រាជធានីភ្នំពេញ ៖ ព្រលានយន្តហោះកងកេងខេត្តព្រះសីហនុបានចាប់ផ្តើមពង្រីកផ្លូវរត់របស់ខ្លួនហើយ ដើម្បីអាចឲ្យយន្តហោះអាចចុះចតយន្តហោះខ្នាតធំជាងមុន និងអាចទទួលបានអ្នកដំណើរប្រមាណ១០លាននាក់ក្នុងមួយឆ្នាំ ។
ប្រធានផ្នែកបង្កើនជើងហោះហើរនៃក្រុមហ៊ុនវិនិយោគអាកាសយានដ្ឋានកម្ពុជា លោកពេជ្រ សុប៉ុនតារា បានឲ្យដឹងតាមទូរស័ព្ទកាលពីល្ងាចថ្ងៃទី១៣ កុម្ភៈ កន្លងមកថា ការពង្រីកព្រលានយន្តហោះកងកេងបានចាប់ផ្តើមហើយ ដោយព្រលាននេះនឹងពង្រីកផ្លូវរត់ប្រវែង១.០០០ម៉ែត្រ ដែលធ្វើឲ្យព្រលានយន្តហោះនេះទទួលបានអ្នកដំនើរច្រើនជាងមុន និងចុះចតយន្តហោះបានទំហំធំជាងមុន ។
លោកបន្តថា ក្រោយពង្រីកព្រលានយន្តហោះនេះ មានសមត្ថភាពនិងប្រវែងផ្លូវរត់ប៉ុនគ្នា នឹងព្រលានយន្តហោះអន្តរជាតិភ្នំពេញសព្វថ្ងៃនេះ ខណៈសព្វថ្ងៃព្រលាននេះមានទំហំដូចគ្នានឹងព្រលានខេត្តសៀមរាប ។
លោកបន្តថា ៖« ក្រោយពេលផ្លូវរត់នេះពង្រីករួច យើងនឹងរៀបចំសាងសង់អគារទទួលអ្នកដំណើរជាបន្ត ដើម្បីអាចឲ្យព្រលាននេះមានសមត្ថភាពទទួលអ្នកដំណើរ១០លាននាក់ក្នុងមួយឆ្នាំ »។ លោកបន្តថា ៖« បច្ចុប្បន្នមានក្រុមហ៊ុនអាកាសចរណ៍ចំនួន១១បាននិងកំពុងចុះចតជាប្រចាំនៅព្រលាននេះ ដែលចំនួននេះមិនទាន់រាប់បញ្ចូលការហោះហើរលក្ខណៈជួលនៅឡើយ »។ ទោះជាយ៉ាងណា លោកមិនបញ្ជាក់ឲ្យដឹង ពីទំហំទុនវិនិយោគលើការពង្រីកប្រវែងផ្លូវរត់ និងការចំណាយសាងសង់អាគារទទួលអ្នកដំណើរនាពេលអនាគតនោះទេ ។
លោកពេជ្រ សុប៉ុនតារា បានបន្តថា ប្រសិនជាគ្មានការប្រែប្រួលទេនោះ តាមផែនការការពង្រីកផ្លូវរត់របស់ព្រលានយន្តហោះនេះនឹងបញ្ចប់នៅចុងឆ្នាំនេះ ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជាកាលពីពេលថ្មីៗនេះបានឲ្យដឹងថា ព្រលានយន្តហោះកងកេងខេត្តព្រះសីហនុ នឹងត្រូវពង្រីក ដើម្បីទទួលបានអ្នកដំណើរកាន់តែច្រើន ខណៈគោលដៅរបស់រដ្ឋាភិបាលធ្វើយ៉ាងណាឲ្យកម្ពុជាទទួលបានអ្នកដំនើរតាមផ្លូវអាកាសកើនឡើងដល់៣០លាននាក់នៅឆ្នាំ២០៣០ខាងមុខ ។ ជាមួយគ្នានេះ ក្រុមហ៊ុន Tianjing Union Development Groupក៏បាននិងកំពុងចាប់ផ្តើមសាងសង់ព្រលានយន្តហោះលំដាប់អន្តរជាតិមួយទៀត ស្ថិតនៅក្នុងស្រុកបុទុមសាគរ នៃខេត្តកោះកុងផងដែរ ។
ប្រធានសមាគមទីភ្នាក់ងារទេសចរណ៍កម្ពុជាលោកស្រីឆាយ ស៊ីវលីនបានមានប្រសាសន៍ថា ក្រោយការពង្រីករួចព្រលាននេះ កាន់តែមានភាពទាក់ទាញខ្លាំង ព្រោះវាធំជាងមុន អាចទទួលចុះចតយន្តហោះធំជាងមុន និងផ្តល់ទំនុកចិត្តកាន់តែប្រសើរជាងមុន ជាមួយប្រព័ន្ធរៀបចំទទួលអ្នកដំណើរកាន់តែងាយស្រួល និងមានផាសុកភាពដល់ភ្ញៀវជាតិ និងអន្តរជាតិ។ លោកស្រីបន្តថា ខេត្តព្រះសីហនុ កាន់តែមានភាពទាក់ទាញខ្លាំងពីមួយឆ្នាំទៅមួយឆ្នាំ ហេតុនេះអ្វីសំខាន់នាពេលនេះ តើយើងមានអ្វីទាក់ទាញគេក្រៅពីតំបន់ឆ្នេរ ។
លោកស្រីបន្តថា ៖« ខេត្តព្រះសីហនុមានការរីកចម្រើនលឿន តែការរៀបចំយឺតដោយបច្ចុប្បន្នខេត្តនេះខ្វះខាតធនធានមនុស្ស សេវាបដិសណ្ឋារកិច្ចនៅមានកម្រិត ភោជនីយដ្ឋាននៅមិនទាន់មានភាពល្អប្រសើរ »។ លោកស្រីបន្ថែមថា ៖« ក្រៅពីឆ្នេរខ្សាច់ដ៏ស្រស់ស្អាត យើងត្រូវមានរមណីយដ្ឋានកែច្នៃបន្ថែមទៀត ព្រោះភ្ញៀវទេសចរមិនត្រឹមតែចង់មកកម្សាន្តនៅឆ្នេរខ្សាច់ ហើយថតរូបនោះ ទេ »៕
ចែករំលែកព័តមាននេះ