រាជធានីភ្នំពេញ ៖ នៅក្នុងរយៈពេលប៉ុន្មានឆ្នាំចុងក្រោយនេះ ការផ្លាស់ប្តូរផ្នត់គំនិតពលរដ្ឋកម្ពុជា ពីការទទួលទានកាហ្វេនៅតាមផ្លូវ មករកសេវាកម្មកាហ្វេដែលមានម៉ាកយីហោ និងឆុងភ្លាមៗ នៅក្នុងហាងត្រឹមត្រូវនោះ កាន់តែមានកំណើនឡើងគួរអោយកត់សម្គាល់ ដែលជាឱកាសមួយសម្រាប់ឧស្សាហកម្មកាហ្វេ…
រាជធានីភ្នំពេញ ៖ នៅក្នុងរយៈពេលប៉ុន្មានឆ្នាំចុងក្រោយនេះ ការផ្លាស់ប្តូរផ្នត់គំនិតពលរដ្ឋកម្ពុជា ពីការទទួលទានកាហ្វេនៅតាមផ្លូវ មករកសេវាកម្មកាហ្វេដែលមានម៉ាកយីហោ និងឆុងភ្លាមៗ នៅក្នុងហាងត្រឹមត្រូវនោះ កាន់តែមានកំណើនឡើងគួរអោយកត់សម្គាល់ ដែលជាឱកាសមួយសម្រាប់ឧស្សាហកម្មកាហ្វេ ទាំងការនាំចូលសិទ្ធិចែកចាយបន្ត និងបង្កើតក្នុងស្រុក ។ ក្នុងនោះដែរ ការបង្កើតម៉ាកយីហោកាហ្វេក្នុងស្រុក ក៏ឃើញថាកំពុងមានកំណើនគួរអោយកត់សម្គាល់ផងដែរ ជាក់ស្ដែង «ស៊ីក្លូកាហ្វេ » ដែលជាម៉ាកបង្កើតក្នុងស្រុកបានមើលឃើញពីឱកាសនៃអាជីវកម្មនេះ និងគ្រោងបង្កើតសាខាអោយបានច្រើនទៅតាមលទ្ធភាពរបស់ខ្លួន ជាមួយនឹងការផ្ដល់សិទ្ធិលក់បន្ត ( Franchise ) ទៅកាន់ដៃគូរ ។
បើតាមលោក ឃួន យ៉ូអីុ ស្ថាបនិកហាងកាហ្វេ (ស៊ីក្លូកាហ្វេ ) ដែលជាម៉ាកសញ្ញាក្នុងស្រុកមួយបានអោយដឹងថា គោលគំនិតចម្បងរបស់ខ្លួនក្នុងការបង្កើតហាងកាហ្វេនេះឡើង ដើម្បីផ្ដល់ជូននូវសេវាកម្មកាហ្វេទៅកាន់ពលរដ្ឋក្នុងស្រុក និងបរទេសអោយស្គាល់ពីម៉ាកសញ្ញាដែលបង្កើតឡើងដោយកូនខ្មែរ ។ មួយវិញទៀតនោះ គឺដើម្បីពង្រីកហាងកាហ្វេនេះ អោយកាន់តែច្រើនតាមទៅអាចធ្វើបាន ដោយនឹងលក់សិទ្ធិអាជីវកម្ម ( Franchise ) ទៅកាន់ដៃគូរដែលមានបំណងបើកអាជីវកម្មកាហ្វេ ខណៈកំណើននៃការទទួលកាហ្វេពីសំណាក់ពលរដ្ឋកម្ពុជា កាន់តែច្រើនរួមទាំងសិស្ស និស្សិត និងអ្នកបម្រើការងារនៅតាមស្ថាប័ននានាផងដែរ ។
លោក ឃួន យ៉ូអ៊ី ថា ៖ « ការបង្កើតហាងកាហ្វេនេះដែរ ក៏ដើម្បីប្រកួតប្រជែងជាមួយកាហ្វេដែលនាំចូលពីខាងក្រៅប្រទេស ខណៈបច្ចុប្បន្នយីហោនាំចូលពីខាងក្រៅ កាន់តែច្រើនមកកាន់ក្នុងស្រុកយើង ។ មួយវិញទៀត ក៏ដើម្បីផ្ដល់ជំរើសកាន់តែច្រើនទៅកាន់អ្នកនិយមពិសារកាហ្វេ ជាពិសេសកាហ្វេដែលឆុងភ្លាមៗ ចេញពីម៉ាស៊ីនត្រឹមត្រូវ » ។
លោកបន្តថា ការបង្កើតម៉ាកយីហោកាហ្វេ មិនមែនត្រឹមតែការលក់កាហ្វេមួយមុខនោះទេ គឺត្រូវមាន
សេវាកម្មល្អ បន្ថែមពីលើគុណភាពកាហ្វេ ដែលធ្វើអោយអតិថិជនពេញចិត្ត និងត្រលប់មកប្រើសេវាកម្មយើងម្ដងទៀត ជាក់ស្ដែងកាហ្វេស៊ីក្លូ កាលពីពេលបើកដំបូងបានផ្ដោតទៅលើសេវាកម្មរហ័ស ដោយក្នុងនោះ ភ្ញៀវអាចទិញខ្ចប់នៅនឹងកន្លែង ដើម្បីយកទៅពិសារនៅកន្លែងការងារ ឬតាមផ្លូវជាដើម ។ មួយវិញទៀតនោះកាហ្វេស៊ីក្លូក៏មានសេវាកម្មដឹកជញ្ជូនដល់កន្លែងភ្ញៀវផងដែរ ដែលទាំងនេះហើយ ធ្វើអោយភ្ញៀវពេញចិត្តជាមួយនឹងសេវាកម្មរបស់យើង និងអាចអោយយើងមានលទ្ធភាពពង្រីកទីតាំងជាបន្តបន្ទាប់។
លោកបន្ថែមថា រហូតមកដល់ពេលនេះ ហាងស៊ីក្លូកាហ្វេ បានពង្រីកទីតាំងរហូតដល់៤ទីតាំង ត្រឹមរយៈពេលតែប៉ុន្មានឆ្នាំប៉ុណ្ណោះ ដោយផ្ដើមចេញពីការគាំទ្ររបស់អតិថិជន ។ លោកថា « នៅក្នុងឆ្នាំ២០១៩ និង ២០២០ ខាងមុខនេះ យើងនឹងពង្រីកសាខាបន្ថែមទៀត ដោយផ្ដោតទៅលើសេវាកម្មទទួលទាននៅនឹងកន្លែង សម្រាប់ភ្ញៀវដែលជាធុរជន និងសិស្ស និស្សិត ដើម្បីអោយពួកគាត់អាចទទួលបាននូវរសជាតិកាហ្វេផង និងបំពេញកិច្ចការផង ។
នៅក្នុងឆ្នាំនេះដែរ ស៊ីក្លូកាហ្វេ ក៏នឹងពង្រីកសេវាកម្មមួយទៀត គឺការទទួលបម្រើសេវាកម្មកាហ្វេ នៅតាមកម្មវិធីផ្សេងៗដូចជា ពិធីភ្ជាប់ពាក្យ អាពាហ៍ពិពាហ៍ និងកម្មវិធីផ្សេងៗជាច្រើនទៀតផងដែរ » ។
លោកបញ្ជាក់ថា នៅថ្ងៃខាងមុខអាជីវកម្មកាហ្វេនឹងកាន់តែមានកំណើនឡើងជាមួយនឹងការផ្លាស់ប្តូរនូវផ្នត់គំនិតរបស់ប្រជាពលរដ្ឋពីការទទួលទានកាហ្វេតាមផ្លូវ មករកកាហ្វេ ដែលមានយីហោស្តង់ដារត្រឹមត្រូវ ក្នុងនោះស៊ីក្លូកាហ្វេក៏មានផែនការពង្រីកបន្ថែមនៅតាមបណ្ដាទីប្រជុំជនសំខាន់ៗ នៅរាជធានីភ្នំពេញ ៕ ដោយសហការ
ចែករំលែកព័តមាននេះ