ទីក្រុងហ្សឺណែវ ៖ អង្គការសហប្រជាជាតិ(UN) បាននិយាយកាលពីថ្ងៃទី១៣ កុម្ភៈ កន្លងមកថា អត្រាអ្នកគ្មានការងារធ្វើជុំវិញពិភពលោកបានធ្លាក់ចុះកាលពីឆ្នាំមុន និងបានព្រមានថាការងារទាំងនោះមិនអាចជួយផ្គត់ផ្គង់ជីវភាពរស់នៅសមរម្យទេ ដោយមានពលករប្រមាណ៧០០លាននាក់ រស់នៅក្រោមភាពក្រីក្រនៅឡើយ…
ទីក្រុងហ្សឺណែវ ៖ អង្គការសហប្រជាជាតិ(UN) បាននិយាយកាលពីថ្ងៃទី១៣ កុម្ភៈ កន្លងមកថា អត្រាអ្នកគ្មានការងារធ្វើជុំវិញពិភពលោកបានធ្លាក់ចុះកាលពីឆ្នាំមុន និងបានព្រមានថាការងារទាំងនោះមិនអាចជួយផ្គត់ផ្គង់ជីវភាពរស់នៅសមរម្យទេ ដោយមានពលករប្រមាណ៧០០លាននាក់ រស់នៅក្រោមភាពក្រីក្រនៅឡើយ ។
អង្គការការងារអន្តរជាតិ (ILO) បាននិយាយមកថា អត្រាអ្នកគ្មានការងារជុំវិញពិភពលោកកាលពីឆ្នាំមុនបានធ្លាក់ពី ៥,១% មកស្មើ៥% ដែលជាការធ្លាក់ចុះដំបូងតាំងពីវិបត្តិហិរញ្ញវត្ថុឆ្នាំ២០០៨ មក ។
ប៉ុន្តែពួកគេបាននិយាយក្នុងរបាយការណ៍ទស្សនវិស័យការងារ និងសង្គមពិភពលោកខ្លួនថា ទីផ្សារការងារពិភពលោកក៏មានស្ថានការណ៍មិននឹងនរដែរ ។
អ្នកស្រី Deborah Greenfield នាយករង ILO បានប្រាប់ដល់អ្នកកាសែតថា ការធ្លាក់ចុះនៃអត្រាអ្នកគ្មានការងារនឹងត្រូវបានផ្អាកខណៈដែលមានភាពមិនប្រាកដប្រជាជាច្រើន ។
ភ្នាក់ងារក្រោមអង្គការសហប្រជាជាតិនេះបាននិយាយថា អត្រាអ្នកគ្មានការងារនឹងរក្សានៅដដែលក្នុងឆ្នាំនេះ និងឆ្នាំ២០២០ ប៉ុន្តែចំនួនប្រជាជនគ្មានការងារអាចនឹងកើនឡើងប្រមាណ ២លាននាក់មកស្មើ១៧៤លាននាក់នៅឆ្នាំក្រោយព្រោះចំនួនពលករសរុបកើនឡើង ។
ជាពិសេសជាងនេះទៅទៀត របាយការណ៍ខាងលើកត់សម្គាល់ថាមនុស្សរាប់រយលាននាក់នៅរស់នៅក្រោមភាពក្រីក្របើទោះជាមានការងារច្រើនជាងមួយកន្លែងពិតមែនក្តី ។ អង្គការខាងលើបានប្រទះឃើញថា មនុស្សភាគច្រើននៃអ្នកដែលមានការងារប្រមាណ ៣,៣ប៊ីលាននាក់ជុំវិញពិភពលោកកាលពីឆ្នាំមុននៅខ្វះសម្ភារសមរម្យសម្រាប់ការរស់នៅប្រចាំថ្ងៃ សន្តិសុខហិរញ្ញវត្ថុ និងសមភាពឱកាសក្នុងការអភិវឌ្ឍន៍ធនធានមនុស្សជាដើម ។
លោក Damain Grimshaw ប្រធានផ្នែកស្រាវជ្រាវនៅ ILO បាននិយាយក្នុងសេចក្តីថ្លែងការណ៍មួយថា ៖« ការមានការងារធ្វើមិនធានាថាមានជីវភាពរស់នៅសមរម្យទេ »។ជាមួយគ្នានេះផងដែរ អ្នកស្រី Greenfield បានព្រមានថា គំរូអាជីវកម្មថ្មីៗដូចជាការប្រើបច្ចេកវិទ្យាដើម្បីបង្កើតការងារបណ្តោះអាសន្នដូចជាសេវាកម្មចែករំលែកយានជំនិះអាចបង្កើនចំនួនអ្នកដែលមានការងារក្រៅផ្លូវការដោយមិនមានការការពារដោយកិច្ចសន្យាត្រឹមត្រូវ ៕
ចែករំលែកព័តមាននេះ