សហភាពអឺរ៉ុបបានបង្ហាញថា កម្ពុជាអាចនៅមានឱកាសនៅឡើយ ដើម្បីថែរក្សាគម្រោងអ្វីៗទាំងអស់លើកលែងអាវុធ ឬហៅថា EBA (Everything But Arms) ដែលនាំអោយកម្ពុជា អាចធ្វើការនាំចេញទៅទីផ្សារអឺរ៉ុបដោយរួចពន្ធ ។
លោក ចច អេដហ្ការ ( George Edgar) ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជាបានប្រាប់ កោះសន្តិភាពថា សហភាពអឺរ៉ុបបានគូសបញ្ជាក់ជាច្រើនពេលមកហើយនូវការព្រួយបារម្ភមួយចំនួនដែលបាននាំដល់ការបើកនីតិវិធី ឆ្ពោះទៅកាន់ការដកបណ្តោះអាសន្នគម្រោងEBAនេះ ចេញពីប្រទេសកម្ពុជា។
លោកបាននិយាយទៀតថា ការព្រួយបារម្ភទាំងនោះ ផ្តោតទៅលើវិស័យបីសំខាន់ដែលក្នុងនោះ មានទីមួយ សិទ្ធិនយោបាយ និងការការរួមតូចនៃលំហ សម្រាប់គណបក្សប្រឆាំង និងសង្គមស៊ីវិល ទីពីរបញ្ហាការងារនិងការរារាំងដល់សេរីភាពនៃសមាគម និងសិទ្ធិចរចាជារួម និងទីបី ការព្រួយបារម្ភទៅលើការធ្វើសម្បទានដីធ្លីសេដ្ឋកិច្ច ពិសេសទាក់ទងនឹងវិស័យស្ករ ។
លោកបានបន្តទៀតថា ដើម្បីចៀសវាងការព្យួរគម្រោងEBA នេះ អាជ្ញាធរកម្ពុជាចាំបាច់ ត្រូវដោះស្រាយបញ្ហាទាំងអស់នេះ ដោយក្នុងនោះរួមមានតាមរយ:ការធានាអោយមានបរិយាកាសមួយដែលគណបក្សប្រឆាំង សង្គមស៊ីវិល សហជីព និងសារព័ត៌មានអាចដំណើរការដោយសេរី ។
កន្លងមក រដ្ឋាភិបាលកម្ពុជាបានមានវិធានការជាវិជ្ជមានមួយចំនួនរួចមកហើយ ដូចជាការដោះលែងអ្នកកាសែត អ្នកនយោបាយ និងសកម្មជនសង្គមស៊ីវិល ព្រមទាំងការអនុម័ត ទៅលើការធ្វើវិសោធនកម្មទៅលើច្បាប់ស្តីពីគណបក្សនយោបាយ ដែលអនុញ្ញាតអោយបុគ្គលិក ដែលត្រូវហាមឃាត់មិនអោយធ្វើ
នយោបាយអាចទទួលបានសិទ្ធិនយោបាយវិញ និងវិធានការមួយចំនួនទៀត ដែលដោះស្រាយដល់ការ
ដ្បិតសកម្មភាពសង្គមស៊ីវិល និងសហជីព ។
លោកឯកអគ្គរដ្ឋទូតនិយាយថា សហភាពអឺរ៉ុបកត់សម្គាល់វិធានការវិជ្ជមានទាំងអស់នេះ ។ ប៉ុន្តែទោះបីជាយ៉ាងណាក្តី លោកទូតនិយាយថា សហភាពអឺរ៉ុបរង់ចាំមើលវិធានការបន្ថែមទៀត ដោយរួមទាំងការដោះស្រាយបញ្ហារបស់លោកកឹម សុខា អតីតមេដឹកនាំគណបក្សសង្គ្រោះជាតិ។
ប៉ុន្តែយោងតាមប្រតិកម្មរបស់រដ្ឋាភិបាលកម្ពុជាកន្លងមក លក្ខខណ្ឌរបស់សហភាពអឺរ៉ុប អាចធ្វើអោយប៉ះពាល់ដល់ឯករាជភាព និងអធិបតីភាពកម្ពុជា ដែលធ្វើអោយរដ្ឋាភិបាល មិនអាចធ្វើការដោះដូរបានជាមួយនឹងជំនួយឡើយ ។
ចែករំលែកព័តមាននេះ