲ្យសងរថយន្តទៅតាមតម្លៃទីផ្សារជាក់ស្ដែង រហូតដល់គ្រប់ទាំង៤២គ្រឿង ប៉ុន្តែជាក់ស្ដែងជនជាប់ចោទគ្មានប្រាក់សង ទៅដើមបណ្តឹងនោះទេ ។
គួររំលឹកទៀតថា កាលពីថ្ងៃទី១០ ខែមេសា ឆ្នាំ២០១៨ សមត្ថកិច្ចជំនាញនៃការិយាល័យបទល្មើសព្រហ្មទណ្ឌ កងរាជអាវុធហត្ថរាជធានី ភ្នំពេញ បានឃាត់ខ្លួនជនសង្ស័យ ឈ្មោះ ឃាម រដ្ឋា ហៅយ៉ា យកមកសួរនាំ ។
តាមវិធានការជំនាញរបស់អាវុធហត្ថរាជធានី ភ្នំពេញ ក៏ដូចជាចម្លើយសារភាពរបស់ជនសង្ស័យបានឲ្យដឹងថា នាងពិតជាបានជួលរថយន្តពីម្ចាស់ទាំង៣នាក់ អស់ចំនួន១២គ្រឿងពិតប្រាកដមែន ។ នៅថ្ងៃទី១២ ខែមេសា ឆ្នាំ២០១៨ កម្លាំងជំនាញ នៃការិយាល័យបទល្មើសព្រហ្មទណ្ឌ អាវុធហត្ថរាជធានីភ្នំពេញ បានឃាត់ខ្លួនជនសង្ស័យជាប់ពាក់ព័ន្ធ ចំនួន២នាក់បន្ថែមទៀតគឺឈ្មោះ ឈ័ន ភក្តី ហៅ ស្រម៉ូម ហៅ ពន្លក ភេទប្រុស និងឈ្មោះ ផេង លី ហៅ ដា ភេទស្រី ។
តាមចម្លើយសារភាពរបស់ជនសង្ស័យទាំងបី សមត្ថកិច្ចអាវុធហត្ថ រាជធានីភ្នំពេញ បានរកឃើញជនរងគ្រោះ១៤នាក់ផ្សេងទៀត ដែលចាញ់កលល្បិច ក្រុមជនសង្ស័យទាំង២នាក់នេះដូចគ្នា ហើយសមត្ថកិច្ចបាន ទំនាក់ទំនងជនរងគ្រោះទាំង១៤នាក់មកដាក់ពាក្យបណ្តឹង ។
សរុបជនរងគ្រោះ ដែលសមត្ថកិច្ចបានរកឃើញមានចំនួន១៦នាក់ ត្រូវមនុស្ស១ក្រុមជួលរថយន្តមកបញ្ចាំ អស់ចំនួន៣៤គ្រឿង ។
ដោយយោងលើភស្តុតាងស៊ីសង្វាក់មិនអាចប្រកែកបាន ជនសង្ស័យទាំងបីនាក់ ព្រមសារភាពជាលើកទី២ថា ក្រុមខ្លួនពិតជាបានជួលរថយន្តពីជនរងគ្រោះយកមកបញ្ចាំ និងដាក់ជួលបន្តពិតប្រាកដមែន តែមិនមែនជួល៣៤គ្រឿងនោះទេ គឺពួកនាងបានជួលរហូតដល់ទៅ៤២គ្រឿង ពីជនរងគ្រោះទាំង១៦នាក់ និងជនរងគ្រោះផ្សេងទៀត ដែលសមត្ថកិច្ចមិនទាន់អាច ទាក់ទងមកដាក់ពាក្យបណ្តឹងបាន ៕
ចែករំលែកព័តមាននេះ